ဆၧဎူၫဆၧဎၩ့ဖၧၩ့အဂးဒဲ ယွၩအဆၧတဲၩ့လၩ့လဖၪအဂဲး

ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪၥၫ့ဎွၩ ဖရၫ့စ့ၭအဆၧၥီၪ့ဆၧၥၫ့နီၪမွဲဝ့ၫဒၪ ပကဘၪလီၩ့ဎွါထၪ့ထဲၩ့ဆၧဎူၫဆၧဎၩ့အဆၧၥၭမၧၫ့ဒဲ ပကဘၪယူၭယၪ့ယွၩအဆၧတဲၩ့လၩ့ထၬအကၠီၩ့နီၪလီၫႉ  ဆၧဆၫဆီၪ့ၥံၫဆီၪ့ကဲၪထၪ့ဝ့ၫဒၪ ခံၫခၫဆၧၫ့ထီယီၩ ခီၫ့ၡၩဂဲး စၭမၩကဲၪထၪ့ထဲၩ့ဝ့ၫကန့အဂး ၡၩခံးဂးအဆၧဖံၭဆၧမၩ ကမၧၫ့ထၪ့ထဲၩ့အဂး အီၪက့ၪထၬအဆၧထိစိၩဂီၩ့မၩကဲၪထၪ့ဆၧအီၪကီၪ့ဖၭဒိၪလၧ ၦၡၩမၩဆံၭဖိၪမၩဖိၪၥံၪအီၪဝ့ၫဒၪနီၪလီၫႉ ၦၡၩထုၬထၪ့ဆၧအၪ့ဆၧအီၩအခၪ့ထံၭဆံၬဖိၪမၩဖိၪၥံၪအီၪၥၫ့ဎွၩဖရၫ့စ့ၭ အဆၧဆၪ့ထွ့ၪဆၧချဲၩ့နီၪမွဲဝ့ၫဒၪ ဂၪ့ခိၪဖိၪၥံၪ ဂၪ့ခိၪလုၫလါၥံၪဒဲ ဆၧတဲၩ့လၩ့မူၭခိၪဒဲဂၫ့ခိၪအကဆါဆၧၥၧၫ့မံၩ့ယီၩ အဆၧဆုးကျိၭလိၬၥၭအဂဲးနီၪပကဘၪအၪ့ဎၬဆီၫ့မီၪ့ထၪ့ထဲၩ့ အကၠီၩ့နီၪလီၫႉ

ပမၩအၪ့ဆံၬဖိၪကၩဖိၪဆၧမၩမွဲဂ့ၩ ဆၧဖံၭဆၧမၩအဂူၩဂၩမွဲဂ့ၩ တခၩဒၪကမွဲ ဆၧဖံၭဆၧမၩနးမံၩ့နီၪ ကဖ့ၪအ့ၪပၧၩအခိးအတၩ ထၨၪမုလဲၪ ကမံၩ့လီၫ ပကဘၪယိဘဲၫယီၩ ၥိၭလမွဲဘၪတၭ ပကဘၪယိအရ့ၩဒိၪနီၪမွဲဝ့ၫဒၪပဆၧဖံၭဆၧမၩလဖၪၥံၪနီၪ ဖ့ၪခိးဖ့ၪတၩအ့ၪၡၩခံးဂး ဘဲၫၥ့ၪလဲၪ အဂဲးအကၠီၩ့နီၪလီၫႉ ပဆၧဖံၭဆၧမၩလဖၪၥံၪနီၪ ပကဒိၭနဲၩ့ပၥၭလၧ ဂၪ့ခိၪလုၫလါဖၧၩ့ဂီၩ့ ပကဘၪမၩဎိၩထၪ့ဒိၪထၪ့ ပခီၫ့ၡၩဂဲးအဂးမွဲအ့ၬႉ ပကဘၪယိထွ့ၪယိခွါဂၪ့ခိၪလုၫလါ အဂၭဂီၩ့ဘၪအဂးအကၠီၩ့ အနီၪမၬ ဂၪ့ခိၪဖိၪၥံၪထီးအလူၬအဂံၪ့မွဲဝ့ၫ ဂၪ့ခိၪချိၫ့နီၪ ကဖီၩ့ဖျ့ၭလၧဆၧဂၭဂီၩ့ဂၭစၪဖၧၩ့အကၠီၩ့ ၥၫ့ဎွၩဖရၫ့စ့ၭအဆၧၥၫ့အီၪဝ့ၫဒၪဘဲၫယီၩ ၥိၭနီၪလီၫႉ

ဒီၪနါခိၭနၪဆၧဂၩ့မၧၫ့လါဆံၭ