ၦမုၪနၩ့ဎံၪလၩဒဲ ဖူၫထၪ့ၦၡၩ (၄)

လချုၭမုလထုၪ့ဒံၭဘၪနီၪ အဝ့ၫမၩန့ ပထုၪ့ကယိၬယူၭႉ ဆၧနီၪ အဝ့ၫယိၬလၫ့ဂီၩ့  ဂဲၫထဲၩ့ထဲၩ့အဖျဲၪလၧ အဂံၪ့စၩ့ဖၭဒိၪနီၪ ထီၩ့လၫ့လၧၥံၪ့ခံၫတၭ နးဖီၫမံၩ့ဘွၩစံၭအနၫ့ဆါမုၬမုၬ ဎွ့ၫယီၩဖိၪယီၩလီၫဘိၭ ယထၬထၫကန့ဒၪနဆဲၫ့ကကုၭကကျၩ့ဒံၭလီၫနဲၪႉ အ့ၪမွဲပအိၭလၩ့အဖံၭ ဒိၪဖိဂီၩ့ ပထုၬလၫ့န့အယဲၩတၭ ပကန့ဘၪၡၩခိၬလီၫအ့ၬဧၪႉ လ့ၩလီၩ့ဎွါဒီၭ နးယိၬဒၪခလူၬအီႉ တလၭမူၭခွၫလီးယီၩ အီၪပွံၭအီၪၥၪ ယိစဲၪအတလၭမူၭမုၪဖိၪအမ့ၬ ကဆိကလးဖိၪဒံၭႉ ဂီၩ့မၬ လၧမုမ့ၬဖၩ့ဒံၭအခၫ မွဲအ့ၪမၩန့ ပထုၪ့ကယိၬကၥ့ၪအဂး ထဲၩ့စဲၪ့စိၩလၧ ခိၪလီၩ့ခၪ့ထံၭဒီၭႉ

ဖီၫမံၩ့ဘွၩ အၪ့ဂူၭအိၭလၩ့ပထုၪ့ဖံၭလၧအဖျဲၪႉ ပထုၪ့ဖံၭအကုၭၥံၪနီၪ ဖီၩ့န့ဖျုၩ ဖၭထီၫကဘီၩ့ဂီၩ့ ဆဲၩလၩ့ယိဝ့ၫ ထူၭလၩ့စိၩလၧ ဖံၭခိၪဒ့ၭအ့ၬတၭ ဖီၩ့ထီၫလၫ့ဝ့ၫဒီၭႉ ထီးအထီၩ့လၩ့လၧ ဖံၭခိၪကကၠၪ အဝ့ၫကၭအဖျုၩနီၪ လၧစၩ့အထဲၩ့လီၩ့ ဖီၪ့ထၭခၧၫ့ခၧၫ့ ဆဲၩလၩ့အၥၭလၧဖျုၩလီၩ့နီၪတၭ ထဲၩ့စဲၪ့လၩ့ဝ့ၫဒၪလီၫႉ ဖူၫထၪ့နီၪဘိၭ လၧဆၧယဲၩ့ယဲၩ့ကစီၪ့အိၩ ယိၬထၬအပထုၪ့ကထုနီၪတၭ ဂဲၫထဲၩ့လၧ အတလၭမူၭမုၪဖိၪအီၪ ၥၭအွံၪအဆၧၥၭအွံၪ ရ့ၬရ့ၬဖိၪဒံၭႉ အဝ့ၫထုၪ့ဘၪအၥၭလၧ ပထုၪ့ဖီၫ ဘွၩဝီၩဝီၩဖိၪၥံၪ လၩ့ယံၭခွံၬယူၬနီၪအ့ၬႉ အၡါမၪနီၪ ဂဲၫထဲၩ့လၩ့ယံၭဝဲၩ ခီၫလၧ အဝ့ၫဂဲၫထဲၩ့ထီၩ့ လၧခဲၫ့ကဘျၩ့နီၪယူၭဘ့ၭႉ

အဝ့ၫဂဲၫထဲၩ့ထီၩ့အခၫနီၪ လၩ့ဘူၭဆၧကခံၭလၩ့ယူၭလီၫဘိၭ ထီးမွဲအဝ့ၫထီၩ့လၧ စၩ့ထံၭခၪ့ထံၭမၬ ဒၪဖျုၩလၩ့ဆဲၩအၥၭ လၧစၩ့ထံၭလီၩ့နီၪလီၫႉ အမနံၬဖိၪ လၧအဂဲၫထဲၩ့အၪ့ဂူၪန့ထၭနီၪဆ့ အီၪလၧအဂံၪ့ဎံၪလၩ စၩ့ထံၭဖၧၩ့နီၪလၧၩ့အ့ၬႉ အခၫနီၪ ဖီၫမံၩ့ဘွၩဖိၪနီၪ ဒၪဎီၩ့လိၬၥၭလၧ အတဝၫ့ဖိၪၥံၪ အမိအဖါၥံၪ လၧအဂဲၫလီၩ့ဎွါထဲၩ့အဝ့ၫယူၭႉ တၭအဝ့ၫထဲၩ့ထီၩ့ထဲၩ့ လၧၦအၥွံၪအယၪလမံၩ့ဎး ၦၡၩၥံၪလဖၪအကျၩယူၭလီၫႉ

အ့ၪမွဲဖူၫထၪ့ၦၡၩနီၪဘိၭ အၥၭကဘၪထံၭဎွ့ပၥ့ၪလဲၪႉ လၧခဲၫ့ထုၬ လၩ့ယၫ့ၥၭဝ့ၫအၪမၬ ဖူၫထၪ့ယီၩ ဘၪထိးမၩၥံၫအၥၭနီၪလီၫႉ