ၦဖျိၩ့အဆၧးဎံၫဆၧးလၩ အခၪ့ထံၭခၪ့ဎၧၩ့လဖၪ (၁)

ကမွဲဒၪ ဆၨၩနးဆၨၩနီၪ အီၪဒၪလၧ အဆၧဆၧးဎံၫဆၧးလၩလီၫ မွဲအ့ၬဧၪႉ ဆၨၩကဆၨၩအဆၧဆၧးဎံၫဆၧး လၩနီၪ မွဲဆၨၩလဆၨၩယီၩ အဆၧလူ့ဒိၪဎွ့ၩဒိၪနီၪလီၫႉ ဘဲၫနီၪအၥိၭ ၦဖျိၩ့ဆၨၩဖိၪၥံၪလဖၪနးဆ့ ပကဘၪအီၪက့ၪ လူ့ဒိၪဎွ့ၩဒိၪ ၦဆၧဆၧးဎံၫဆၧးလၩ အီၪဝ့ၫ (၅) မံၩ့နီၪလီၫႉ ဆၧလဖၪၥံၪယီၩနီၪ ဘဲၫထၧၫ့ဖုဝဲဖျိၩ့ဖိၪၥံၪ ၥ့ၪယၫထၬ အၥိၭ မွဲဝ့ၫ (၁)  လံၬလဲ (၂) ပလၨပဆၧချဲၩ့ (၃) ထၩႇ ထၭခိၪဒဲ ဆၧအူၪဆၧဒံၩ့လဖၪ (၄) လုၫလါထူၫရူၫ ဆၧးဎံၫ ဆၧးလၩ ဒဲ (၅)  ပဆၧကီၩ့ဆၧၥိၭ လဖၪနီၪလီၫႉ

          ထၧၫ့ဖုဝဲမုၪခွၫၥံၪဧ့ႇ ဆၧဆၧးဎံၫဆၧးလၩလဖၪယီၩ လၧအလးဒၪဝ့ၫနီၪ မွဲအခိးအတၩအီၪဝ့ၫလၧပဂးႇ လၩ့အဲၪလၩ့ကွံၩဒဲ မွဲဆၧအလူ့ဒိၪဎွ့ၩဒိၪလၧ ပဂးနီၪလီၫႉ မွဲယူၭႇ ပစံၭဝ့ၫၥ့ၪလၧ ဆၧလၧအဆိၬထၪ့ထီၫ ၦလဆၨၩ အဆၧမၧၫ့ဆၧဂဲၩနီၪ မွဲဝ့ၫ လံၬလဲနီၪလီၫႉ လံၬလဲယီၩ အ့ၪလအီၪဘၪမွဲဂ့ၩႇ ၦလဆၨၩနီၪ ချဲၩ့အဆၧချဲၩ့ လၥ့ၪဘၪဒဲ နၪဝ့ၫလၥ့ၪဘၪမွဲဂ့ၩႇ ဘဲၫပဆၨၩဒၪဝ့ၫအလၨအၥိၭ ကွ့ၭလံၬကွ့ၭလဲ လဘၪလၧၩ့ဘၪမွဲဂ့ၩႇ ပလုၫလါထူၫရူၫလဖၪ အီၪလၩ့မါခွံၬမွဲဂ့ၩႇ ပဆၧဆၧးဎံၫဆၧးလၩ ပဆၧကီၩ့ဆၧၥိၭ ပဆၧကယၧၩ့ကယီၩလဖၪ အ့ၪလၩ့မါခွံၬမွဲဂ့ၩႇ ဆၧလဖၪ ၥံၪယီၩ လၧပၥ့ၪယၫလၧၩ့ဘၪအခိးအတၩနီၪ လၧပဂးအလူ့ဒိၪဎွ့ၩဒိၪ မွဲကအီၪလၧၩ့အ့ၬနီၪလီၫႉ

          မွဲဆၧနီၫအကၠီၩ့ ပဆၨၩဒၪဝ့ၫနီၪ ပကဘၪအီၪက့ၪလူ့ဒိၪဎွ့ၩဒိၪဒဲ ဘဲၫၥိၭပကမွဲၦဖျိၩ့လဆၨၩလၧ အဘၪ ခိးဘၪတၩဆၧအဂး ပဘၪၥ့ၪယၫ ပဆၧဆၧးဎံၫဆၧးလၩ (၅) မံၩ့ယီၩ တၡါဒ့ၭနီၪလီၫႉ ပဆၧၥ့ၪယၫ အ့ၪလအီၪဘၪ စွါဘဲၫ ပကကဲၪထၪ့ ၦလၧအလူ့ဒိၪဎွ့ၩဒိၪလအီၪဘၪႇ ၦလၧအဆၧအီၪမၧၫ့အီၪဂဲၩ လဎံၫလလၩဘၪလဂၩနီၪလီၫႉ