ဆၧမုၬဆၧၡူၪအဒိၪထုၬအလး

ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့နီၪမွဲဝ့ၫဒၪ ဆၧမုၬဆၧၡူၪအဒိၪထုၬအလး အဂဲးအကၠီၩ့နီၪလီၫႉ ယွၩအဖိၪအလံၩပဝ့ၫၦၡၩလဖၪၥံၪယီၩဘဲၪယွၩအဆၧကိၭထျပၧၩအီၪၥိၭအ့ၪပလုထၪ့လၩ့ပၥၭဂ့ၩဂ့ၩ ဘၪဘၪစွါဘဲၫပကန့ဘၪဆၧမုၪဆၧၡူၪတၡါဒ့ၭအကၠီၩ့ၥၫ့ဎွၩဖရၫ့စ့ၭ အဆၧလီၩဖျီၪထၪ့အီၪဝ့ၫဒၪနီၪလီၫႉ ပၧလဂၩလဂၩအဂးယွၩအဆၧကိၪ့ဆၧတဲၩ့ အီၪထၬဝဲၩဝ့ၫဒၪနီၪလီၫႉ ယွၩအဆၧကိၪ့ဆၧတဲၩ့အီၪက့ၪထၬဝ့ၫလၧ ၦၡၩၥံၪအဂး လဖၪနီၪအီၪၥုၪ့လၩ့ထၬအၥၭလၧဆၧအဲၪဆၧကွံၩဖၧၩ့အကၠီၩ့ ၦၡၩၥံၪအဂး ဆၧမုၬဆၧၡူၪအဎိၩဒိၪထုၬနီၪမွဲဝ့ၫဒၪ ယွၩအီၪက့ၪထၬအဆၧအဲၪဆၧကွံၩလၧ ပဖၫ့ခိၪဂီၩ့ ပဂးအီၪက့ၪထၬအ့ၪပၧၩ အဆၧတဲၩ့ လဖၪနီၪ ပထိးဆၧၫ့မၩကဲၪထၪ့ဂ့ၩဂ့ၩဘၪဘၪတၭပကအီၪၥၭမၧၫ့လၧယွၩအဂး ယွၩအဖိၪအလံၩ ၦၡၩပထၧၫ့ဖုဝဲ ထံၩၥိၭၥံၪအဂးမွဲဝ့ၫဒၪနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့ႇ ပန့ထၪ့ထၬဘၪ ပဆၧၥၭမၧၫ့ယီၩ့နီၪ မွဲဝ့ၫဒၪ ယွၩဖ့ၪထၬအ့ၪပၧၩလီၫႉ ပကဘၪအီၪၥၭဖၧၫ့လၧ ဆၧဆူနဲၩဖၧၩ့အဂးဆ့ ယွၩဂိၭထၪ့ပၧၩမွဝ့ၫဒၪလီၫႉ ၦၡၩလဂၩလဂၩဎး ဘဲၫပန့ထၪ့ထၬဘၪပဆၧၥၭပၧၫ့ဆၧၫ့ထီၥိၭ ပကဘၪအီၪၥၭမၧၫ့အဂး ယွၩကိၭထၪ့ထၬပၧၩတၭ ပကဲၪထၪ့ဘၪ ၦၡၩနီၪလီၫႉ ပကဲၪထၪ့ၦၡၩဂီၩ့ နံၫထုၪလထုၪနီၪလၧ ဆၧဆၧနဲၩယွၩဖၧၩ့ပကဘၪအီၪၥၭမၧၫ့အဂး ပဝ့ၫလဖၪၥံၪယီၩ ပမွဲဝ့ၫယွၩကိၭထၪ့ထၬပၧၩမွဲဝ့ၫဒၪ အကၠီၩ့ ၥုၪ့ထုၪလထုၪနီၪ ဘဲၫပန့ထၪ့ထၬပဆၧၥၭမၧၫ့ၥိၭ ပကဘၪအီၪၥၭမၧၫ့အဂးမွဲဝ့ၫဒၪနီၪလီၫႉ

ဒီၪနါခိၭနၪ ဆၧဂၩ့မၧၫ့လါဆံၭ