ဆၧကွဲဖျါဆၧအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့နီၪ မွဲဝ့ၫဒၪ ဆၧကွဲဖျါဆၧအဂဲး အကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ပအၪ့လဲၩထၪ့ခွံၬပၥၭ ဂ့ၩဘၪစဲၪကန့အဂး ဆၧလၧဆၧအုၩ့လၩ့ဆၧမၪ စကဲၫ့မဲၫတူၩယီၩ မွဲဝ့ၫဒၪ အရ့ၩဒိၪ ဘၪလးဘၪကျဲၩ လမံၩ့နီၪလီၫႉ ဆၧလၧစကဲၫ့မဲၫတူၩယီၩ ပဒိၭန့ဂီၩ့ ပန့ထၪ့ဆၧကွဲဖျါကကၠၪ ပဝ့ၫၥံၪယီၩ ၦဂူၫဂၩအဆၧမၪနီၪ ပဖျါခွံၬန့ အၪနဲၪ့န့ လခီၩ့ဒၪအိၩနီၪလီၫႉ ပဝ့ၫၥံၪယီၩ ပဘၪထိးဖျါခွံၬၥၭအကၠီၩ့ လၧၦၡၩၥုၪ့အုၭၥၭလၩ့ႇ ၥုၪ့ခိဝီၩ့ၥၭခိဝီၩ့ လဖၪၥံၪနီၪ ပမၩမုၬၥၭႇ ပဖ့ၪအ့ၪဂဲးဘၭ ဆၧချဲၩ့လဖၪပချဲၩ့ဂီၩ့ ပကၩ့ကၩဎိၭလၩ့ န့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ လဖၪၥံၪနီၪ တီၩလီၩ့ဂီၩ့ ဆူယိၬအၪမၬဒ့ၭနီၪလီၫႉ မွဲဆၧနီၪ အဝ့ၫအဆၧၥီၪ့ဆၧၥၫ့ လဖၪနီၪ ပဖီခိၭမၬခိၭမၬဂီၩ့ ပအၪ့ဎၬထံၫထံၫဆၭဆၭစွါဘဲၫ အၡၩထုၬ ပကမၩဆၧလမံၩ့မံၩ့အဂး ပန့ထၪ့ဆၧကိၪ့နီၪလီၫႉ အနီၪမနီၪလဲၪစွါဘဲၫ အဆိၫထုၬကထံၪနီၪ ပအုၩ့လၩ့ ပဆၧဒဲၩဘၭ လၧဆၧဆၫ့လၩ့ၥုၪ့ဆၫ့လၩ့ၥၭဂီၩ့ အခွးန့ကကၠၪ ပကဘၪလ့ၩဒိၭန့ ဆၧအုၩ့လၩ့ဆၧမၪ စကဲၫ့မဲၫတူၩနီၪလီၫႉ

နံၫထံၪကထံၪနီၪ လၧၦမၩဘၪထံၭဘၪနဲၪ့ပၧၩ ပဒုၪဒၩၥံၪအဂဲး လၧပၥၭခံဖၧၩ့ ပစၧၩ့ထၬပၥၭအ့ၬဂီၩ့ လၧကဆါယွၩအီၪ ပအၪ့က့ၩဘၩဆိၪဖၪဆၧအဖၧၩ့ ပကွဲဖျါအဝ့ၫၥံၪ ကန့အဂး ပကဘၪကျ့ၭစၨၭနီၪလီၫႉ ၥၧၫ့ထံၪကထံၪနီၪ လၧပနဲၩ့ပဎီၩ့ ၦအဘၪဒၪဆၧၫ့ယၫ ဆၧနိၫ့ဆၧနၭႇ ၦအဘၪထိး ၥုၪ့ဆၫၥၭဆၫႇ လၧၦၡၩၥုၪ့အုၭၥၭလၩ့ႇ ၥုၪ့ခိဝီၩၥၭခိဝီၩ လဖၪၥံၪနီၪ ပဖ့ၪဂဲးဖ့ၪဘၭႇ ပယၫ့ၥၭမၩဆၧၩ့ႇ ပအၪ့က့ၩဘၩဆိၪဖၪအ့ၪ အဝ့ၫၥံၪအဂး န့ဝ့ၫဒၪနီၪလီၫႉ မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ လၧနၥံၪအဆၧၥၭမၧၫ့ဖၧၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲနၥံၪ လီၩ့မၩဖိၬထွ့ၫန့ဝ့ၫဒၪ မုကိၭနံၩလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪ ကိၭဒံၩကိၭဂၩလါဆံၭႉ