ခိၭအီၪဖျါထုၬနၥံၪအဆၧဘၩဆိၪဖၪလဂ့ၩႉ

ထၧၫ့ဖုဝဲထံၩၥိၭထီးအလူၬၥံၪဧႉ ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭအဆၧၥီၪ့ ဆၧၥၫ့နီၪ မွဲဝ့ၫဒၪ ပဆၧဘၩဆိၪဖၪလဖၪၥံၪနီၪ ကဆါယွၩ ဒီၪနါခိၭနၪအကၠီၩ့ ႇ လၧပဆၧအၪ့ကံၩ့ဘၩဆိၪဖၪ လမံၩ့အဖၫ့ခိၪ ပလကြၨၭအီၪဖျါထုၬ ခွံၬဘၪအကၠီၩ့ နီၪလီၫႉ လကၠၪလကၠၪ ပဆၧဘၩဆိၪဖၪလဖၪနီၪ ဘဲၫ ကဆါယွၩ လဖ့ၪ အ့ၪဘၪပၧၩၥိၭ ကဲၪထၪ့ဝ့ၫဒၪလၧ ပၥၭဖၧၩ့ ၥ့ၪနီၪလီၫႉ လါနၫ့ ယွၩနီၪ ဒီၪနါခိၭနၪ ပဆၧ ဘၩဆိၪဖၪလဖၪၥံၪ တၡါဒ့ၭအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪ နီၪလီၫႉ ပဂးႇ ၦဂူၫဂၩၥံၪအဂး ဆၧအၪ့ကံၩ့ဘၩဆိၪဖၪလဖၪ လလၧၫ့ဎွ့ၩထၪ့ဘၪ ၦၡၩၥံၪ ကိၭၡၭ ထၪ့အလူ ပနါဂၧၫ့ဘၪ ခိၭမၬခိၭမၬဒ့ၭနီၪလီၫႉ ပဆၧအၪ့ကံၩ့ဘၩဆိၪဖၪ အဆၧထိစိၩလဖၪနီၪ ကြၨၭတီၩလါနၫ့ လလၧၫ့ဎွ့ၩထၪ့ ဘၪစွါဘဲၫ ဆၧအၪ့ ကီၪအၪ့စၭဆၧ ႇ ဆၧလီၩနၧၩ့လီၩစၪဆၧ ကဲၪထၪ့ဝ့ၫဒၪနီၪလီၫႉ

အ့ၪကဲၪဘဲၪယီၩၥိၭစွါဘဲၫ ပဝ့ၫၥံၪယီၩ ပမွဲဝ့ၫ ယွၩအဖိၪအလံၩဂီၩ့ ဘၪနီၪလဲၪ လခိၭဒိၪ နါဘၪ ပဆၧဘၩဆိၪဖၪနီၪလဲၪႉ ပဝ့ၫၦၡၩလဖၪၥံၪယီၩ အ့ၪပအၪ့ ကံၩ့ဘၩဆိၪဖၪဆၧ လၧ ယွၩအီၪစွါဘဲၫ ပကဘၪအၪ့ကံၩ့ ဘဲၫ ပဝ့ၫၥံၪယီၩ ပမွဲဝ့ၫယွၩ အဎီးအၡၩၥိၭနီၪလီၫႉ ယွၩနီၪကဘၪကဲၪ ပဝ့ၫၥံၪ အဎီးအၡၩမွဲအ့ၬႉ ပဝ့ၫၦၡၩလဖၪၥံၪ အဆၧအၪ့ကံၩ့ဘၩဆိၪဖၪဆၧလၧ ၥၭအဆၧတီၩဆၧလီၩ့ဖၧၩ့ အခံၫ့ ႇ ဘၪထွ့ၪလၧ ယွၩအ ဘၩ့ အမုအဂဲး ပအၪ့ကံၩ့ဘၩဆိၪဖၪဆၧအခံၫ့ ႇ မိလဂၩ အၪ့ကံၩ့ဘၩဆိၪဖၪန့အ့ၪ အီၪလမုၬဆီၪ့လချဲၫ့ဘၪ အဖိၪ အလံၩအဂးအခံၫ့ ယွၩလဒီၪနါ ဘၪ ပၧၩနီၪ ဘၪနီၪလဲၪ ႉ ဆၧအၪ့စၪ့လမံၩ့ယီၩ ဆၧချဲၩ့ဆၧၫ့ထဲၩ့ ကအီၪအဂး ပက ဘၪ ဖီ လံၬဆံၫ့ဎံၪ ဆၧၥၭထိၬအပရၧၫ့ဂီၩ့ ပကဘၪ အၪ့ဎၬဆီၫ့မီၪ့ထၪ့လိၪဝ့ၫဒၪနီၪလီၫႉ အ့ၪပ ယိထဲၩ ကဆါဎြံၬ အဆၧၥၭမၧၫ့စွါဘဲၫ အဝ့ၫအဆၧၥၭမၧၫ့နီၪ ဎွ့ၩလၩ့ဝ့ၫဒၪလၧ ဆၧအၪ့ ကံၩ့ဘၩဆိၪဖၪနီၪလီၫႉ အဝ့ၫအဆၧအၪ့ ကံၩ့ ဘၩ ဆိၪဖၪဆၧထီးအလူၬနီၪ ဝၩ့ဖီၩ့ထၬအ ၥၭလၧ ဆၧကၪဆၧဂဲၩၥံၪနီၪလီၫႉ

ကဆါဎြံၬအဆၧဘၩဆိၪဖၪနီၪ မွဲဝ့ၫဒၪ အၪ့ကံၩ့အၪ့ ယၫ ဆၧယၫ့ၥုၪ့ယၫ့ၥၭလၧ ယွၩအီၪ ဆၧချဲၩ့မွဲဝ့ၫ “ ယၫ့ၥၭဘၪယၧၩလါဆံၭ ” ဆၧချဲၩ့ မွဲဝ့ၫဒၪနီၪလီၫႉ လကၠၪလဘျၩ့ ပဆၧအၪ့ယၫလဖၪ န့ဝ့ၫဒၪလထုၪဎးဂီၩ့ လကၠၪလကၠၪန့ဝ့ၫဒၪ လထုၪဎးအ့ၬနီၪလီၫႉ ကဆါဎြံၬအနၫ့ဆါဒၪအဝ့ၫနးဆ့ အၪ့ကံၩ့ဘၩဆိၪဖၪဆၧလၧ ဂျဲၭဆ့ၫမၫနံၫ လးဖၧၩ့အခံၫ့ ယွၩလဖ့ၪ လၧၫ့ဎွ့ၩ ထၪ့ အ့ၪဘၪ အဝ့ၫအဆၧဘၩဆိၪဖၪနီၪ လီၫႉ အဆၧအၪ့ကံၩ့ဘၩဆိၪဖၪ ယွၩလဖ့ၪအ့ၪဘၪအဝ့ၫကကၠၪ အဝ့ၫက ဘၪထိး ဆၧနိၫ့ ဆၧနၭလဖၪ အၪ့န့ထိးထၪ့ဝ့ၫဒၪ လၧ ၥုၪ့ဂ့ၫၥၭဘွၩဖၧၩ့အကၠီၩ့ အဝ့ၫဘၪထိး ဆၧနိၫ့ဆၧနၭလဖၪနီၪ လမွဲဘၪဆၧအထုၬဂီၩ့ ၥုၪ့နံၩလနံၩဂီၩ့ကကၠၪ အဝ့ၫအဂး ဆၧၥၭမၧၫ့ န့ထၪ့ထဲၩ့ဝ့ၫဒၪနီၪလီၫႉ မွဲဆၧနီၪ အဲၪကွံၩဘၪ ထၧၫ့ဖုဝဲထံၩၥိၭထီးလူၬၥံၪဧႉ ႇ ပဆၧအၪ့ကံၩ့ဘၩဆိၪဖၪ လဖၪ လလၧၫ့ဎွ့ၩဒံၭဘၪလါနၫ့ ပလကြၨၭ အီၪဖျါထုၬ ထၬဘၪ ပဆၧအၪ့ကံၩ့အၪ့ယၫ အကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭ နီၪလီၫႉ