ဆၧတဲၩ့လၩ့ထၪ့ဒၩ ဆၧဒုၭကဲၪထၪ့ဆၧလဖၪၥံၪ ကဘၪအီၪထီဝ့ၫဒၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧတဲၩ့လၩ့ထၪ့ဒၩ ဆၧဒုၭကဲၪထၪ့ဆၧလဖၪၥံၪ ကဘၪအီၪထီဝ့ၫဒၪအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ဂၪ့ခိၪချိၫ့ဖၧၩ့ ၦၡၩလဖၪ ကဘၪအီၪထီခွံၬ ဆၧလၧဆၧတဲၩ့လၩ့လဖၪအဖၫ့ခိၪ ဆၧဒုၭဆၧၫ့ဆၧ ဆၧကိၪ့ဆၧတဲၩ့အအၧၩ့ ဆၧဒုၭဆၧယၩဂီၩ့ ဂၪ့ခိၪနဲၩ့ဎီၩ့ဒဲ ခိဆၧၩ့ချံၫ့အကၠီၩ့ ၦလၧအဘၪထိးဆၧဖိၪၥံၪလဖၪနီၪ ပကဘၪ ယၫ့ၥၭမၩဆၧၩ့ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၡၩလနၩ့နၩ့နီၪ မၩကဲၪထၪ့ ဆၧဒုၭဆၧဂီၩ့ မၩဂၭဂီၩ့ခွံၬ ကဆါကၠဲၬ အဆၧတဲၩ့လၩ့ ထီးအလူၬၥံၪနီၪလီၫႉ အ့ၪမွဲ ပကအီၪလၧ ကဆါယွၩအီၪ ဆၧဖံၭထံၩဖံၭၥိၭ တီၩတီၩလီၩ့လီၩ့စွါဘဲၫႇ ဆၧဘၪလိၬဎွ့ၪဎီၩ့ဒဲ ဆၧၡူၪဆၧမုၬနီၪ လၩ့မၬခွံၬ လန့ဘၪနီၪလီၫႉ ဆၧလၧပကဲၪၦၡၩနီၪ ပကဘၪအီၪၥ့ၪလၧ ဆၧဘၪလိၬဎွ့ၪဎီၩ့အဂး ကဆါကၠဲၬ အလိၪအီၪဝ့ၫဒၪနီၪလီၫႉ ၦၡၩဒဲ ဂၪ့ခိၪနဲၩ့ဎီၩ့ ပၧၩ့ထၬ ဆၧဖံၭထံၩဖံၭၥိၭ တီၩတီၩလီၩ့လီၩ့ကကၠၪ ဆၧဘၪလိၬဎွ့ၪဎီၩ့ဒဲ ဆၧၡူၪဆၧမုၬနီၪ ကဂဲၫယွၩလၩ့ဝ့ၫ ဘဲၫၥိၭ ထံၫဆ့ၭဖျီၩ့ဂီၩ့ ၦၡၩၥံၪထီးအလူၬဒဲ ဆၧမၧၫ့ထီးအလူၬအဂး ကဖ့ၪအ့ၪဝ့ၫ ဂဲးဆၧအၪ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ အီၪလခဲၫကမံၩ့နီၪ ဆၧလၧဆၧဒုၭဆၧယၩလဖၪနီၪ မၩဂၭဂီၩ့ခွံၬ ဆၧကိၭမံၩ့ဒ့ၭ လကၭဒံၭဘၪ ဆၧအခိဂဲးစီၩ့ အၪထၪ့ဝ့ၫဒၪ နၬလ့ၪဂီၩ့ ဆၧဆၧၩ့ၡၩထံၫၡၩ ကဲၪထၪ့ဝ့ၫဒၪနီၪလီၫႉ ဆၧဒုၭဆၧယၩအကၠီၩ့ ဆၧဆၧၩ့ကဲၪထၪ့ ဘၪထဲးဘၪဎဲးဂီၩ့ ထံၫဖၧၩ့ၥၭဒဲ ထံၫချိၬၥံၪလဖၪ ထံၫလၩ့ၥံၭဝ့ၫဒၪနီၪလီၫႉ ဆၧနီၪအကၠီၩ့ ပကဲၪကၭၥလ့ၬဖိၪလဂၩ ပကဘၪအီၪအၪ့ ဂ့ၩဂ့ၩဘၪဘၪဂီၩ့ ပကဘၪမၩဖျီၪ့ထၪ့ ဆၧဘၪလိၬဎွ့ၪဎီၩ့ဒဲ ဆၧၡူၪဆၧမုၬအဂး လိၪဝ့ၫဒၪနီၪလီၫႉ လၩ့ဆၫ့ဒၪဆၧ ဂၪ့ခိၪချိၫ့ထၧၫ့ဘံၪ့ယၫအဂး ဆၧဘၪလိၬဎွ့ၪဎီၩ့ဒဲ ဆၧၡူၪဆၧမုၬ ကန့ဝ့ၫဒၪအဂး ပကဘၪ ကျ့ၭစၨၭမၩဆၧ လိၪဝ့ၫဒၪကိၭဂၩဒ့ၭအကၠီၩ့ ၥၫ့ဎွၩဖရၫ့စ့ၭ အဆၧဆၪ့ထွ့ၫအီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ