ဆါဎြံၬမၩ ဘျၪထဲၩ့ ၦလၧအနါအၧၩ့ၦအုၭအၭ

ထၧၫ့ဖုဝဲထံၩၥိၭထီးအလူၬၥံၪဧႉႇ လၧၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪမွဲဝ့ၫဒၪ ကဆါဎြံၬ မၩ ဘျၪထဲၩ့ ၦအနါအၧၩ့ၦအုၭအၭ အဂဲးအကၠီၩ့နီၪလီၫႉ လၧလံၬဆံၫ့ဎံၪဖၧၩ့ ဆၧကွ့ၭထၬအီၪဝ့ၫဒၪ ကဆါဎြံၬအီၩ့နုၬအစူၪနိၩ့လၧ ၦအနါအၧၩ့အနါဖၧၩ့ ဂီၩ့ ထိၪဖျံၭဝ့ၫတၭ ထိၭ ဘၪအဖျ့ၩကကၠၪ ၦအနါအၧၩ့ၦအုၭအၭနီၪ နါဂၧၫ့ထၪ့ ထဲၩ့ဆၧဂီၩ့ ချဲၩ့ထၪ့ဆၧချဲၩ့န့ထဲၩ့ ဂ့ၩ ဘၪစဲၪနီၪလီၫႉ ၦအနါ အၧၩ့ ၦအုၭအၭနီၪ အၪ့ကံၩ့အၪ့ယၫ ကဆါဎြံၬ ကအီၪက့ၪထၬအစူၪလၧ အဝ့ၫအီၪဂီၩ့ကကၠၪ န့ထၪ့ထဲၩ့ဘၪ ဆၧနါ ဂၧၫ့ဂီၩ့ ချဲၩ့ထၪ့ထဲၩ့ ၥ့ၪဝ့ၫဒၪလထုၪဎးနီၪလီၫႉ ၦအနါအၧၩ့လဂၩချဲၩ့လၥ့ၪ ဘၪအဂဲးနီၪ လနါဂၧၫ့ ဘၪဆၧအလူနးမံၩ့ အကၠီၩ့ ချဲၩ့လၥ့ၪ ဘၪနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉႇ ပဝ့ၫၥံၪကိၭဂၩယီၩ ပနါအီၪလါနၫ့ ပလနါဂၧၫ့ ဘၪဆၧချဲၩ့ၥံၪ အီၪဝ့ၫအၪမၬဒ့ၭ နီၪလီၫႉ ဘၪကဲၪဝ့ၫ ဘဲၫယီၩၥိၭနီၪ ဘၪနီၪလဲၪ ႉ လၧပၥၭခံဖၧၩ့ ပလနါဂၧၫ့ ဘၪ ဆၧနါအၧၩ့ကဲၪထၪ့ဝ့ၫဒၪလၧ ပၥၭ ခံဖၧၩ့ အကၠီၩ့နီၪလီၫႉ ပကဘၪအၪ့ကံၩ့ကဆါဎြံၬ ကဂဲၫ ဘျၩ့အ့ၪ ပၧၩအဂးနီၪလီၫႉ လၧပၥၭခံဖၧၩ့ ဆၧနါအၧၩ့ ကဲၪ ထၪ့ဝ့ၫဒၪနီၪ ကဲၪထၪ့ဆၧအၧၩ့နဲၪန့ ပနါ နါဂၧၫ့ဆၧ လၥ့ၪ ဘၪနီၪလီၫႉ ၦဂူၫဂၩၥံၪ အဲၪဒိၭချဲၩ့ ဆၧချဲၩ့ လမံၩ့မံၩ့ အခံၫ့ ပဖ့ၪအ့ၪအ့ၬ ႉ ပဒီၪနါအ့ၪအ့ၬ ႉ ပစဲၪ့ ထၪ့ခွံၬလၧ အဝ့ၫၥံၪအနဲၩ့ အီၪဝ့ၫဒၪနီၪလီၫႉ ပက ဘၪအၪ့စၪ့လၩ့ပၥၭ ပဒီၪနါၦဂူၫဂၩၥံၪအဆၧချဲၩ့ နၧၩ့ဝ့ၫဒၪထၨၪမုလဲၪ ႉ ပအီၪက့ၪထၬပၥၭလၧ ၦဂူၫဂၩၥံၪအီၪယူၭဧၪႉ ပဖ့ၪအ့ၪ ပအခံၫ့ လၧ ၦဂူၫဂၩၥံၪ အဂးဧၪ ႉ ပက ဘၪဒီၪနါၦဂူၫဂၩၥံၪဂီၩ့ အဝ့ၫၥံၪအလိၪလဖၪအဖၫ့ခိၪ ပက ဘၪဖ့ၪအ့ၪ ပဆၧမၩ ဆၧၩ့နီၪလီၫႉ

          ပကဘၪဒီၪနါခိၭနၪဂုအဝ့ၫၥံၪနီၪ အရ့ၩဒိၪ ဆၧအဂဲးအဖးမွဲဝ့ၫလီၫႉ ပဒီၪနါခိၭနၪ ၦဂူၫဂၩ ၥံၪအီၪအ့ၬဂီၩ့ ပချဲၩ့ဝ့ၫဒၪ ဘဲၫပဆၧဘၪၥၭၥိၭ အီၪဝ့ၫထၨၪမုယူၭလဲၪ ႉ ပဒီၪနါၦဂူၫဂၩၥံၪအ့ၬဂီၩ့ ပဆၧချဲၩ့လဖၪနီၪ ပချဲၩ့ၥ့ၪဝ့ၫဒၪ လဘျၩ့ ဘၪလဘျၩ့ နီၪလီၫႉ ၦဂူၫဂၩၥံၪ အဆၧချဲၩ့ ကချဲၩ့ဝ့ၫထၨၪ အထုၬမၬ ပဖ့ၪအ့ၪအခံၫ့အ့ၬနီၪလီၫႉ ဘဲၫပချဲၩ့ၥိၭ ၦဂူၫဂၩအဆၧချဲၩ့ဆ့ ပက ဘၪဒီၪနါနီၪလီၫႉ ဆၧလၧ ဆၧမၩ ဘျၪထဲၩ့ဆၧအဆၧမၩနီၪ မွဲဝ့ၫဒၪ ဆၧဒီၪနါခိၭနၪလီၫႉ ထၧၫ့ဖုဝဲထံၩၥိၭၥံၪဧႉ ႇ ပလ့ၩလၧ ကဆါဎြံၬအီၪအခံၫ့နးဆ့ ပက ဘၪဖီၪ့ဂုးထၬ ဆၧၥ့ၪယၫ နၪၥ့ၪ ဘဲၫယီၩၥိၭနီၪ လီၫႉ အီၪဝ့ၫဒၪန့ ပကချဲၩ့လီၫဂီၩ့ ကဆါဎြံၬအဆၧချဲၩ့ ပခိၭနၪအ့ၬစွါ ဘဲၫ ပကန့ ဘၪ ပဆၧဆၫ အဆၧ ဘျၪထဲၩ့ ၡီၩ့ထဲၩ့ ကၥ့ၪအ့ၬနီၪလီၫႉ ပဝ့ၫ ပဎြံၬဖိၪလဖၪၥံၪယီၩ မုကိၭ နံၩဒ့ၭဖၧၩ့  ပနါဂၧၫ့ဘၪ ကဆါဎြံၬအဆၧချဲၩ့  အီၪဝ့ၫဒၪ အၪမၬဒ့ၭနီၪလီၫႉ ကဆါဎြံၬအဆၧချဲၩ့လဖၪ နီၪ အ့ၪပလခိၭနၪ ဘၪစွါဘဲၫ အီၪလၧပမါၡါဖၧၩ့ ပနးခီၫ့နးၥၭ ဆၧဆၫ ၥံၪလဖၪ လန့ထၪ့ ဘၪ ဆၧ ဘျၪ ကၥ့ၪဧၪအ့ၬနီၪလီၫႉ မွဲဆၧနီၪ လၧပဆၧၥၭမၧၫ့ မုကိၭနံၩဒ့ၭဖၧၩ့ ပက ဘၪဒီၪနါ ခိၭနၪ ကဆါယွၩ ၥီၪ့ၥၫ့ထၬပၧၩလဖၪ လိၪဝ့ၫဒၪအဂဲး ၥၫ့ဎွၩဖရၫ့စ့ၭ အဆၧဆၪ့ထွ့ၪဆၧချဲၩ့ ႇ အဆၧဖ့ၪဂဲးဖ့ၪ ဘၭ အီၪဝ့ၫ ဘဲၫယီၩၥိၭအဂဲး ယရၩလၩ့ဖ့ၪၥ့ၪယၫအ့ၪ ဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ