ၦဖျိၩ့လံၬလဲဒဲ ၦဖျိၩ့ဆၧကိၪ့ဘၪကိၪ့ၥ့ၪ - ၃

လံၬလဲနီၪမွဲဆၧဆၧကိၪ့ဘၪကိၪ့ၥ့ၪ ဆၧကိၪ့ဘၪကိၪ့ၥ့ၪနီၪ မွဲဝ့ၫလံၬလဲ အီၪမီၪ့ဎီၩ့လီၫနီၪလီၫႉ ကၠၧၫ့ကၠၧၫ့လၧ ဆၧအီၪကီၪ့ကၠီးလဖၪ ၦဖျိၩ့လံၬလဲဒဲ ဆၧကိၪ့ဘၪကိၪ့ၥ့ၪ လ့ၩထၪ့လ့ၩထီၫ့ထၪ့နီၪလီၫႉ ၦဖျိၩ့ဆၧကိၪ့ဘၪကိၪ့ၥ့ၪ ဂဲၫဒိၪထၪ့ထၪ့ထီၫ့အထီနီၪ ဆၧဒုၭၥုၭဖၭဒိၪကဲၪထၪ့နံၫဘျၩ့လဘျၩ့အကၠီၩ့ ထံၫထၪကျိၩ့ခးဒီၪ့လးဝၩ့ဖၧၩ့ မွဲဆၧကၪဆၧဂဲၩ ဂဲၫအီၪထၪ့ဆ့နီၪလီၫႉ မွဲဆၧဘဲၫနီၪအကၠီၩ့ ၦလၧကမၩထၪ့ထီၫ့ ၦဖျိၩ့အထီလၧယၫ စီၩတံၫၥၫ့ပၠၫနီၪ မွဲလအီၪလၧၩ့ဘၪလၧၩ့အတဝၫ့ မွဲဝ့ၫ ဒိၩ့ပၥံၫ့ဝံးဒီၪ့ ကၠိၫ့တၫတဝၫ့အ့ၬဂီၩ့  ၁၈၅၂နံၪ့ အဝ့ၫအၥၭအီၪဝ့ၫ ၁၀နံၪ့အထီ ဂဲၫၥုၭအီၪထဲၩ့လၧ ဒိၩ့ပၥံၫ့ ဆုးမၩလိၪလံၬလၧ အမ့ၫရံၫကၫ့န့ခၠ့ၩဆၧအီၪကီၪ့ ဝဲထၪ့ထၭ ကိၩဆူၫ အကဲၪဒမံၫကၠီးနီၪလီၫႉ နံၪ့ ၁၈၇၁နံၪ့နီၪ စီၩတံၫၥၫ့ပၠၫယီၩ ဆုးလ့ၩမၩလိၪလံၬလၧ ခးအမ့ၫရံၫကၭ န့ဘၪ ဘံၫအ့ၫ ဆၧနဲၪလၩဖၩ့ဂီၩ့ ဆုးထၪ့ထဲၩ့ဝ့ၫ နံၫနံၪ့အခၫ န့ထဲၩ့ဘၪ အၪ့အ့ၫ ဆၧနဲၪ့လၩဖၩ့ ဂီၩ့နီၪ ဆုးန့ထဲၩ့ဘၪ ဒမၭမၫရဂူၫ ဆၧနဲၪလၩဖၩ့နီၪလီၫႉ

            ၦဖျိၩ့ဆၨၩဖိၪၥံၪလဖၪ ဆၧကိၪ့ဘၪကိၪ့ၥ့ၪ လ့ၩထၪ့ထီၫ့ဘဲၫယီၩၥိၭနီၪ မွဲလၧဆၧအီၪကီၪ့ဆရၫလဖၪ ဂဲၫထီၩ့ဝ့ၫဒၪအလးနီၪလီၫႉ အထီနီၪ ခိၪလၩဘွၩလဖၪ ခးပယၩ့လထၬကကဲၩ့ခီၫ မွဲအၪ့န့ဝ့ၫလန့ဒံၭဘၪ ဒဲ  အၪ့န့ထၬဝ့ၫန့မွဲ ခးပယၩ့လၬဒဲ ခးပယၩ့ကျၩနီၪလီၫႉ အထီနီၪ ၦဖျိၩ့ဆၨၩဖိၪၥံၪလဖၪ ဆၧလ့ၩထၪ့လ့ၩထီၫ့အီၪ မွဲလမီၪ့ဎီၩ့ဘၪလၧ စဎွၩအထီဒံၭဒၪအိၩတၭ ၦဖျိၩ့ဆၨၩဖိၪၥံၪလဖၪ ဘၪအီၪလၧ ခိၪလၩဘွၩပၧၩ့အထီဒဲ စဎွၩပၧၩ့အထီနီၪ ဆၧလ့ၩထၪ့လ့ၩထီၫ့ မီၪ့ဎီၩ့ ၥိၪဒဲ ထံၫနီၪလီၫႉ

            ဘဲၫၦဖျိၩ့ဖိၪၥံၪလဖၪ အဆၧကိၪ့ဘၪကိၪ့ၥ့ၪ ဂဲၫဒိၪထၪ့ထီၫ့ထၪ့အၥိၭ ပအီၪလၧခးပယၩ့လၬလဖၪမွဲဝ့ၫ စီၩစၫ့စံၫဖိၩ လ့ၩမၩလိၪဘၪလံၬလၧ ခးဆၧၫ့ႇ ၦလၧအထီးအီၪမွဲဝ့ၫ စီၩဖ့ၫၥၫ ဒဲ စီၩဘၭအူၩကၠံၩၥံၪ လ့ၩမၩလိၪဘၪလံၬလၧ ခးအုရီၩပၭနီၪလီၫႉ ဘဲၫစီၩစၫ့ဖိၩၥ့ၩႇ စီၩဘၭအီၪ့ခၠံၫ့ႇ စီၩစၫ့တ့ၫႇ စီၩထ့ၫလ့ၩမၠၭ ဒဲ စီၩမၠၭၥံၩ့ ၦဖျိၩ့ကိၪ့ၥ့ၪဖိၪၥံၪ ဂဲၫစဲၪ့လၫ့အၥိၭ ၥုၭခိၪ စမ့ဒွိၩ့ႇ ၥုၭခိၪဒိၪ စီၩကၠၫဒိၩႇ ၥုၭခိၪဒိၪ စီၩၡံၩၡိၪၥံၪ ဂဲၫအီၪထၪ့နီၪလီၫႉ ဆၧအယီၩနီၪမွဲ ဆၧကိၪ့ဘၪကိၪ့ၥ့ၪ လ့ၩထၪ့လ့ၩထီၫ့ အချံၫ့အၥၪနီၪလီၫႉ

            အထီနီၪ လၧခိၪလၩဘွၩ အဆၧပၧၩ့ဆၧအဖၫ့လၬ ခးပယၩ့ယီၩ ဆၧမၩလိၪလးအီၪဝ့ၫ ၥၧၫ့မံၩ့မွဲဝ့ၫ ခိၪလၩဘွၩဆၧမၩလိၪလးႇ ခိၪလၩဘွၩဒဲ ပယၩ့ဆၧမၩလိၪလးဒဲ ဆၨၩဒီၪ့ဖိၪၥံၪ ဆၧမၩလိၪလးနီၪလီၫႉ ခိၪလၩဘွၩ ပၧၩ့ဆၧအထီ ဆၧမၩလိၪလး ၥၧၫ့လးယီၩ လၧပမိမၩလိၪအလး ပမၩလိၪန့ ၦဖျိၩ့ဆၨၩဖိၪၥံၪလဖၪနးဆ့ မၩလိၪဘၪလံၬအကၠီၩ့ ဂဲၫကဲၪ့ထၪ့ ထီၦကိၪ့ၥ့ၪလဖၪဂီၩ့ ကဲၪထၪ့ ခၩ့ဒိၪၥံၪ ၦဒိၪအပမၩဆၧဖိၪၥံၪဒိၪဒိၪအၪအၪဒ့ၭ နီၪလီၫႉ လါနၫ့ ၦဖျိၩ့ဖိၪၥံၪလၧ လလ့ၩထၪ့လ့ၩထီၫ့ဒံၭဘၪ အီၪအၪဒံၭနီၪလီၫႉ