ၦဖျိၩ့အခၪ့ထံၭၥၫ့ လၧထံၫဆ့ၭမ့ၬယွၩ

ၦဖျိၩ့အခၪ့ထံၭၥၫ့ လၧထံၫဆ့ၭမ့ၬယွၩ (ကရင်အစ ထီဆေ့မေ့ယွားက)-

ၦကဲၪထၧၫ့ဖုဝဲဖျိၩ့ဖိၪၥံၪလဖၪ ပဂဲၫထီၩ့လၧ ခးပယၩ့ဖၧၩ့ယီၩ အီၪဝ့ၫ အနံၪ့နံၫထီၫ့ဘျဲၪယူၭလါနၫ့ ကဆၫ့ဘၪကဆၫ့ မပကိၪ့ဂဲၫထီၩ့ဘဲၫၥ့ၪလဲၪနီၪ ယဖီထၬဘၪလၧ ၦဖျိၩ့ဖးဖီၩ့လံၬစီၩ့ဖၧၩ့ယီၩ ကဆံၭကခ့ၭဖိၪနီၪ ယမိအၪ့နၩ့လီၩ့ဖ့ၪနဲၪထဲၩ့ဘၪထၧၫ့ဖုဝဲဖျိၩ့ဖိၪၥံၪလီၫႉ

ၦဖျိၩ့လုၫလါထူၫရူၫအဖၧၩ့ ထံၫဆ့ၭမ့ၬယွၩ ၦကိၭဝ့ၫလၧ ပယၩ့ခီၫ သဲမြစ်ပြင်ကျယ်နီၪ ၦဖျိၩ့ဖံၫဖူၫၥၭၡါလဖၪ ဂဲၫထဲၩ့ခၪ့ဂၬဝ့ၫဒၪအကၠီၩ့ ဆၧချဲၩ့ဆိၪအီၪထၬဝဲၩ့နီၪလီၫႉ ၦဖျိၩ့ဆၨၩလဖၪ လၧခးပယၩ့ယီၩ ဂဲၫအီၪၥၫ့အလးနီၪ မွဲလၧ တီၫ့ငူၫလးကျဲၩ့မုထၪ့ကကဲၩ့ခီၫဂီၩ့ လၧနီၪကဆၫ့ အၪလၫ့ထဲၩ့ထီၩ့လၧ ခးပယၩ့အဖၫ့လၬကကဲၩ့ခီၫဒဲ ၥဲၫထံၫခးအကၠီၩ့ ဆၧလီၩ့ဆိၫထၬဆၧအီၪလီၫႉ

ခးပယၩ့ဆၨၩဆၬလဖၪအဂဲး စဲၪ့လၩ့လီၩ့ဎွါအၪ့ဎၬဆၧ ခိၪလၩဘွၩပကိၪ့ၥ့ၪလဂၩ မွဲဝ့ၫ စံၫစံၫလူၩဝံနီၪ ထယၬထၬဝ့ၫဒၪ ၦဖျိၩ့ဆၨၩဆၬအီၪအလးအခၪ့ထံၭခၪ့ဎၧၩ့နီၪ မွဲ တံဘဲ-ပယၩ့ (လမွဲဘၪ)မိၫ-ခမၫ နီၪလီၫႉ

ၦဖျိၩ့ဆၨၩဖိၪၥံၪလဖၪ မွဲၦအအီၪပြံၩပြၩလၧ ခးပယၩ့အဖၫ့လၬကကဲၩ့ခီၫ ဖံၬဒၩလးဒဲ ခိၪလီၩ့ခိၪလးကျဲၩ့လဖၪ ၥဲၫထံၫခးလံၩခံၫကကဲၩ့ခီၫဒဲ လံၩခံၫမုနုၬကကဲၩ့ လးကျဲၩ့လဖၪနီၪလီၫႉ လၧ ခးပယၩ့ဖၧၩ့ယီၩနီၪ ၡၩ့ခိၪလီၩ့မုထၪ့ႇ လံၩထံၭမုထၪ့နီၪ ၥၫ့လွ့ၫထံၫချိၬဂုၬဒၩႇ ၥထိၫ့ခးရ့ၫႇ ကၠဲၭခမံၫခးရ့ၫႇ (ဘဲၫယီၩနီၪ ၦဖျိၩ့ဆၨၩခးဒီၪ့အလး)ဒီနၭခိၪလီၩ့ဒဲ တန့ၩၥၫရံၫခိၪလီၩ့လီးဘီၩ့ႇ လံၩထံၭမုနုၬကကဲၩ့ခီၫ နီၪ ထံၫထၪကျိၩ့ဒဲ ပခိၩလး၀ၩ့လဖၪနီၪလီၫႉ မွဲဆၧဘဲၫနီၪ ခးပယၩ့မုနုၬကကဲၩ့ခီၫဒဲ လံၩခံၫမုနုၬလးကျဲၩ့လဖၪ နီၪ မွဲၦဖျိၩ့ဆၨၩဖိၪၥံၪလအီၪဘၪလီၫႉ

မွဲဆၧဘဲၫနီၪ ၦဖျိၩ့ဆၨၩဖိၪၥံၪ ဂဲၫအီၪထၪ့လၧ ခးပယၩ့အခၪ့ထံၭၥၫ့နီၪ ခးပယၩ့မုထၪ့ ၥၫ့လွ့ၫႇ စ့ၭတီၩ့ထံၫချိၬဂုၬဒၩနီၪလီၫႉ ဘဲၫနီၪအၥိၭ ၦဖျိၩ့ၥံၪနီၪ ယူၫနၫ့လံၩခံၫဆၧဒၩ့ခိၪခၫ့ဖျီၫ့ ဂဲၫဖိၬထုးလၩ့ၥၫ့လွ့ၫထံၫချိၬဂီၩ့ ခးပယၩ့ ၡၩ့ခိၪလီၩ့ဒၩ့ခိၪႇ ကယၩ ဘံၫလူၩခၠီၩ့လးကျဲၩ့ႇ တီၫငူၫႇ ဒီၩနၭခိၪလီၩ့ ပြံၩပြၩအီၪဎံၩ့လၩ့ထီၩ့လၧ တန့ၩလၫရံၫ လံၩထံၭလးကျဲၩ့နီၪလီၫႉ လံၩထံၭမုနုၬကကဲၩ့ခီၫနီၪ ပျ့ၫဝံးဒီၪ့ ခၪ့ဖျီၫ့လၧ ထံၫထၪကျိၩ့လးကျဲၩ့ႇ ထီးထီၩ့ ပခိၩယိၩမၬ မုထၪ့ဒဲမုနုၬကကဲၩ့ခီၫနီၪလီၫႉ လၧ ထၫဝဲၫလးကျဲၩ့နီၪ ၦဖျိၩ့ဆၨၩဖိၪၥံၪလဖၪ အီၪလၧ ခိၪလီၩ့လးကျဲၩ့နီၪလီၫႉ လခဲၫ ပယၩ့ဒဲ ၥဲၫထံၫခးဂဲၫအီၪထၪ့အခၫ ၦဖျိၩ့ဆၨၩဖိၪၥံၪလဖၪနီၪ မွဲၦလၧ အီၪၥၭမၧၫ့ထၪ့လၧ ထံၫခးနံၫခးယီၩ အကျၩနီၪလီၫႉ