ကၭၥလ့ၬ ဆၧအီၪကီၪ့ ဆၧထၪ့အီၪဎုၬအဂဲး

အဲၪကွံၩဘၪထၧၫ့ဖု၀ဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၫ့ဆၧၥၪ့နီၪမွဲ၀့ၫဒၪ ကၭၥလ့ၬ ဆၧအီၪကီၪ့ ဆၧထၪ့အီၪဎုၬအဂဲးအကၠီၩ့နီၪလီၫႉ ၥၫ့ဎွၩဖရၫ့စ့ၭ အဆၧလီၩဖျီၪထၪ့အီၪ၀့ၫဒၪ ကၭၥလ့ၬဆၧဘိၪ့ဆၧဘၩဖိၪၥံၪ အၪ့န့ထၪ့ ဆၧထၪ့အီၪဎုၬ စကရမ့ၫတူၩနီၪ လုၫလါထူၪရူၫ လမွဲဘၪဂီၩ့ မွဲ၀့ၫဒၪယွၩဖ့ၪအ့ၪပၧၩ အ၀့ၫအခိးအတၩ ခိၪဖၭနီၪလီၫႉ

ဆၧလၧဆၧထၪ့အီၪဎုၬ စကရမ့ၫတူၩနီၪ ပမၩလၧၫ့ဎွ့ၩ ဆၧအီၪကီၪ့အီၪက့ၪထၬ လူၫလါအဂးလီၫ လမွဲဘၪလီၫႉ ပကဲၪကၭၥလ့ၬဎြံၬဖိၪလဂၩအကၠီၩ့, ပကလီၩ့မၩဖိၬထွ့ၫ ဆၧအီၪကီၪ့အီၪက့ၪထၬ ၥနိၫ့အဂးအကၠီၩ့, ဆၧအီၪကီၪ့ အဆၧၥီၪ့ဆၧၥၫ့နီၪအကၠီၩ့, ပမိမၩကဲၪထၪ့ ဆၧဘိၪ့ဆၧဘၩအဂးအကၠီၩ့ ပလကြၨၭအၪ့န့ထၪ့ဘၪ ဆၧထၪ့အီၪဎုၬ စကရမ့ၫတူၩယီၩနီၪလီၫႉ ၦလၧအၪ့န့ထၪ့ ဆၧထၪ့အီၪဎုၬစကရမ့ၫတူၩနီၪ ကဘၪအီၪၥုၪ့လၩ့ထၬအၥၭလၧ ကဆါဎြံၬအဆၧအဲၪအဂုးခၧၫ့ ဘဲၫလိးခိလီၪ့ၥိၭအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့အီၪ၀့ၫဒၪနီၪလီၫႉ

ၦမုၪဒဲၦခွၫ ဆၧအဲၪတၩ့ဖိၪနံၫဂၩ အဆၧအဲၪအဖၫ့ခိၪ ကဆါယွၩဖ့ၪအ့ၪအ၀့ၫၥံၪ ဆၧထၪ့အီၪဎုၬ ကဆါအဆၧအဲၪဆၧဖ့ၪလၫ့ မွဲ၀့ၫဒၪနီၪလီၫႉ ဆၧထၪ့အီၪဎုၬနီၪ မွဲ၀့ၫဆၧအဲၪအဆၧဖ့ၪလၫ့ အဎိၩဒိၪထုၬဂီၩ့ လၧၫ့ဎွ့ၩ၀့ၫဒၪလၧ ဂဲးဘၭနီၪလီၫႉ ဆၧထၪ့အီၪဎုၬအဆၧအဲၪယီၩ လဂၩဘၪလဂၩ အ့ၪၥီၪကၠဲၪအီၪစွါဘဲၫ တခၩဒၪ ဆၧကၪဆၧဂဲၩကအီၪနးမံၩ့ ထိးဆၧၫ့န့၀့ၫဒၪ မွဲ၀့ၫဆၧအဲၪအဒိၪထုၬအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪ၀့ၫဒၪနီၪလီၫႉ

ၦလၧအၪ့န့ထၪ့ ဆၧထၪ့အီၪဎုၬစကရမ့ၫတူၩလဖၪၥံၪနီၪ လဂၩဘၪလဂၩ ကအီၪၥၭမၧၫ့အ့ၪလိၬၥၭအဂး လၧၫ့ဎွ့ၩ၀့ၫဒၪလၧ ဂဲးဘၭအကၠီၩ့ ဂဲးဘၭယီၩ ကဆါဎြံၬအနၪ့ဆါဒၪအ၀့ၫ ဖ့ၪလၫ့ထၬမွဲ၀့ၫအကၠီၩ့ မွဲဆၧနီ ဂံၪ့ဒီၪ့ဖိၪၥံၪအဆၧၥၭမၧၫ့နီၪ ကဲၪထၪ့ၥ့ၪအ့ၬလအီၪဘၪနီၪလီၫႉ မွဲဆၧနီ ဆၧထၪ့အီၪဎုၬစကရမ့ၫတူၩ အခိးအတၩအကၠီၩ့ ၦထၪ့အီၪဎုၬလဖၪၥံၪနီၪ အ၀့ၫၥံၪအဆၧၥၭမၧၫ့ဖၧၩ့ၥၭ ထၨၪထီယၫဖၧၩ့ ကဘၪလ့ၩ၀့ၫဒၪလၧ ကဆါယွၩကၠၧၫ့ကၠၧၫ့နီလီၫႉ

ဂံၪ့ဒီၪ့ဖိၪၥံၪအဆၧၥၭမၧၫ့နီၪ ဘဲၫလမွဲဘၪ ၥၭအဆီၫ့မီၪ့အဎံၪအလၩလမံၩ့ၥိၭ ပကဘၪအၪ့န့ထၪ့ဆၧၥၭမၧၫ့ယီၩအဂး ကဲၪထၪ့လန့ဘၪမွဲဧၪအ့ၬနီၪလီၫႉ ကဆါယွၩအီၪလၧ အ၀့ၫၥံၪကၠၧၫ့ကၠၧၫ့ ဆၧအုၩ့လၩ့ဆၧချဲၫ့နီၪ ထၪ့အီၪဎုၬမုနံၩကၥၫ့အဂးလီၫ လမွဲဘၪတၭ မွဲ၀့ၫဒၪ ဆၧၥၭမၧၫ့ထၨၪထီယၫအဂးအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၪ့အီၪ၀့ၫဒၪလၧ ၦအၪ့န့ထၪ့ဆၧထၪ့အီၪဎုၬစကရမ့ၫတူၩၥံၪ အီၪဘဲၫယီၩၥိၭအဂဲး ယရၩလၩ့ဖ့ၪအ့ၪဘၪနၥံၪနီၪလီၫႉ အဲၪကွံၩဘၪထၧၫ့ဖု၀ဲထံၭၥိၭထီၩ့အလုၬ မွဲနၥံၪလၧၫ့ဎွ့ၩ၀့ၫဒၪလၧ ကဆါယွၩအဆၧဆိၪဂ့ၩဆိၪဘွၩလါဆံၭႉ