ဆၧလၧဆၧယံၩဆၧၡီၩ့နီၪ မၩနၧၩ့ခၫ့ဖျီၫ့ ဆၧဒုၭလိၬၥၭအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧလၧဆၧယံၩဆၧၡီၩ့နီၪ မၩနၧၩ့ခၫ့ဖျီၫ့ ဆၧဒုၭလိၬၥၭအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ဆၧလၧဆၧဒုၭဆၧၫ့ဆၧႇ ဆၧၥၭနီၩ့ထၪ့လဖၪနီၪ ပအီၪၥူၪထၬ လန့ဘၪနီၪလီၫႉ အ့ၪပဘၪဒၪ ဆၧအနီၪၥံၪယူၭစွါဘဲၫ ပကဘၪဒၪဆၧၫ့ယၫဂီၩ့တၭ ပကဘၪမၩပျၩ့ခွံၬဝ့ၫနီၪလီၫႉ ဆၧလၧပကဲၪၦၡၩကမံၩ့နီၪ ပဘၪဒၪဆၧၥၭနီၩ့ထၪ့အထၧးအလၧးအခၫ ပမိဆိၫ့ခွံၬ ဆၧထိစိၩၥံၪလဖၪနီၪလီၫႉ ၦၡၩလနၩ့နၩ့ အ့ၪဒၪဘၪ ဆၧၥၭနီၩ့ထၪ့အခံၫ့နီၪ ဆၧၫ့ထုၪ့ယိဝ့ၫဂီၩ့တၭ အီၪၥ့ၪအီၪကဲၪ စဲၪ့ဖီၩ့ခွံၬဝ့ၫဒၪနီၪလီၫႉ ၦၡၩလနၩ့နၩ့နီၪ အ့ၪဒၪဘၪ ဆၧကၪဆၧဂဲၩအခံၫ့နီၪ ဆီၫ့မီၪ့ဝ့ၫ ဆၧနၩ့မံၩ့အ့ၬဂီၩ့ လီၩပျၩ့ဝ့ၫတၭ  ဆၧကၪဆၧဂဲၩနီၪ ဂဲၫဎိၩထၪ့ ဘံၪဘူၪအၥၭနီၪလီၫႉ ၦၡၩလနၩ့နၩ့နီၪ ဒၪဘၪဆၧကၪဆၧဂဲၩအခၫ လီၩနၪၥ့ၪဝ့ၫၥ့ၪ ဂ့ၩဂ့ၩဘၪဘၪနီၪလီၫႉ အဝ့ၫၥံၪနီၪ ကဘၪလီၩနၪၥ့ၪဆၧအဂး အၥွံၪဒူၩအၥၭလုၬ အီၪဝ့ၫဒၪနီၪလီၫႉ                                                                                                     ဆၧလၧၦၡၩအနီၪၥံၪနီၪ ကဆါဎြံၬကိၭဝ့ၫ လၧၦအမၩၡူၪမၩမုၬဆၧဖိၪၥံၪနီၪလီၫႉ ဘဲၫဆၧမၩအနီၪၥိၭ ပလီၩမၩဖိၬဝ့ၫစွါဘဲၫ  ဆၧလဘၪလိၬဎွ့ၩဎီၩဘၪၥံၪအကျၩ ပၥုၪ့ထၪ့ဆၧယံၩဆၧၡီၩ့ ကန့ဝ့ၫဒၪနီၪလီၫႉ ဆၧလၧဆၧမၩအယီၩနီၪ  ၦၡၩၥုၪ့ထၪ့ ကန့ဝ့ၫဒၪလၧ ၦအၥၭဂ့ၩၥၭဘွၩအီၪၥံၪလဖၪ ကဒီၪ့နီၪလီၫႉ လကၭဒံၭဘၪ အ့ၪပမၩ ဆၧမၩလိၪ အဖျီၩ့ယီၩနၧၩ့စွါဘဲၫ ၦၡၩၥံၪ လဂၩဒဲလဂၩ ၥုၪ့ထံးၥၭထံး ကအီၪထၪ့ဝ့ၫဒၪနီၪလီၫႉ လၧလံၬဆံၫ့ဎံၪဖၧၩ့ ပခိၭနၪဘၪ ကဆါဎြံၬအဆၧချဲၩ့နီၪ မွဲဝ့ၫဒၪ အ့ၪပမၩဘၪလိၬထဲၩ့ဆၧ န့ကိၭမံၩ့စွါဘဲၫ ပကန့ထၪ့ထဲၩ့ဘၪ ဆၧၡူၪဆၧမုၬ အၪမၬလ့ၬနီၪလီၫႉ လကၭဒံၭဘၪ  ၦၡၩထီးအလူၬၥံၪ အဆၧၡူၪဆၧမုၬအဝံအစၧၩ့နီၪ မွဲဝ့ၫဒၪ ကဆါဎြံၬနီၪလီၫႉ လံၬဆံၫ့ဎံၪ ဖ့ၪအ့ၪဆၧပရၧၫ့ကမံၩ့နီၪ ဆၧလၧဆၧၡူၪဆၧမုၬနီၪ အီၪဂဲၫစႇထၪ့လၧ လဂၩဒဲလဂၩ နူၬဆဲၬအဆၧမၩဖၧၩ့နီၪလီၫႉ လကၭဒံၭဘၪ လၧဎြံၬအထံၩအဖျဲအကျၩနီၪ ပဒၪဘၪဆၧၡူၪဆၧမုၬကိၭမံၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပကဆါဎြံၬနီၪ မၩနၧၩ့ခၪ့ဖျီၪ့ ဂၪ့ခိၪဂီၩ့တၭ ဒိၭန့ဘၪဆၧၡူၪဆၧမုၬနီၪလီၫႉ ဆၧလၧဆၧၡူၪဆၧမုၬနီၪ အီၪလၧဆၧပျၩ့မွဲအ့ၬဂီၩ့ မွဲဝ့ၫဒၪ အီၪလၧပၥၭခံဖၧၩ့နီၪလီၫႉ လၧပၥၭခံဖၧၩ့ ပမိမၩဘၪလိၬထဲၩ့ဆၧ ပၥၭလူၬ အ့ၪလအီၪဘၪစွါဘဲၫ ပကၥုၪ့ထၪ့ ဆၧၡူၪဆၧမုၬအဂး လယီၪဘၪအကၠီၩ့နီၪလီၫႉ လၧခးကိၪဂၠိ ၥၫ့ခိၪဒိၪၥံၪ လီၩဖ့ၪနဲၪထၬဝ့ၫ ဆၧချဲၩ့နီၪ မွဲဝ့ၫဒၪ ဆၧလၧဆၨၩဆၭ လမီၪ့ဎီၩ့ဘၪကဒီၪ့ အီၪဝ့ၫဒၪန့ကၠၧၫ့ကၠၧၫ့နီၪ မွဲဝ့ၫဒၪ ဆၧလူဒိၪဎွ့ၩဒိၪ ကမံၩ့နီၪလီၫႉ လၧပၥၭခံဖၧၩ့ ဆၧအၪ့လဲၩထၪ့ၥၭဒဲ ဆၧဘၪလိၬအိၭလိၬထဲၩ့ဆၧအဖၧၩ့ ပန့ထၪ့ထဲၩ့ဘၪ ဆၧယံၩဆၧၡီၩ့နီၪမၬဆ့  ပထံၫပခး ကလ့ၩထၪ့လ့ၩထီၫအဂး ပကမၩဆၧၩ့ကန့ဝ့ၫဒၪအကၠီၩ့ ယအဲၪဒိၭရၩလၩ့န့အ့ၪဘၪ နၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩအဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ