ၦဖျိၩ့ၥုၭခိၪဒိၪ စီၩဘိၫမၠၭ

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ ၦကဲၪဖျိၩ့ဖိၪလဂၩ ၦဖျိၩ့ၥုၭခိၪဒိၪ စီၩဘိၫမၠၭယီၩ ၦလၧလၥ့ၪယၪဘၪ ယစီၪကအီၪၡၩၡၩဖိၪလီၫနဲၪႉ စီၩဘိၫမၠၭယီၩ မွဲဝ့ၫ ၦဖျိၩ့ဆၨၩဆၧပိၩ့ထၪ့ ခိၪနါဒိၪလဂၩဂီၩ့ ဘၪအၪ့န့ထၪ့မူၩဒၩလၧ ၥုၭခိၪဒိၪအလးနီၪလီၫႉ အဝ့ၫယီၩမွဲဆ့ စီၩနဲၪဒၩမၠၭ အဖါဖါၥၭဘီၩ့နီၪလီၫႉ

ၦဖျိၩ့ၥုၭခိၪဒိၪ စီၩဘိၫမၠၭယီၩ အီၪဖျဲၪဝ့ၫဒၪလၧ ဖၫပိၫခးရ့ၫ ကၠီးကၠံၩဝံးဒီၪ့ ထံၫမုၪခံၩ တဝၫ့ အဖါဖါၥၭဘီၩ့ စီၩဂဲ ဒဲ အမိမိၥၭဘီၩ့ နီၫဒၩဆဲ လၧ ၁၉၂၇နံၪ့ လၩ ဖ့ၫဖီၫဝၫရံၫ ၂၀ နီၪလီၫႉ အထၧၫ့ဖုဝဲအီၪဝ့ၫ (၁၂) ဂၩအဖၧၩ့ အဝ့ၫမွဲဝ့ၫ ဖိၪ (၁၀) ဂၩလဂၩ ဖိၪခွၫနီၪလီၫႉ

၁၉၆၂နံၪ့ လၩ နိၫဝ့ၫဘၫနီၪ ထၪ့အီၪဎုၬမုၬလၧ ဆရၫမုၪ နီၫလၩဖိၩဒဲ အဖိၪအီၪဝ့ၫ (၇)ဂၩနီၪလီၫႉ

စၭထၪ့လၧ ၦဖျိၩ့ဆၧပိၩ့ထၪ့ဆၧအခံၫ့နီၪ ပၫဝ့ၫဒၪ ၥုၭခိၪဒိၪစီၩဘိၫမၠၠၭယီၩ ဖီၪ့ထၪ့စူၪဝဲၩ ဒုၭထၪ့ဆၧ လၩ့ဘုၭထၪ့ အနံၪ့ (၅၇)နံၪ့နီၪလီၫႉ နံၪ့ ၁၉၇၆နံၪ့ ထီးထီၩ့စိၩ နံၪ့ ၂၀၀၀နီၪ ဘၪအၪ့န့ထၪ့မူၩဒၩလၧ က့ၫအၪ့ယူၫၦဖျိၩ့ဆၨၩခရၧၫ့ ခိၪနါဒိၪအထီနီၪ ဘၪအၪ့န့ထၪ့ဒံၭမူၩဒၩလၧ က့ၫအၪ့ယူၫ ၥုၭပၧၩ့ၥိၫ့ခိၪအလးဒံၭ နီၪလီၫႉ

နံၪ့ ၂၀၀၀ နီၪ ဆၧမၩလၩမၩဖၩ့ၡီၩ့ထၪ့ ၁၂ ဘျၩ့လဘျၩ့ က့ၫအၪ့ယူၫ ပၫတံၫ ကိၫဂရဲၭ နီၪ အဝ့ၫ ဘၪထိးရွံ့ထၪ့အၥၭလၧ နံၫဂၩလဂၩခိၪနါဒိၪဒဲ ဆၧပဒၩ့ထၬဆၧအနိၫ့ခိၪနါဒိၪအလး နီၪလီၫႉ

ၦဖျိၩ့ဆၧပိၩ့ထၪ့ဆၧ ခိၪနါဒိၪ ၥုၭခိၪဒိၪ စီၩဘိၫမၠၭယီၩ နံၪ့ ၂၀၀၆နံၪ့ လၩ ဒံၫဇ့ၫဘၫ ၂၄ၥၫ့ လဂီၩနံၫနၩရံၫအခံၫ့နီၪ မံၫမၫထဲၩ့လၧ ဎရံၬ လၧဝံးမဲဆီး ဖၫဝီ ပုၭကလံကၭ ဆၧဆၫဂံၪ့နီၪလီၫႉ ၥုၭခိၪဒိၪ စီၩဘိၫမၠၭယီၩ ဘၪအီၪက့ၪထး အဂံၪ့ဒီၪ့ဖိၪၥံၪအခံၫ့နီၪ အၥၭအီၪဝ့ၫ ၇၉ နံၪ့နီၪလီၫႉ