ၦဖျိၩ့ၡါဖိၪ နးမံၩ့ဖီၫဝီၩ - ၃

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ ထီၩ့လၧ နးမံၩ့ဖီၫဝီၩလဂၩ ဘၪအီၪလၧအမိယါအဆၧမၩနၧၩ့မၩစၪအဖၧၩ့ အမိမိဖ့ၪလၫ့စိၩအ့ၪဆၧလဖၪနီၪ အမိယါအၪ့န့ခွံၬထီးအလူၬနီၪလီၫႉ

          ထၧၫ့ဖုဝဲမုၪခွၫၥံၪဧ့ နးမံၩ့ဖီၫဝီၩလဂၩ ခီၫလၧအဆံၭဆံၭအိၩ အဆၧဘိၪ့ဂ့ၩနးကၠၪအ့ၬနီၪလီၫႉ အဝ့ၫလ့ၩဂၪ့လၧ အမိမိအီၪကိၭကၠၪဒ့ၭလီၫႉ အဝ့ၫလၩ့မါယံၫယါကိၭကၠၪဒ့ၭဘိၭ မလ့ၩခလဲၪ ပမၩမနီၫလဲၪ အမိယါ ၦမုၪမဲၫနီၪ ကမိၥ့ၪယၫ အၪ့မၧၫ့အဖိၪမုၪနံၫဂၩနီၪ လ့ၩလီၩ့ယိဂူၪလၧ အဝ့ၫအလးခဲၫ့နီၪလီၫႉ ကနံၩနီၪ ၦမုၪမဲၫအဖိၪမုၪနံၫဂၩ ဂဲၫထဲၩ့လီၩအ့ၪအမိ နးမံၩ့ဖီၫဝီၩလ့ၩယံၫယါအလးနီၪလီၫႉ ထီးနီၪ အမိယါ ၦမုၪမဲၫလဂၩ ကိၪ့တဲၩ့ထၪ့ဝ့ၫလၧ ကမိမၩၥံၫ နးမံၩ့ဖီၫဝီၩအမိမိချံၭမိဎွါနီၪလီၫႉ ကနံၩနီၪတၭ ၦမုၪမဲၫနီၪ ဆၧၫ့နၩ့စိၩ မ့ၪအၧၩ့ဂီၩ့ အၪ့မိၩထၬ ဆၫ့ဒံၪကဖျိၪ့ဂီၩ့ စံၭအဝၩ ယဝၩဧ့ ယခၪလၬယီၩ အဖံၪထၪ့ ဆၫနၬမၬလီၫ ယခၪလၬယီၩ အဖံၫထၪ့ ယကၥံၫလီၫဧၪၥ့ၪယၫအ့ၬ မယဘၪမနီၫလဲၪနီၪ လ့ၩအၪ့စၪ့အ့ၪယၧၩလၧ ပအၪ့ဖၩ့ဆၧ ဆရၫအီၪနးထံၪဘီၪႉ အဝၩ နးဆ့ အမၫမွဲအီၪမုၬအ့ၬဘိၭ ဘဲၫအမၫ အၪ့မၧၫ့အဝ့ၫအၥိၭ လ့ၩအၪ့ဖၩ့ဝ့ၫလၧ ဆရၫအီၪနီၪလီၫႉ

          ကထုၪ့ဎး ဆရၫနီၪစံၭဆၧၫ့ထဲၩ့ နမၫနီၪ ဘၪနးမံၩ့အ့ၬတၭ ဘဲၫပအၪ့ဖၩ့ဆရၫလီၩအၥိၭ ဂဲၫထဲၩ့လီၩနဲၪအ့ၪ အမၫနီၪလီၫႉ ၦမုၪမဲၪနီၪ ၥၭထၪ့ စံၭအဝၩ ယဘၪထိးထဲယကၥံၫဆ့လီၫ ဘၪနးမံၩ့အ့ၬကအီၪဧၪႉ လၧခဲၫ့ အၪ့မၧၫ့ဒီၭ နးမံၩ့ဖီၫဝီၩ လ့ၩအၪ့ဖၩ့ဒီၭလၧ ဆရၫအီၪ ကဘျၩ့ဒီၭနီၪလီၫႉနးမံၩ့ဖီၫဝီၩ့နးဆ့ ဘဲၫအမိယါအၪ့မၧၫ့အၥိၭ လ့ၩလၧဆရၫအီၪလီၫႉ လၧခဲၫ့ ဆရၫနီၪ ၥ့ၪယၫ နးမံၩ့ဖီၫဝီၩအမိယါအဆၧကိၪ့ဆၧတဲၩ့ဘိၭ စံၭဝ့ၫ နဖါဂဲၫဂီၩ့ကဘျၩ့ယူၭ လါနၫ့ ယလီၩအ့ၪနးမံၩ့အ့ၬ ဘၪနီၫလဲၪစွါဘဲၫ နမိယါနီၪ ကမိအၪ့ နမိမိချံၭအယၪနီၪ ကျဲၩ့မၩအီၪမုၬအၥၭအ့ၬ အဝ့ၫဘၪနးမံၩ့အ့ၬ လါနၫ့ ထဲၩ့လီၩနးမံၩ့လဂ့ၩ နးမံၩ့ဖီၫဝီၩလဂၩ ဘဲၫဆရၫမၪလူၬထၬအဝ့ၫအၥိၭ ဂဲၫထဲၩ့လီၩအ့ၪအမိယါဘဲၫအဝ့ၫအဖါလီၩအၥိၭ ဆၧဆၫအီၪနးမံၩ့အ့ၬအကၠီၩ့နီၪလီၫႉ ကထုၪ့ဎး အမိယါယီၩ အၥၭထၪ့ ယဘၪထိးထဲဆၧဆၫ ဖိၭဘယီၩ ဘၪနးမံၩ့အ့ၬကအီၪဧၪ ပၥိၩ့ၥ့ၪနးမံၩ့အ့ၬ စမုၪယီၩႉ လၧခဲၫ့ထုၬ ဖျါလၩ့စိၩထဲၩ့ အဖိၪမုၪနံၫဂၩနီၪလီၫႉ ဖိၪမုၪၥံၪဧ့ႇ ကျဲၩ့လ့ၩလၧ ပအၪ့ဖၩ့ဆရၫအီၪဂီၩ့ လၧၦၡၩၥံၪအမ့ၬယၫ ဂဲၫထဲၩ့လီၩဘယီၩ ၥီၪ့ၥၫ့ထၬအဖိၪမုၪ နံၫဂၩနီၪလီၫႉ ဖိၪမုၪနံၫဂၩယီၩ ဂဲၫထဲၩ့ထီၩ့လၧ ဂံၪ့အခၫ ဘဲၫအမိမၪလူၬထၬအဝ့ၫအၥိၭ လီၩအ့ၪၦၡၩ ပမိမိအီၪလမုၬဘၪနီၪ ပအၪ့ဖၩ့ဆၧ ဆရၫလီၩအ့ၪပၧၩ ကဘၪအၪ့ နးမံၩ့ဖီၫဝီၩအမိမိကဲၪထၪ့ချံၭနီၪအယၪမၬ ကဘျၪနီၪလီၫႉ အထီနီၪ ၦမုၪမဲၫ အၥၭကဲၪလဂၩ အဲၪ့ထ့ဖၭခွံၬ အၪ့မိၩထၬဆၫ့ဒံၪနီၪဂီၩ့ အၪ့ယုလၩ့ဝ့ၫဒၪလီၫႉ ဂီၩ့နီၪ ၦမုၪမဲၫနီၪ စံၭဆၧ ကကၠၪယီၩနီၪ လၩ့ဆၫ့ ႇ ယဘၪအၪ့မၧၫ့ဒၪ ယဖိၪမုၪၥံၪမၬဆံၭ ယဂဲၫအီၪဘၪလၫ့ထဲၩ့ကဆံၭနီၪလီၫႉ

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ လၩ့ယၪ့ၥၭဝ့ၫဒၪ နးမံၩ့ဖီၫဝီၩလဂၩ အမိယါနးၥၭကဲၪယီၩ ကမိအၪ့ဒီၭ အဝ့ၫအမိမိအယၪဒီၭတၭ  နးမံၩ့ဖီၫဝီၩလဂၩ ကပဒၩ့ထၬအမိမိကန့ဧၪ အၥၭကဘၪထံၭဎွ့ပၥ့ၪလဲၪ ၦၡါဖိၪယီၩ ကဆုးကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ