ဆၧဎူၫဆၧဎၩ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧဎူၫဆၧဎၩ့အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧဒုၭဆၧယၩနီၪ ဂံၪ့ဒီၪ့ဖိၪၥံၪဒဲ ၦလးဝၩ့ဖိၪၥံၪလဖၪ ဘၪထံၭဘၪနဲၪ့ အၪအၪလ့ၬ မွဲဝ့ၫဒၪ ဆၧၡၪ့ဆၧနၬၥံၪထီးအလူၬ အမိနီၪလီၫႉ ဆၧလၧမွဲဝ့ၫဒၪ ကဆါယွၩ အလၬဆီၪ့ ဆၧဎူၫဆၧဎၩ့နီၪ လဂၩဒဲလဂၩႇ ခရၧၫ့ ကခရၧၫ့ဒဲကခရၧၫ့ ဒၪခီၩ့ဆၧၫ့ယၫ ကၩ့ကၩဎိၭလၩ့ဆၧဒဲ ဆၧဘၪလိၬဎွ့ၪဎီၩ့အဂး ထံၪဎးဘီၩ့ဎး ကျ့ၭစၨၭဝ့ၫဒၪဂီၩ့ မွဲဝ့ၫဒၪ န့ထၪ့ဘၪ ဆၧန့ၥၫနီၪလီၫႉ မွဲဆၧနီၪ ဆၧဎူၫဆၧဎၩ့ ကန့အဂး ကယဲန့ဝ့ၫဒၪ ဆၧမၩအဖျီၩ့မွဲဂ့ၩ ပကဘၪကျ့ၭစၨၭမၩ ခိးဂဲးခိးဘၭဂီၩ့ ပကဘၪဂုထၪ့ ဆုးလီၩ့အကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧဎူၫဆၧဎၩ့နီၪ ၦၡၩကိၭဂၩဒ့ၭမိမၩဘၪဝ့ၫ လါနၫ့ဂ့ၩ လနၩ့နၩ့နီၪ ဆၧဒုၭဆၧယၩအကၠီၩ့ ၦၡၩၥံၪ ဘၪၥံၪဘၪဆၫႇ စဲၪ့ဖျိၬဂၭဖျ့ၭႇ ဘၪဒၪဆၧၫ့ယၫ ဆၧတတုၬတနၭကိၭမံၩ့ဒ့ၭႇ မွဲဝ့ၫဒၪ ဆၧဒုၭဆၧယၩယီၩ ဆၧၡၪ့ဆၧနၬထီးအလူၬအမိ ၥ့ၪယၫဝ့ၫလါနၫ့ဂ့ၩ ယိခွါဝ့ၫဒၪန့ၩႇ အၪဎၬလၩ့ဒၪန့ၩ အခံးအဂးနီၪလီၫႉ ၦအအၧၩ့လဖၪနီၪ ကဆါယွၩဖ့ၪထၬအ့ၪ ပဝ့ၫၥံၪထီးအလူၬအဂး ဆၧဎူၫဆၧဎၩ့နီၪ ကဂၭဂီၩ့ဂၭစၪအဂး မၩဆီၪ့မၩနီၩ့ဝ့ၫ မၩဂၭဂီၩ့ခွံၬဝ့ၫ ထီးအလူၬနီၪလီၫႉ မွဲဆၧနီၪ ဘဲၫၥၫ့ဎွၩဖရၫ့စ့ၭ ဖ့ၪဂဲးဖ့ၪဘၭထၬၥိၭ ဆၧဎူၫဆၧဎၩ့ကန့အဂး ကယဲမွဲဝ့ၫဒၪ ဆၧမၩအဖျီၩ့နးမံၩ့ ပကကျ့ၭစၨၭမၩကၠၬ ထံၪဎးဘီၩ့ဎးလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪၥုၪ့ထၪ့ကၠၬ ဆၧဎူၫဆၧဎၩ့ န့ဝ့ၫဒၪလါဆံၭႉ