ၦဖျိၩ့ၡါဖိၪ နးမံၩ့ဖီၫဝီၩ - ၄

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ ထီၩ့လၧ နးမံၩ့ဖီၫဝီၩအမိယါလဂၩ ကိၪ့ထၪ့ဝ့ၫလၧ ကမိအၪ့ အဝ့ၫအမိမိ အယၪယူၭလီၫ မွဲအ့ၬဧၪႉ

လၧခဲၫ့ ၦမုၪမဲၫယီၩ ကိၭအဝၩဒဲ အဖိၪမုၪနံၫဂၩဂီၩ့ လ့ၩလၧ နးမံၩ့ဖီၫဝီၩအမိမိချံၭအီၪအလး ထံၫနဲၩ့နီၪလီၫႉ နးမံၩ့ဖီၫဝီၩအမိမိချံၭနးဆ့ အီၪလၧထံၫဖၫ့လၬအိၩ ၥ့ၪယၫဝ့ၫလမွဲဘၪ အဖိၪမုၪတၭ မွဲလဂဲၫထဲၩ့ထၪ့ဘၪလၧခီၫ့နီၪလီၫႉ ထီးနီၪ ထဲၩ့ကိၭဆီၪ့ကိၭနီၩ့န့ နးမံၩ့ဖီၫဝီၩဂီၩ့ အၪ့မၧၫ့ဝ့ၫဒၪ ဂဲၫကိၭထၪ့အမိမိလၧ ခီၫ့နီၪလီၫႉ လါနၫ့ နးမံၩ့ဖီၫဝီၩဝ့ၫ ခဲၫ့ကံၭအမိမိကဘၪ ထိးမၩၥံၫတၭ မွဲလဂဲၫဘၪနီၪလီၫႉ အဝ့ၫမွဲလ့ၩဘိၭ အဖါဖါႇ အမိယါဒဲ အမိယါအဖိၪမုၪနံၫဂၩနီၪ ဒိၪအဝ့ၫလၧဆၧအဆူၪ ထီးအခၭ စွါဘဲၫႉ နးမံၩ့ဖီၫဝီၩလဂၩ ဆၫထီးထိးဝ့ၫလန့ဘၪနးဆ့ ထိးခ့ၬအ့ၪအမိမိအဂးနီၪလီၫႉ ထိးဝ့ၫလန့လၧၩ့ဘၪအလးခဲၫ့ လ့ၩဂၪ့လၧအမိမိအီၪနီၪလီၫႉ ထီးနီၪ အမိမိလဂၩ ဘၪနီၫလဲၪ အဖိၪမုၪဘၪဂၪ့နီၪ ဂဲၫထၪ့ယိဝ့ၫနီၪလီၫႉ

ကထုၪ့ဎး လၧဆၧလယိလါဘၪအဖၧၩ့ အမိယါနီၪ ဆ့ၭအဝ့ၫအမိမိချံၭနီၪလၧ ဖၩ့ဂီၩ့ ကထဲၩ့န့ဝ့ၫလၧဂံၪ့လီၫႉ အၥုၪ့ဂ့ၩၥၭဘွၩလအီၪဘၪနးဆံၭ ၦမုၪမဲၫယီၩ ချံၭနီၪ ထံၭလၩ့ဝ့ၫလၧ နဲၩ့ဖၧၩ့ဂီၩ့ အၪ့မၧၫ့ နးမံၩ့ဖီၫဝီၩ ထဲၩ့ယိၬနီၪလီၫႉ အဝ့ၫထဲၩ့လၧဖၧၩ့ၥၭအထီ အမိမိချံၭ မၪလူၬထးအဝ့ၫ ဖိၪမုၪဧ့ ၦၡၩအ့ၪမွဲအၪ့ယယၪ နၧၩထီးအၪ့လဂ့ၩအီႉ ၦၡၩအၪ့ယယၪဂီၩ့ အီၪထးအဎွံၪလဖၪနီၪ စူၭကီၪ့ထၪ့ဂီၩ့ လ့ၩအီၪက့ၪထၬလၧ ဂံၪ့နဲၩ့ထံၭအိၩနီၪလီၫႉ အဝ့ၫထဲၩ့ထီၩ့လၧဂံၪ့အခၫ အမိယါနီၪ အၪ့မၧၫ့နးမံၩ့ဖီၫဝီၩ ချံၭမိဎွါနီၪ ထံၭလၩ့လၧ ဖၧၩ့မ့ၩဖၧၩ့ဂီၩ့ အၪ့ဎွံထၪ့ဘဲၫယီၩ နီၪလီၫႉ လၩ့ယၫ့ၥၭဝ့ၫဒၪ နးမံၩ့ဖီၫဝီၩလဂၩ အ့ၪမွဲဆ့ၭထၪ့မ့ၪဆီၪ့အခၫ အမိမိလီၩစိၩအလူဆံၭခိၬဖိၪ ခိထဲနီၪ ဖိၪမုၪဧ့ တၭ ဖိၪမုၪယီၩ မၩလၩ့ဖုၬထဲၩ့မ့ၪ အ့ၪမွဲထံၫချံၪ့လၩ့အခၫ လီၩစိၩအဖိၪမုၪ ချံၪ့ထဲနီၪ ဖိၪမုၪဧ့တၭ အဝ့ၫမၩဆီၪ့ထၪ့ထဲၩ့မ့ၪနီၪလီၫႉ နးမံၩ့ဖီၫဝီၩလဂၩ အမ့ၪနီၪ မၩဆီၪ့ထၪ့ဝ့ၫကထံၪထံၪ မၩလၩ့ဖံၭဝ့ၫကထံၪထံၪတၭ ထံၫချၪ့နီၪ ခိထၪ့နးကၠၪလၧၩ့အ့ၬႉ လၧခဲၫအမိယါၥၭထၪ့ ဂဲၫဆ့ၭအၪထၪ့ၥံၪ့မုဂီၩ့ မၩဆီၪ့ထၪ့မ့ၪဂ့ၩဘၪစဲၪ့အခၫ အမိမိချံၭကိၭစိၩ ဖိၪမုၪဧ့ ခိအၪမၬယူၭအခၫ အမိယါနီၪ စံၭဆၧၫ့ထဲၩ့ ခိဧၪချံၪ့ဧၪယၥ့ၪယၫအ့ၬ စံၭဝ့ၫဘနီၪဂီၩ့ ဒံၩ့မၩဆီၪ့ထၪ့မ့ၪဒီၭတၭ နးမံၩ့ဖီၫဝီၩအမိမိချံၭ အၥၭဘၪၥံၫခွံၬဝ့ၫနီၪလီၫႉ

လၧခဲၫ့ ချံၭအယၪယီၩမံၫ့အခၫ နးမံၩ့ဖီၫဝီၩ အဖါဖါႇ အမိယါဒဲ အဖိၪမုၪနံၫဂၩ အၪ့ကၠၭဝ့ၫဒၪနီၪလီၫႉ အဝ့ၫၥံၪ ကိၭအၪ့ နးမံၩ့ဖီၫဝီၩလါနၫ့ မွဲအဝ့ၫအၪ့အ့ၬဘိၭ အမိယါစံၭ နလအၪ့ဘၪမငါ လူၬၡၩခီၫဒံၭ နီၪလီၫႉ နးမံၩ့ဖီၫဝီၩနးဆ့ ဘဲၫအဝ့ၫအမိမိ မၪလူၬထၬအဝ့ၫအၥိၭ ၦၡၩအၪ့ဂီၩ့လူၬအခၫ လီၩ့စူၭကီၪ့ထၪ့အမိမိအဎွံၪၥံၪလဖၪနီၪဂီၩ့ လ့ၩအီၪက့ၪထၬဝ့ၫလၧ အဂံၪ့နဲၩ့ထံၭနီၪလီၫႉ လယံၬလမီဘၪအထီ နးမံၩ့ဖီၫဝီၩအမိမိအဎွံၪအလးနီၪ ဂဲၫကဲၪထၪ့ ဖီၫစ့ၩကထံၭ ဖီၫထီၫ့ကထံၭနီၪလီၫႉ ကနံၩနီၪတၭ စဎွၩဒိၪလဂၩ အၪ့မၧၫ့အထံၫဖိၪခးဆါၥံၪ ဂဲၫထ့ၭ ဖီၫနံၫထံၭယီၩနီၪလီၫႉ ၦလၧအထ့ၬဖီၫယီၩန့နီၪ အ့ၪမွဲအမုၪစွါဘဲၫ ကဒုၭကဲၪဝ့ၫအဒဲၪဒဲ အ့ၪမွဲအခွၫစွါဘဲၫ ကဒုၭကဲၪဝ့ၫဒၪ အမၬအကၠီၩ့ ခွံၬလၩ့အလူဘဲၫယီၩၥိၭနီၪလီၫႉ

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ ၦၡါဖိၪယီၩကဆုးကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ