ကဆါယွၩအီၪလၧပၧၩ ကၠၧၫ့ကၠၧၫ့နီၪ ဆူနဲၩတၡါအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ကဆါယွၩအီၪလၧပၧၩ ကၠၧၫ့ကၠၧၫ့နီၪ ဆူနဲၩတၡါအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭ ထီးအလူၬၥံၪဧ့, ပနးၥၭဂဲးဘၭ ဂဲၫလၩ့ဆါ ကဆိကလးအခံၫ့, ဆၧၥုၪ့အုၭၥၭလၩ့ ကဲၪထၪ့အခံၫ့လဖၪၥံၪနီၪ ပလကြၨၭၥၭမဲၪဘၪနီၪလီၫႉ ဘၪနီၪလဲၪစွါဘဲၫ ကဆါဎြံၬနီၪ ခွံၬၡိၬထၬပၧၩ နးဆိၩအ့ၬနီၪလီၫႉ တခၩဒၪ ဆၧကၪဆၧဂဲၩနးမံၩ့ ပခၫ့ဂၬခွံၬလၧ ကဆါဎြံၬ အဆၧမၩဆၧၩ့ဖၧၩ့ န့ဝ့ၫဒၪနီၪ ဆူနဲၩတၡါအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့, လၧပဆၧၥၭမၧၫ့ဖၧၩ့ ဆၧၥုၪ့အုၭၥၭလၩ့ ကဆိကလးနီၪ ပဘၪဒၪခီၩ့ဆၧၫ့ယၫ ကဆိလီၫလါနၫ့ ဆၧအနီၪၥံၪနီၪ လၧဆၧဆူနဲၩ့ဖၧၩ့ ပကဘၪခၫ့ဂၬခွံၬနီၪ မွဲဝ့ၫဒၪ အရ့ၩဒိၪနီၪလီၫႉ ၦအအီၪလၧ ဆၧၥုၪ့အုၭၥၭလၩ့ ကဆိၡၩ လအီၪဘၪၥိၭ ဆၧၥုၪ့ဎွံၫၥၭလၩ့ ကိၭကၠၪဒ့ၭၦၡၩနးဆ့ လအီၪဘၪနီၪလီၫႉ Loyola ဝံၬဖိၪ St. Ignatius ၥီၪ့ၥၫ့ထၬဝ့ၫနီၪ ပဘၪဒၪဆၧၫ့ယၫ နးၥၭဂဲးဘၭ ဂဲၫလၩ့ဆါဒဲ ဆၧၥုၪ့အုၭၥၭလၩ့ လဖၪနီၪ မွဲဝ့ၫဒၪ ပဂဲၫလၩ့ဘူၭလၧ ကဆါယွၩနီၪလီၫႉ လကၭဒံၭဘၪ ဆၧလၧၫ့ဆၧဎွ့ၩ လအီၪဘၪ ပဂဲးဆါဘၭဆါ လဖၪနီၪ ပၥ့ၪယၫအၪထၪ့ဂီၩ့ လၩ့ဆိလၩ့ကၠၪ ဆၧၥုၪ့ဎွံၫၥၭထိ, ဆၧၥုၪ့မုၬၥၭမုၬ လဖၪနီၪ အီၪဒၪန့ၫ ကဆါယွၩအီၪနီၪ မၩနၪ့ထၪ့အ့ၪပၧၩ မွဲဝ့ၫဒၪအကၠီၩ့ ၥီၪ့ၥၫ့ထၬပၧၩနီၪလီၫႉ မွဲဆၧနီၪ ဆၧၥုၪ့အုၭၥၭလၩ့ လနၩ့နၩ့နီၪ လၧၦဎြံၬဖိၪ အဆၧၥၭမၧၫ့ဖၧၩ့ ဘဲၫထုၫစူၪယၫ အကုၭအကျၩ့လမံၩ့ၥိၭ ပကဆီၫ့မီၪ့ထၪ့ဂီၩ့ ပကဘၪအၪ့န့ထၪ့ ဂဲးဘၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ပဘၪဒၪဆၧၫ့ယၫ ဆၧၡၪ့ဆၧနၭ, ဆၧကၪဆၧဂဲၩအခံၫ့ ကဆါယွၩ အအီၪလၧပၥိၭနီၪ ပကဒၪထၪ့အဂး ကၪဂဲၩဝ့ၫဒၪလီၫႉ ဘဲၫနီၪအခံၫ့ ပလီၩ့စီၪထၪ့ဘၪ ကဆါဎြံၬ အီၪလၧပၥိၭအ့ၬ, လ့ၩအီၪခလဲၪနီၪလီၫႉ မွဲဆၧနီၪ ဘဲၫၥၫ့ဎွၩဖရၫ့စ့ၭ ၥီၪ့ၥၫ့ထၬၥိၭ လၧအအီၪလၧပၧၩကၠၧၪ့ကၠၧၫ့ ကဆါဎြံၬအစီၩ့အမၩ့ဖၧၩ့ တခၩဒၪ ဆၧမၩထံၬထၬဆၧ, ဆၧကၪဆၧဂဲၫ, ဆၧၥုၪ့အုၭၥၭလၩ့ လဖၪနီၪ ပခၫ့ဂၬခွံၬန့ဝ့ၫဒၪနီၪ ဆူနဲၩတၡါနီၪလီၫႉ မုကိၭနံၩဒ့ၭ နးၥၭဂဲးဘၭ ကဂုထၪ့အၪထၪ့အဂး ပကအၪ့က့ၩဘၩဆိၪဖၪဆၧဂီၩ့ ပဆၧၥၭမၧၫ့နီၪ ပကကျ့ၭစၨၭၥၭမၧၫ့ ဂ့ၩဂ့ၩဘၪဘၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪအီၪၥၭမၧၫ့ဘဲၫၥိၭကန့ဝ့ၫအဂး ကဆါယွၩ အဆၧဆိၪဂ့ၩဆိၪဘွၩ လၩ့ယွၩဝ့ၫဒၪလၧ နၥံၪကိၭဂၩဒ့ၭအဖၫ့ခိၪလါဆံၭနဲၪႉ

 

Add new comment

1 + 3 =