ဆၧမုၬဆၧလၩ မွဲအအီၪလၧ နၥံၪအၥိၭလါဆံၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ ဘိၪ့လ့ၩဖၭ အဆၧၫ့အထီဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧမုၬဆၧလၩ မွဲအအီၪလၧနၥံၪအၥိၭလါဆံၭ အဂဲးအကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကိၭနံၩဒ့ၭ ပဘၪဒၪဆၧၫ့ယၫ ဆၧထၫ့ဒၩဒဲ ဆၧခံၫခုၪမးယဲၩအကျၩႇ ဆၧဆီၫ့မီၪဆၧဒဲ ဆၧတုၩ့ထၪ့တုၩ့လၩ့ၥံၪအကျၩ ၦလၧအမၩနၧၩ့ ဆၧၥံၪဒိၪဂီၩ့ မၧၫ့ထၪ့ထဲၩ့ ပကဆါဎြံၬ လီၩဖျီၪထၪ့ဝ့ၫနီၪ မွဲဝ့ၫဒၪ Peace be with you ဆၧမုၬဆၧလၩနီၪ မွဲအအီၪလၧ နၥံၪအၥိၭလါဆံၭအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၡၩၥံၪလၧ အယိလၩ့ဒၪန့ၫ အနၫ့ဆါၥံၪအကျၩႇ ဆၧမၩဆီၪ့မၩနီၩ့ဆၧၥံၪအကျၩ လၧပဝ့ၫၥံၪကၠၧၫ့ကၠၧၫ့ ထိးဆၧနိၫ့ဆၧနၭဂီၩ့ မၩနၧၩ့ဆၧၥံၪဒိၪ ပကဆါဎြံၬ လီၩဝ့ၫ ဆၧမုၬဆၧလၩနီၪ မွဲအအီၪလၧ နၥံၪအၥိၭလါဆံၭ ဆၧချဲၩ့ယီၩ ပဝ့ၫပထၧၫ့ဖုဝဲၥံၪထီးအလူၬ အၪ့က့ၩအၪ့ယၫၥိၭ ဆၧတီၩဆၧလီၩ့ ဆၧဎူၫဆၧဎၩ့ ကကဲၪထၪ့အဂးနးဆ့ ဆၧယိလါဎိၩဒိၪဖၧၩ့ ပအၪ့က့ၩဘၩဆိၪဖၪကၠၭဆၧနီၪလီၫႉ ဘဲၫနီၪ ဆၧမၩဆီၪ့မၩနီၩ့ဆၧၥံၪႇ ဆၧဒူၩဆၧယး လအီၪဘၪၥံၪအကျၩ ပကနါဂၧၫ့ဘၪ ကဆါဎြံၬ အဆၧချဲၩ့နီၪ ကၪဂဲၩဝ့ၫဒၪနီၪလီၫႉ

လၧလံၬဆံၫ့ဎံၪ စလုကၭဘၪစကွ့ၭထၬဝ့ၫ (၂၄: ၅-၄၈) ဖၧၩ့ ကဆါဎြံၬ နဲၪဖျီၪထၪ့အၥၭလၧ အထံၩအဖျဲၥံၪအကျၩဂီၩ့ စံၭအဝ့ၫၥံၪ မွဲဆၧမုၬဆၧလၩ အီၪလၧနၥံၪအၥိၭဆံၭႉ ဘဲၫၥိၭဆၧမၪလူၬယီၩ အထံၩအဖျဲၥံၪ ဆူနဲၩဝ့ၫအဂး လကဲၪၥ့ၪဘၪနီၪလီၫႉ မွဲဆၧနီၪ ကဆါဎြံၬ စံၭအဝ့ၫၥံၪ ယိယစူၪယၫၥၭဒဲ ယခၪ့ယၫၥၭဆံၭႉ အဂဲးဘဲၫယီၩ မွဲယနၫ့ဆါဒၪယဝ့ၫလီၫႉ ဖီၪ့ယိယၧၩဆံၭႇ အဂဲးဘဲၫယီၩ ၦစၪနီၪ အီၪလၧအဎွံၪဒဲအယၪ ဘဲၫနၥံၪဒၪဘၪယၧၩယီၩအၥိၭအ့ၬႉ စံၭဆၧဘဲၫနီၪတၭ ဒုၭနဲၪအစူၪယၫၥၭဒဲ အခၪ့ယၫၥၭလၧ အဝ့ၫၥံၪလီၫႉ မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧပဆၧၥၭမၧၫ့ မုကိၭနံၩဒ့ၭဖၧၩ့ လၧအအီၪလၧပဝ့ၫၥံၪကၠၧၫ့ကၠၧၫ့ ကိၭကၠၪဒ့ၭ ကဆါဎြံၬနီၪ ပကအဲၪဒိၭၥ့ၪယၫတၭ မွဲပကန့ထၪ့ နးၥၭဂဲးဘၭအဂး ပကအၪ့က့ၩအၪ့ယၪ ဆၧလၩဆၧဖၩ့ခိးတၩ လၧၥၭမုဆံၫ့ဎံၪကဆါအအီၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ဘိၪ့လ့ၩဖၭ အဆၧၫ့အထီဖၧၩ့ ကဆါဎြံၬ အဆၧဖ့ၪ ဆၧမုၬဆၧလၩ မွဲနၥံၪန့ဝ့ၫဒၪ ကိၭဒံၩကိၭဂၩလါဆံၭႉ