၁၉၆၆-၁၉၇၀ ၥံၪ့လၪၥုၭဆူၭဆဲၫ

ထၧၫ့ဖုဖျိၩ့ဖိၪၥံၪအအီၪလၧ ထံၫထၪကျိၩ့လဖၪ ၥံၪ့လၪၥုၭဆူၭဆဲၫ နီၪမွဲပကနါဂၧၫ့ယံၫယါကိၭဂၩဒ့ၭတၭ ဆၧအဂဲးယီၩ အီၪဂဲၫကဲၪထၪ့ဘဲၫၥ့ၪလဲၪနီၪ ယဖီထၬဘၪလၧ ၦဖျိၩ့ဆၨၩဖးဖီၩ့လံၬစီၩ့ဖၧၩ့ယီၩ ပမိအၪ့နၩ့လီၩဖ့ၪနဲၪဘၪနၥံၪကဆံၭကခ့ၭဖိၪနီၪလီၫႉ

မၠီၩ့မၠၭဝံးဒီၪ့ ၥံၪ့လၪတဝၫ့နီၪ ခိၪလီၩ့ထိၩ့ချိၬ ၥံၪ့ဝၪလဖၪအီၪအၪဒ့ၭတၭ အဆၧၫ့ထီၩ့စိၩဝ့ၫလၧ ဝံးငပုတီၩနီၪလီၫႉ ၥံၪ့လၪနီၪ မွဲဖျိၩ့တဝၫ့ (၁၁) တဝၫ့စူၭကီၪ့ထၬအၥၭ ထံၫထၪကျိၩ့ခိၪလီၩ့လးကျဲၩ့နီၪလီၫႉ ဖျိၩ့ဘုၭဒၭဒဲ ကဲၭၥလံၬဎရံၬဖိၪလဖၪ ၦဖျိၩ့ၡိဖိၪၥံၪအီၪအအၪထုၬမွဲဝ့ၫ ၥံၪ့လၪနီၪ မွဲလၧခိၪလီၩ့လးကျဲၩ့တၭ ဂဲၫကဲၪထၪ့ KNDO ၦဖျိၩ့ၥုၭဖီၪ့ထၪ့စူၪဝဲၩလဖၪ အီၪအလးအကျဲၩ့နီၪလီၫႉ ၥံၪ့လၪနီၪ ကထူၭထၪ့စူၪဝဲၩအဂး ဆၧမၩဒူၭႇ ဝံးတခိၩ ပဒိၪအလၫ့ခွ့ၩလူအလး ဂဲၫထဲၩ့န့ဝ့ၫစဲၭလဖၪ ကမၩထၪ့လၫ့ခွ့ၩလူဒူၭအဂး KNDO ၥံၪဖီၪ့ထၪ့ဖံၭထၪ့နီၪလီၫႉ ပထံၫထၪကျိၩ့လးကျဲၩ့ယီၩ မၠီၩ့မၠၭၥံၪ့လၪဒဲ ဒိၩပၥံၪ့ အီၪထးလးကျဲၩ့ လဖၪနီၪ မွဲဖၬဒၩလးဆံၬလးအကၠီၩ့တၭ ၦဖျိၩ့ဆၧပိၩ့ထၪ့ဆၧလဖၪ ကဘၪအီၪဂူၪအၥၭ ဆၧကၪဆၧဂဲၩအီၪဝ့ၫဒၪ အလးလီၫႉ

နံၪ့ ၁၉၇၀ ဆၧဆၧၩ့ခၫ ၦမၩဆံၬဖိၪၥံၪဆံၭအခံၫ့နီၪ ပဒိၪအၥုၭလဖၪန့ထၬဘၪဆၧပရၧၫ့လၧ ၥံၪ့လၪတဝၫ့နီၪ KNUခးရ့ၫခရၧၫ့မၩထၪ့ ဆၧအီၪကီၪ့အကၠီၩ့နီၪလီၫႉ KNU နးဆ့ ဆၧဆၧၩ့ခၫ လၩ June အထီနီၪ အီၪပထုၬယံၫယါၥုၭဆူၭဆဲၫအကၠီၩ့ ဒီၩ့ဝိၩအၥုၭၥံၪကဒုၭထၪ့အဝ့ၫၥံၪနီၪ မွဲလစီၪထၬဘၪဝ့ၫလီၫႉ လၧၥုၭဆူၭဆဲၫယီၩအထီ ၥံၪ့လၪတဝၫ့ဖိၪၥံၪလဖၪနီၪ ခံၫ့ကံၭဝ့ၫကဘၪထဲး အကၠီၩ့ အၪ့မၧၫ့ဝ့ၫလ့ၩဎဲၪ့ထၬ မုနံၫနွ့ၫနီၪလီၫႉ အဝ့ၫၥံၪဝၩ့ဖီၩ့ထၬၥံၪ့လၪ ထၧၫ့တဝၫ့ယၫလီၫႉ ဒီၩ့ဝိၩအထံၫၥုၭလဖၪၥံၪနးဆ့ ဝၩ့ဖီၪ့ထၬၥံၪလၪထီးဒီၪ့ယၫလီၫႉ အဝ့ၫၥံၪခိၬထ့ၭထၬဖျိၩ့ၥံၪ ခီၫၥွံၪခိၪ ထံၫကျၩ ထီးအလူၬလီၫႉ အထီနီၪ ၦခမျၧးၥံၪလၧအအီၪၥံၪ့လၪလဖၪ ကိၭဝ့ၫလၧ ခမျၧးၥုၭ (ပြည်သူ့စစ်) ဂီၩ့ဘၪဒူၭဆၧၩ့ ဒီၩ့ဝိၩအၥုၭၥံၪနီၪလီၫႉ ဆၧဒုၭၥုၭကဲၪ့ထၪ့အထီနီၪ ဆၧမၩလိၪလးဝဲထၪ့နးဆ့ မွဲလဖၭဘံၭဘၪဆၧမၩလိၪလးနီၪလီၫႉ အထီနီၪ ၦလၧအီၪ ၥံၪ့လၪဝၩ့ဒီၪ့ဒိၪ ဖျိၩ့ၡိၥံၪလဖၪ ကိၭၦဖျိၩ့ၥုၭၥံၪလၧ ၡိၬကျၩ မွဲဂ့ၩ ဆၧခံၭကျၩ ၥံၪနီၪလီၫႉ

ၥံၪ့လၪဆၧဒုၭၥုၭနီၪ ပဒိၪၥံၪလဖၪ ကိၭစူၭကီၪ့ၦခမျၧးဖိၪၥံၪလၧ ခမျၧးၥုၭဂီၩ့ ဒုၭထၪ့မၩၥံၫခွံၬ KNDO ၦဖျိၩ့ၥုၭၥံၪနီၪလီၫႉ အီၪလၧမၠီၩ့မၠၭခးရ့ၫ လၭပိၭတၫဝံးဒီၪ့အဖၧၩ့ KNDO ၦဖျိၩ့ၥုၭၥံၪလဖၪ ခိၬထ့ၬဝၩ့ဖီၩ့ဒုၭမၩၥံၫဝ့ၫလၧ ခမျၧးၥုၭ (ပြည်သူ့စစ်) အဂၩ ကထီၫ့ဘျဲၪနီၪလီၫႉ  ၥံၪ့လၪဆၧဒုၭၥုၭနီၪ KNU ၥုၭခိၪကွဲၪကီၭဒဲ အခရၧၫ့လဖၪ ဘၪထိးမၩၥံၫအၥၭထီးအလူၬလီၫႉ လနၩ့နၩ့နီၪဘိၭ ဘၪခွံၬလၩ့စူၪဝဲၩနီၪလီၫႉ ဘဲၫနီၪအၥိၭ ၁၉၆၆-၁၉၇၀အထီ ကဲၪထၪ့ဝ့ၫလၧ ထံၫထၪကျိၩ့ ပဒိၪဒဲ KNDO ၦဖျိၩ့ၥုၭလဖၪ အဆၧထၫ့ဒၩနီၪ KNDOၦဖျိၩ့ၥုၭလဖၪ ဘၪဆူၭခဲၫ့ထဲၩ့ဒဲ ဆၧဒုၭၥုၭယီၩ ဘၪအီၪပထုၬထးဝ့ၫထယီၩလီၫနီၪလီၫႉ