ဆၧကၪဆၧဂဲၩဒဲ အၪ့ထၩဆၧအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ဆၧကၪဆၧဂဲၩဒဲ အၪ့ထၩဆၧအဂဲး  အကၠီၩ့နီၪလီၫႉ ဆၧလၧပကဲၪၦၡၩနီၪ ပဂံၪ့ဒီၪ့ဖၧၩ့  ပကဒၪဘၪ ဆၧကၪဆၧဂဲၩ  လမံၩ့လမွဲဘၪလမံၩ့နီၪလီၫႉ  ဆၧလၧ ဆၧကၪဆၧဂဲၩနီၪ  ဂဲၫနုၬလၩ့ၥ့ၪဝ့ၫဒၪ အဖျီၩ့အမံၩ့မံၩ့နီၪလီၫႉ  ဆၧလၧ ဆၧကၪဆၧဂဲၩနီၪ အအၧၩ့ကအီၪ အဂ့ၩကအီၪ လါနၫ့ဂ့ၩႇ ဆၧလၧပကဲၪၦၡၩနီၪ ဆၧကၪဆၧဂဲၩကဘၪအီၪအဂး  လိၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဂံၪ့ဒီၪ့ဖၧၩ့  ပဒၪဘၪဆၧကၪဆၧဂဲၩ့ကဒီၪ့နီၪ  အ့ၪပမၩနၧၩ့ခၪ့ဖျီၪ့စွါဘဲၫႇ ဂံၪ့ဒီၪ့ဖိၪၥံၪ  လဂၩဘၪလဂၩ အဆၧဖံၭထံၩဖံၭၥိၭနီၪ  ပကဘၪထိးဆၧၫ့ဝ့ၫဒၪနီၪလီၫႉ  ၦလၧထၪ့ၡါဂီၩ့ကဒီၪ့နီၪ  အဝ့ၫၥံၪ အဆၧၥၭမၧၫ့ထၧၫ့ဘီၩ့ ယၫနီၪ  ကဘၪအီၪဝ့ၫလၧ  ဆၧမုၬဆၧလၩနီၪလီၫႉ ဘၪဒၪဆၧၫ့ယၫလၧ  ဆၧကၪဆၧဂဲၩစွါဘဲၫႇ အဝ့ၫၥံၪ လဂၩဘၪလဂၩ  ဆၧအဲၪဆၧကွံၩကဎိၩထၪ့အဂး  ၥီၪ့လိၪအ့ၪအဝ့ၫၥံၪနီၪလီၫႉ  ပကဲၪထၧၫ့မၫဝၩၥံၪလဖၪ ဂံၪ့ဒီၪ့ဖၧၩ့ ဆၧမၩနၧၩ့ခၪ့ဖျီၪ့အီၪမွဲဂ့ၩ  လအီၪဘၪမွဲဂ့ၩ  လဂၩဘၪလဂၩ  ၥၭဂၭဂီၩ့လိၬၥၭႇ ၥၭထၪ့လိၬၥၭ ကြၨၭလအီၪဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘၪမနီၪလဲၪစွါဘဲၫႇ ဆၧကၪဆၧဂဲၩနီၪ  ၦလၧထၪ့ၡါဂီၩ့ၥံၪ  အဂံၪ့ဒီၪ့ဖၧၩ့  ဆၧအဲၪဆၧကွံၩကဂုးခၧၫ့အဂး ကလ့ၩထၪ့လ့ၩထီၫအဂး  မွဲဝ့ၫဒၪအခွးအယါနီၪလီၫႉ လကၭဒ့ၭဘၪႇ ဂံၪ့ဒီၪ့ဖၧၩ့ ဖိၪၥၪအီၪဖျဲၪ့ဂီၩ့စွါဘဲၫ အဝ့ၫကဎိၩထၪ့အဂးႇ  ကလ့ၩထၪ့လ့ၩထီၫအဂး  ဆၧကိၪ့ဘၪကိၪ့ၥ့ၪအဂးႇ ဆၧအီၪမုၬအီၪဆီၫ့အဂးႇ ကိၭမံၩ့ဒ့ၭနီၪ  မွဲဝ့ၫဒၪ  မိဖါအတၩလၫ့ဒဲ  အဆၧအၪ့ထၩဆၧနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဂံၪ့ဒီၪ့ဖၧၩ့  ပကဒၪဘၪ  ဆၧကၪဆၧဂဲၩ အဎိၩထုၬကမံၩ့နီၪ  မွဲဝ့ၫဒၪ ၥၭခ့ၬဆၧႇ  ဆၧဖံၭထံၩဖံၭၥိၭနီၩ့ထၪ့ႇ ၥုၪ့အီၪၥၭအီၪ  မုၬလၩလၧ  ၦမုၪၦခွၫအဂူၫဂၩနီၪလီၫႉ ဂံၪ့ဒီၪ့ဖိၪၥံၪ ဘၪဒၪဆၧၫ့ယၫ  ဆၧကၪဆၧဂဲၩထီးအလူၬနီၪ မၩထီၫထၪ့အ့ၪ အဝ့ၫၥံၪ  ဆၧအုၩ့လၩ့အီၪလၩ့ဒဲ  ဆၧအဲၪဆၧကွံၩနီၪအကီၠၩ့  ၥၫ့ဎွၩဖရၫ့စ့ၭ  အဆၧၥီၫ့ဆၧၥၫ့အီၪဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ