ဆၧဖံၭဆၧမၩဖၧၩ့ ပကြၨၭန့ထၪ့ဘၪ ဒိၪထုၬကုၭဎွ့ၩအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ပဆၧမၩဖၧၩ့ ပကြၨၭန့ထၪ့ဘၪ ဒိၪထုၬကုၭဎွ့ၩ  အဂဲးအကၠီၩ့နီၪလီၫႉ ဆၧလၧပကဲၪၦၡၩနီၪ  အဝံခိၪဆၧၫ့အၥၭလၧ ခီၫ့ၡၩဂးဒဲ  ၡၩခံးဂးနီၪဂီၩ့  ဆၧထိစိၩအီၪဝ့ၫဒၪအကၠီၩ့ႇ ပၥ့ၪယၪကိၭဂၩ ဒ့ၭနီၪလီၫႉ  ပကဲၪၦၡၩၥံၪလဖၪ  န့ၩခၠၧၫ့ ဆၧအဂ့ၩအဖၫ့ခိၪ  ပကဆီၫ့မီၪ့အၪ့ဂၬထဲၩ့အဂး  ပဂဲးဆံၭဝ့ၫဒၪနီၪလီၫႉ လကၭဒ့ၭဘၪႇ  ပကဘၪယူၭယၪ့ကဲၠၭအဂး  ပဂဲးဆံၭအီၪစွါဘဲၫ  ဆၧမၩဆၧဆီၫ့မီၪ့ဂဲးဖျီၩ့နီၪ  ပဆၧနၪၥ့ၪ ဆၧဘၪမၪ  ကအီၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ  ဆၧလၧဆၧမၩကမံၩ့နီၪ  ၦၡၩလဂၩ  ကဒိၪထုၬကုၭဎွ့ၩအဂး  အထၧးအလၧး  တဲၩ့မၩဝ့ၫနီၪလီၫႉ လကၭဒ့ၭဘၪႇ ၦၡၩလဂၩ  ဒိၪထုၬကုၭဎွ့ၩကအီၪအဂး  ပဆၧၥၭမၧၫ့  အဆၧဒၪအနိၪ့အမံၩ့မံၩ့နီၪ  ဘိၪ့ဖ့ၪဂ့ၩဝ့ၫဒၪနီၪလီၫႉပဆၧမၩဖၧၩ့  ပဆၧတဲၩ့ထၪ့ၥံၪႇ  ကဆါကၠဲၭဖ့ၪလၫ့ထၬပၧၩ  ၥ့ၪဂ့ၩဘၪဒဲ ဖံၭထံၩဖံၭၥိၭလၧ ၦၡၩအဂူၫဂၩ ၥ့ၪဝ့ၫဒၪ ဂ့ၩဂ့ၩဘၪဘၪစွါဘဲၫႇ  ဆၧအယီၩနီၪ  မွဲဝ့ၫဒၪ ပမၩဖျီၪ့ထၪ့  ကဆါကဲၠၭ အၥူၭအၥဲၪ့နီၪလီၫႉ  ၦၡၩကိၭဂၩဒ့ၭနီၪ ခီၫ့လၧကဆါကၠဲၭ  စၭထၪ့တဲၩ့လၩ့ပၧၩအခံၫ့နီၪ  ပကဘၪမၩဆၧမၩအဂး  ကိၭဖံၭၥိၭပၧၩနီၪလီၫႉ  ၦၡၩၥံၪအဆၧမၩနီၪ ပအၪ့လဲၩ့ခွံၬလၧ  စဲၭနီၪစွါဘဲၫႇ ၦမၩဆၧဖိၪၥံၪအဂး  ဖံၭၥ့ၪမၩၥ့ၪ ကလၩ့ၡၩဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧပမၩဆၧမၩနီၪ  ပအီၪၥၭမၧၫ့လၧ  ဂၪ့ခိၪယီၩအဂး  မွဲဝ့ၫဒၪအရ့ၩဒိၪထုၬနီၪလီၫႉ  လကၭဒ့ၭဘၪႇ  ဆၧမၩဖၧၩ့နီၪ ပကန့ထၪ့ဘၪ  ဒိၪထုၬကုၭဎွ့ၩဒဲ  ဆၧမၩနၧၩ့ခၪ့ဖျီၫ့နီၪလီၫႉ  ၦၡၪ့ဖိၪၥံၪအဂး  ပမၩဆၧၩ့အဝ့ၫၥံၪလၧ  ကျိၪစ့ၩၥံၪနီၪ ကြၨၭပမၩအ့ၪ  ဘၪဒၪဆၧၫ့ယၫ  အဂဲးအဖးအခံၫ့နီၪလီၫႉ  အၡါမၬနီၪႇ အဝ့ၫၥံၪ အဆၧၥၭမၧၫ့ ထၧၫ့ဘီၩ့ယၫနီၪ  မၩထၪ့ဆၧဖံၭဆၧမၩဒဲ  ကၥ့ၪယၫဆၧဖံၭဆၧမၩ အလူအဎွ့ၩအဂး  ပကဘၪ မၩဆၧၩ့အဝ့ၫၥံၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧကိၪ့ဘၪကိၪ့ၥ့ၪ  လ့ၩထၪ့လ့ၩထီၫလၫ့အကၠီၩ့နီၪ  ၦခီၫ့ၡၩၥံၪလဖၪယီၩ  မၩလၩ့ၡၩခွံၬ ၦဆၧမၩဖိၪၥံၪဂီၩ့  ၥိၩ့ထၪ့ထဲၩ့စဲၭနီၪလီၫႉ  ဆၧနီၪအကၠီၩ့ႇ  ၦမၩဆၧဖိၪၥံၪအဂး  ဆၧဖံၭဆၧမၩ လၩ့ၡၩဝ့ၫဒၪအကၠီၩ့ႇ ၥၫ့ဎွၩဖရၫ့စ့ၭ  အဆၧၥီၫ့ဆၧၥၫ့အီၪဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ