ၦဖျိၩ့လံၬလဲဒဲ ၦဖျိၩ့ဆၧကိၪ့ဘၪကိၪ့ၥ့ၪ - ၁

ၦဖျိၩ့ဆၨၩဖိၪၥံၪလဖၪ ဂဲၫထဲၩ့အီၪထၬဝဲၩခီၫလၧ နံၪ့ဆံၫလၩယံၬအိၩ လခဲၫ ဆၧဖိၬလိၬထၪ့ စဎွၩဒိၪထံၫ ခး(ပဒေသရာဇ်နိုင်ငံ)အခၫ ဘၪဂဲၫထဲၩ့ထိးမၩနၧၩ့မၩစၪ ၦဖျိၩ့ဖိၪအၪဒၪဆၧနီၪ ဘၪစဲၪ့အီၪက့ၪၥူၪအၥၭ လၧၡိၬကျၩ လနၩ့နၩ့ မွဲစဲၪ့လၫ့လၧ စဎွၩဒိၪအလးကျဲၩ့နီၪန့ဘိၭ ဘၪကဲၪထးၦမၩဆၧဖိၪလၧနီးဖၧၩ့နီၪလီၫႉ ၦဖျိၩ့ဆၨၩဖိၪၥံၪလဖၪ ယီၩ ဘၪဂဲၫထဲၩ့အီၪၥၭမၧၫ့လၧ ဆၧမၩနၧၩ့မၩစၪအကျၩအကၠီၩ့ ပလံၬလဲဒဲ ပဆၧဆၧးဎံၫဆၧးလၩ လဖၪ လၩ့ဘူၭ ကလၩ့မါလီၫႉ ဖံၫဖူၫၥံၪလၧဖျိၩ့ဖျိၩ့အိၩ လီၩယံၫယါဝ့ၫ လံၬဆၫ့ဝ့ၬလံၬလဲနီၪ ပနါဂၧၫ့ယံၫယါဒၪမအမံၩ့လီၫႉ လါနၫ့ ၦဖျိၩ့ဆၨၩဖိၪၥံၪလဖၪ ပလုၫလါထူၫရူၫလလၩ့မါဘၪအဂး လၩ့ဆၫ့ဝ့ၫဒၪ ပဒၪဘၪ ထၩႇ ဆၧၥၭအွံၪ ဒဲ ၡါလဖၪ ဂဲၫထဲၩ့ဆုးဖီၪ့ဂုးခၧၫ့ထၬဝ့ၫဒၪလၧ နံၪ့ဆံၫလၩယံၬအဖၧၩ့နီၪလီၫႉ

            ၦဖျိၩ့ဆၨၩဖိၪၥံၪလဖၪ ဘၪဂဲၫထဲၩ့အီၪဘဲၫယီၩၥိၭအကၠီၩ့ ၦဖျိၩ့ဆၨၩဆၧကိၪ့ဘၪကိၪ့ၥ့ၪနးဆ့ ထီးကဆၫ့ဘၪ ကဆၫ့ ဆၧလ့ၩထၪ့လ့ၩထီၫ့လအီၪဘၪဒဲ စဎွၩဒိၪအထီနီၪ မွဲၦဖျိၩ့ဆၨၩၥံၪလဖၪအဆၧၥၭမၧၫ့ ဆၧအၪ့လဲၩ့ထၪ့အၥၭ အီၪနးမံၩ့အ့ၬႉ

            ၦလၧဖီၪ့ထၪ့ဖံၭထၪ့ ဆၧအီၪကီၪ့ဆၧမၩ အမ့ၫရံၫကၫ့န့ခၠ့ၩဆရၫမွဲဝ့ၫ ဆရၫ ယုဒၥၫ့နီၪ ဂဲၫထီၩ့လၧ ခးပယၩ့ ဝံးတခိၩ့လၧ ၁၈၁၃နံၪ့ လၩ ဇူၫလဲၫ့ ၁၃ၥၫ့နီၪလီၫႉ နံၪ့ ၁၈၂၄နံၪ့ ထီးထီၩ့စိၩ ၂၆နံၪ့နီၪ ခိၪလၩဘွၩဒဲ ပယၩ့ အဆိၪထုၬလဘျၩ့ ဆၧဒူၭၥုၭဖၭဒိၪကဲၪထၪ့ဝ့ၫဒၪလီၫႉ ၁၈၂၆နံၪ့ ခိၪလၩဘွၩဒဲ ပယၩ့ဆၧဒူၭၥုၭဖၭဒိၪကဲၪထၪ့ဂီၩ့အထီ လၧကၠဲၭခမံၫနီၪ ဆရၫယုဒၥၫ့အမၫၥၭဘီၩ့ ဝဲထၪ့ ဆၧမၩလိၪလးကလးနီၪလီၫႉ ဆၧမၩလိၪလးယီၩ နံၪ့ ၁၈၂၇နံၪ့နီၪ ဂဲၫထဲၩ့ၥုၭထဲၩ့ဝ့ၫဒၪလၧ ဝံးမီၫလမၠဲၫ့နီၪလီၫႉ နံၪ့ ၁၈၂၉နံၪ့နံၪ့နီၪ ဆုးဝဲထၪ့အၪလၫ့ထဲၩ့ဝ့ၫလၧ ထၫဝဲ ကကၠီး နံၪ့ ၁၈၄၀နီၪ လၧ ၥၫ့တွဲကကၠီးနီၪလီၫႉ ဆၧမၩလိၪလးလဖၪယီၩ ၥီၪ့လိၪဝ့ၫ ကွ့ၭႇ ဖီအဂးနီၪလီၫႉ လခဲၫဆၧမၩလိၪဖိၪ ဂဲၫအၪလၫ့ အၪဒၪဆၧနီၪ မွဲၦဖျိၩ့အတဝၫ့လီၫႉ လခဲၫ ဆၧအီၪကီၪ့ဆရၫမွဲဝ့ၫ ဒီၭတၫ ဂၠိၫနၥၫ့ဝံၭဒဲ ဒီၭတၫ အဲဘရ့ၫတၫ့ၥံၪ ဂဲၫထီၩ့ထဲၩ့ဝ့ၫဒၪလၧ ခးပယၩ့ဖၧၩ့ယီၩနီၪလီၫႉ