ဆၧယၫ့ၥုၪ့ယၫ့ၥၭအကဆါ အဆၧမၩဖျီၩ့အဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧယၫ့ၥုၪ့ယၫ့ၥၭအကဆါ အဆၧမၩဖျီၩ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭၥံၪဧ့ႇ ဆၧယၫ့ၥုၪ့ယၫ့ၥၭအကဆါ အဘိၪ့မုနံၩ အတုၬမုနံၩဎိၩနီၪ ပဝ့ၫၥံၪထီးအလူၬ အဖၫ့ခိၪ ဆၧယၫ့ၥုၪ့ယၫ့ၥၭအကဆါ အဆၧမၩဖျီၩ့ အီၪဝ့ၫဒၪ ၥၧၫ့မံၩ့နီၪလီၫႉ ပဝ့ၫၥံၪပဘၪဒၪဆၧၫ့ယၫ ဆၧကၪဆၧဂဲၩႇ ဆၧတတုၬတနၭအခံၫ့ ပန့ထၪ့ဘၪဂဲးဘၭႇ ပန့ထၪ့ဘၪ ဆၧဖျါခွံၬလၧ ဆၧယၫ့ၥုၪ့ယၫ့ၥၭအကဆါအီၪ လကၭဒံၭဘၪ အဝ့ၫဖ့ၪနဲၪအ့ၪပၧၩ ဆၧၥုၪ့ဎွံၫၥၭထိၬနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧယၫ့ၥုၪ့ၥၫ့ၥၭအကဆါယီၩ ခွံၬၡၭထၬပဝ့ၫၥံၪ နးဆိၩအ့ၬနီၪ ပကဘၪ ၥ့ၪယၫနၪၥ့ၪလၧ ပၥၭခံဖၧၩ့နီၪလီၫႉ အဝ့ၫယီၩ အဲၪပၧၩထၨၪဘၪထိးၥံၪၥၭ ကကၠၪနီၪလီၫႉ လါနၫ့ ဆၧယၫ့ၥုၪ့ယၫ့ၥၭ အကဆါ ဖ့ၪနဲၪအ့ၪပဝ့ၫၥံၪ အဝ့ၫအဆၧဖျီၩ့ဒဲ အဆၧမၩလဖၪနီၪ အ့ၪပအီၪလၧ ဆၧထုၪ့ၥုၪ့ထုၪ့ၥၭအ့ၬႇ အ့ၪပအီၪလၧ ဆၧဒဲၩဘၭဖၧၩ့ၥၭဖၧၩ့စွါဘဲၫ ဆၧလဖၪၥံၪယီၩ ပၥ့ၪယၫထၪ့ လကဲၪၥ့ၪဘၪနီၪလီၫႉ ၦၡၩဘဲၫၥ့ၪလဲၪနီၪ ၥ့ၪယၫဘၪ အဝ့ၫအဆၧယၫ့ၥုၪ့ယၫ့ၥၭလၩစွါဘဲၫ ၦလၧအဆၧဆူနဲၩဎိၩဒိၪဖၧၩ့ ဒိၭနဲၩ့ၥၭလၧ ကဆါယွၩအီၪလဖၪၥံၪနီၪလီၫႉ အဝ့ၫၥံၪယီၩ အၥၭထၧၫ့ဖျိၪ့ယၫ အဆၧမၩလဖၪဖၧၩ့ ယိလါ ဒိၭနဲၩ့ၥၭလၧ ကဆါယွၩအီၪဂီၩ့ အဝ့ၫၥံၪ လီၩ့မၩဖိၬထွ့ၫဝ့ၫလၧ ကဆါယွၩ ၥီၪ့လိၪနဲၪလိၪ ဖၧၩ့ၥၭဖၧၩ့နီၪလီၫႉ

မွဲဆၧနီၪ ထၧၫ့ဖုဝဲထံၩၥိၭၥံၪဧ့ႇ လၧပဆၧၥၭမၧၫ့ မုကိၭနံၩဒ့ၭဖၧၩ့ ဆၧယၫ့ၥုၪ့ယၫ့ၥၭအကဆါ အဆၧမၩလဖၪဒဲ ဆၧမၩအဖျီၩ့ ၥၧၫ့မံၩ့နီၪ မွဲကဲၪထၪ့လၧ ပၥၭခံဖၧၩ့ဂၩ ပကအၪ့စၪ့လၩ့ထဲၩ့ပၥၭ ကိၭဂၩလါဆံၭႉ

အဆိၫထုၬကထံၪနီၪ ပဘၪဒၪဆၧၫ့ယၫ ဆၧကၪဆၧဂဲၩႇ ဆၧတတုၬတနၭအခံၫ့ ဆၧယၫ့ၥုၪ့ယၫ့ၥၭအကဆါနီၪ ဖ့ၪဂဲးဖ့ၪဘၩပၧၩ ဘဲၫၥ့ၪလဲၪ?

နံၫထံၪကထံၪနီၪ မွဲပန့ထၪ့ဘၪ ဆၧကွဲဖျါဆၧလၧ ကဆါယွၩအီၪၥိၭ ပဝ့ၫၥံၪနးဆ့ ၦဂူၫဂၩအဆၧမၪနီၪ ပဖျါခွံၬဘဲၫၥ့ၪလဲၪ?

ၥၧၫ့ထံၪကထံၪနီၪ ဆၧယၫ့ၥုၪ့ယၫ့ၥၭအကဆါယီၩ ဖ့ၪအ့ၪပဝ့ၫၥံၪထီးအလူၬ ဆၧၥုၪ့ဎွံၫၥၭထိၬနီၪ ဘဲၫၥ့ၪလဲၪ?

ဆၧအယီၩလဖၪၥံၪယီၩ ပအၪ့စၪ့လၩ့ထဲၩ့ပၥၭ ထံၪထံၪဆၭဆၭဂီၩ့ လၧပၥၭခံဖၧၩ့ ဆၧလၧၫ့ဆၧဎွ့ၩ အ့ၪလအီၪဒံၭဘၪစွါဘဲၫ ဘီၩ့ယီၩအခံၫ့ မွဲပကၥ့ၪယၫဘၪ ဆၧယၫ့ၥုၪ့ယၫ့ၥၭအကဆါ အဆၧမၩဖျီၩ့အဂး ပကအၪ့က့ၩဘၩဆိၪဖၪလၧ အဝ့ၫဒၪအီၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪၥ့ၪယၫနၪၥ့ၪထၪ့ ကဆါယွၩ အဆၧယၫ့ၥုၪ့ယၫ့ၥၭ ကိၭဒ့ၭကိၭဂၩလါဆံၭႉ