ကဆါဎြံၬအဆၧချဲၩ့ႇ အဆၧၥီၪ့ဆၧၥၫ့နီၪ ကဘၪမၧၫ့ထၪ့ဝ့ၫလၧ ပအီၪအဂဲး

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့အနိၫ့ အဆၧရၩ လၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪမွဲဝ့ၫဒၪ ကဆါဎြံၬအဆၧချဲၩ့ႇ အဆၧ ၥီၪ့ဆၧၥၫ့နီၪ ကဘၪမၧၫ့ထၪ့လၧ ပအီၪအဂဲးအကၠီၩ့နီၪလီၫႉ လၧလံၬဆံၫ့ဎံၪ (မၫကၧၭ ၁၂:၂၈ ) ဖၧၩ့ ၦကွ့ၭလံၬလဂၩ အၪ့စၪ့ဘၪကဆါဎြံၬ လၧဆၧမၪလူၬထီးအလူၬအကျၩနီၪ အခၪ့ထံၭမွဲ ထံၪထံၪ လဲၪႉ ကဆါဎြံၬမွဲချဲၩ့ ဆၧၫ့ထဲၩ့ ဘၪအဝ့ၫ အဲၪယွၩနကဆါလၧ နၥၭထၧၫ့ဖျိၪ့ယၫႇ ဒဲလၧနၥၭၡီၩ့ထီးအ လူၬႇ ဒဲလၧနၥၭကိၪ့ၥ့ၪထီးအလူၬႇ ဒဲလၧနဂဲးနဘၭထီးအလူၬဆံၭ နီၪလီၫႉ
ကဆါဎြံၬ အဆၧစံၭဆၧၫ့ဆၧချဲၩ့ယီၩ ကမၧၫ့ထၪ့လၧ ပအီၪအဂး ဎြံၬကဆါ အဆၧၥီၪ့ဆၧၥၫ့ လဖၪနီၪ ပက ဘၪချဲၩ့ ခိၭမၬခိၬမၬလိၪဝ့ၫဒၪနီၪလီၫႉ ဘၪမနီၪလဲၪစွါ ဘဲၫ ဆၧလၧ ကဆါဎြံၬ အဆၧ ၥီၪ့ဆၧၥၫ့ႇ အဆၧချဲၩ့နီၪ လမီၪ့ဎီၩ့ ဘၪလၧ ဆၧပရၧၫ့အဂူၫဂၩၥံၪၥိၭအကၠီၩ့ နီၪလီၫႉ မွဲဆၧနီၪ ကဆါယွၩ အဆၧၥီၪ့ဆၧၥၫ့ အီၪဝ့ၫအလး လံၬဆံၫ့ဎံၪနီၪ ပကဘၪဖီဝ့ၫ ခိၭမၬခိၭမၬ လိၪဝ့ၫဒၪ တၡါဒ့ၭနီၪလီၫႉ ယွၩအဆၧလူဆၧချဲၩ့ နီၪ ဆၧယိလါကဘၪမွဲဝ့ၫႇ ဆၧယိလါအဂး မွဲဝ့ၫနီၪလီၫႉ ဘဲၫကဆါဎြံၬ အဆၧစံၭအီၪၥိၭ ယွၩအလူအထၫ ဘၪဆၧကွ့ၭထၬအလး လံၬဆံၫ့ဎံၪနီၪ ပကဘၪ ဖီလၧ ပၥၭထၧၫ့ဖျိၪ့ယၫႇ ဒဲပၥၭၡီၩ့ထီးအလူၬႇ ဒဲလၧပၥၭကိၪ့ၥ့ၪထီးအလူၬႇ ဒဲလၧ ပဂဲးပဘၭထီး အလူၬအကၠီၩ့ လံၬဆံၫ့ဎံၪယီၩ မွဲဝ့ၫလၧၫ့ဎွ့ၩဝ့ၫလၧ ဂဲးဘၭ ပလီၩန့ဝ့ၫဒၪနီၪလီၫႉ
ထၧၫ့ဖုဝဲထံၩၥိၭၥံၪဧႉႇ ယွၩအလူအထၫ ယီၩ က ဘၪဂဲၫစဲၪ့ထၪ့လၧ ပၥၭခံဖၧၩ့ ခိၭမၬခိၭမၬနီၪ လီၫႉ လၧပၥၭခံဖၧၩ့ ယွၩအဆၧလူဆၧချဲၩ့ယီၩ ဂဲၫစဲၪ့ထၪ့ဒၪအဝ့ၫယူၭစွါ ဘဲၫ ပစံၭန့ဝ့ၫဒၪယူၭလၧ ယွၩအီၪလၧ ပၥၭခံဖၧၩ့ယူၭဂီၩ့ ပယဲၩ့လၧ မူၭခိၪ ဘၩ့မုးလၧၩ့အ့ၬနီၪလီၫႉ ကဆါယွၩနီၪ ထိးဆၧၫ့ ၦလၧ အထိးဆၧၫ့ ယွၩအဆၧၥီၪ့ဆၧၥၫ့ဂီၩ့ အၪ့န့ထၪ့ထဲၩ့ ၥၭဆၧအၪ့လဲၩထၪ့အၥၭနီၪလီၫႉ မွဲထိးဆၧၫ့ ၦအဖီ လံၬဆံၫ့ဎံၪဂီၩ့ ရၩလၩ့ထဲၩ့ဆၧချဲၩ့အမုၬႇ ကွ့ၭထုၬဖျီၪထၪ့ထဲၩ့ လံၬလဲအမုၬ ၦၡၩၥံၪ မွဲအ့ၬ နီၪလီၫႉ
မွဲဆၧနီၪ ပကအီၪလၩ့ဒိၩ့လၧ လံၬဆံၫ့ဎံၪ ဆၧၥၭထိၬအပရၧၫ့အဂး ပအီၪအလးကိၭဒီၪ့ဖၧၩ့ ပက ဘၪလ့ၩဆိၬန့ လံၬဆံၫ့ဎံၪဂီၩ့ ပက ဘၪဖီဝ့ၫဒၪလၧ ၥုၪ့ဆုးလၩ့ၥၭဆုးလၩ့နီၪလီၫႉ အနီၪမၬ ကဆါဎြံၬနီၪ ကဂဲၫနုၬလၩ့လၧ ပၥၭခံဖၧၩ့ဂီၩ့ ဎြံၬကဆါအဆၧၥၭမၧၫ့နီၪ ကဂုးထၪ့အၪထၪ့လၧ ပဆၧၥၭမၧၫ့ဖၧၩ့ ကန့ဝ့ၫဒၪနီၪလီၫႉ ယွၩအလူအထၫ လံၬဆံၫ့ဎံၪနီၪ မွဲအီၪဂုးခၧၫ့မံၫမၪအလးကလး လီၫအ့ၬႉ မၪဆၧမၩႇ ဂဲၩဝၭအၥၭကိၭအဆၧၫ့ကိၭအထီဒ့ၭဂီၩ့ အၥၭမၧၫ့နီၪလီၫႉ ယွၩဖ့ၪထၬအ့ၪပၧၩ ဆၧအဲၪဆၧကွံၩလမံၩ့ယီၩ အၥၭအီၪဝ့ၫဒၪဂီၩ့ ဂဲၩဝၭဝ့ၫဒၪအကၠီၩ့ ပဆၧအဲၪဆၧကွံၩ အဆၧဂဲၩဝၭလဖၪ နးဆ့ လမီၪ့ဎီၩ့ ဘၪလါနၫ့ အီၪဂဲၫစဲၪ့ထၪ့ဝ့ၫဒၪလၧ ယွၩအဆၧၥီၪ့ဆၧၥၪ့ႇ ယွၩလူယွၩထၫဖၧၩ့နီၪလီၫႉ မွဲဆၧနီၪ ပက ဘၪအၪ့စၪ့လၩ့ပၥၭ ယွၩအဆၧမၪလူၬအခၪ့ထံၭနီၪ လ့ၩခိၪလ့ၩနါပၧၩယူၭဧၪႉ ဂုးထၪ့ မၧၫ့ထၪ့လၧ ပဆၧၥၭမၧၫ့ဖၧၩ့ယူၭဧၪႇ ပက ဘၪအၪ့စၪ့လၩ့ပၥၭလိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ ဆၧၥၫ့အီၪဝ့ၫဒၪ ဘဲၫယီၩၥိၭအဂဲး ယရၩလၩ့ဖ့ၪၥ့ၪယၫအ့ၪ ဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ