ဆၧမုၬလၩၥၭဎွံၪကအီၪအဂး ပကဝဲထၪ့ထၬ ၥုၪ့ၥၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧမုၬလၩၥၭဎွံၪကအီၪအဂး ပကဝဲထၪ့ထၬ ၥုၪ့ၥၭအဂဲးအကၠီၩ့နီၪလီၫႉ ထၧၫ့ဖုဝဲမုၪခွၫ ထီးအလူၬၥံၪဧ့, ၦလၧစီၪလၩ့အၥၭ လၧၫ့ဎွ့ၩဝ့ၫဒၪ ထီးအလူၬလဂၩနီၪ အီၪၥၭမၧၫ့ဝ့ၫဒၪ အနၫ့ဆါဒၪလဂၩဎးၦၡၩ မွဲဝ့ၫလီၫႉ အဝ့ၫၥံၪနီၪ အီၪက့ၪပဲၩထၬလၩ့အၥၭ လၧကဆါယွၩဒဲ နဲၩ့ဎီၩ့ၦၡၩၥံၪအီၪနီၪလီၫႉ လါနၫ့, ၦအီၪက့ၪလၩ့ထၬအၥၭ ဆၧလၧၫ့ဎွ့ၩ လအီၪဘၪ, ၥ့ၪယၫလၩ့အၥၭလၧ ၦအၡၪ့ဖိၪၥံၪနီၪ ကဆါယွၩဒဲ နဲၩ့ဎီၩ့ထံၩၥိၭ လဖၪၥံၪအီၪ အီၪက့ၪထၬ ဆၧဆုးကျိၭ, ဝဲထၪ့ထၬ ၥုၪ့ၥၭနီၪလီၫႉ မွဲဆၧနီၪ, ၦၡၩဘဲၫယီၩၥိၭနီၪ န့ဘၪဆၧၥုၪ့ဎွံၪၥၭထိၬနီၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ဘဲၫၥၫ့ဎွၩဖရၫ့စ့ၭ အဆၧလီၩဖျီၪထၪ့ထၬ ၦၡၩနံၫမံၩ့ဖၧၩ့ယီၩၥိၭ ပမွဲဝ့ၫ ထၧၫ့မံၩ့မံၩ့လဲၪ ပကဘၪအၪ့စၪ့လၩ့ထဲၩ့ပၥၭနီၪလီၫႉ ဆၧကိၪ့ဆၧတဲၩ့ၥံၪ, ဆၧကဲၪဒိၪကဲၪမုၥံၪ အီၪဝ့ၫဒၪ အၪမၬဒ့ၭ လါနၫ့ လၧၫ့ဎွ့ၩဝ့ၫထီးအလူၬ ၦၡၩလအီၪဘၪနးဂၩနီၪလီၫႉ ၦလၧအဲၪဒိၭ စီၩ့မၩ့ဎိၩဒိၪလဖၪၥံၪစွါဘဲၫ ဆၧလၧၫ့ဆၧဎွ့ၩအဂး မံၫ့ၥုၪ့မံၫ့ၥၭ လကဲၪန့ဘၪနးကၠၪနီၪလီၫႉ

မွဲဆၧနီၪ ထၧၫ့ဖုဝဲထံၩၥိၭထီးအလူၬၥံၪဧ့, ပကဘၪဝဲထၪ့ထၬ ပၥုၪ့ပၥၭလၧ ၦဂူၫဂၩၥံၪအဂး မွဲဝ့ၫဒၪနီၪလီၫႉ ပကအၪ့န့ထၪ့ ဆၧမုၬလၩၥၭဎွံၪလၧ ပဝဲထၪ့ၥုၪ့ၥၭလၧ ၦဂူၫဂၩၥံၪအဂးဖၧၩ့လါဆံၭႉ ဘဲၫဆၧလဖၪၥံၪယီၩကန့အဂး ပကအၪ့က့ၩ အခိးအတၩလၧ ၥၭမုဆံၫ့ဎံၪအီၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲကဆါယွၩ အဆၧဆိၩဂ့ၩဆိၩဘွၩ လၩ့ယွၩဝ့ၫဒၪလၧ နၥံၪအဖၫ့ခိၪကိၭနံၩကိၭဂၩလါဆံၭနဲၪႉ