ၦဖျိၩ့ဆၨၩလုၫလါ ဘိၪ့အၪ့ဆိၫအဂဲး (၂)

ထၧၫ့ဖုဝဲမုၪခွၫၥံၪဧ့ႇ ဘုၪလဖၪယီၩ ထံၭလၩ့ဝ့ၫလၧ ဖၫ့ဖၧၩ့ဂီၩ့အခၫ လၧဖၫ့ဖၧၩ့ဘုၪလဖၪနီၪ ကစၭထၪ့အၪ့ဝ့ၫ အဂး စၭထၪ့မၩဒီၭ ဖၫ့ဘုၪအၪ့ဆိၫဒီၭနီၪလီၫႉ လၧစၭထၪ့မၩဒံၭဘၪဆၧထံၫလၩ့ဒီၪလၩ့ယီၩနီၪ ဖိၪလံၩၥံၪလဖၪ ကဘၪလ့ၩလီၩ့ဎွါထၬ ဆၧဒိၭဆၧလၪၥံၪ ၥၧၫ့ၥံၪနီၪလီၫႉ ဂီၩ့ အီၪထးလၧဂံၪ့ မိဖါနံၫဂၩနီၪ ထိၬဘၪဒၪဖိၪကဒုၩမွဲဂ့ၩႇ ဆၫ့ ထိၪထၩမွဲဂ့ၩ လခဲၫ့ကနံၩ လဂီၩခီၫ ကအၪ့ဝ့ၫန့အဂး ဘၪဎိၭဒီၪအၪ့ဖီၪ့ထၬဝ့ၫဒၪနီၪလီၫႉ ၦလၧကဲၪမိလဂၩနီၪ ကဘၪလ့ၩလၧ ဖၫ့ဖၧၩ့နီၪဂီၩ့ ဖၫ့အနိၪ့လံနိၪ့နီၪ ပဘၪလီၩ့အၪန့ဝ့ၫ ကစူၪဆုးဆုးနီၪလီၫႉ အလးလၩ့ထီၫ့ထး ဖၫ့အနိၪ့လံနိၪ့ယီၩ ကဘၪအၪ့န့ထဲၩ့ဘုၪလၧ အကျၩနီၪဂီၩ့ ဘၪမၩဎွ့ၩလၫ့ထဲၩ့ဝ့ၫနီၪလီၫႉ ဂီၩ့ ဘုၪလံစူၪနီၪ အၪ့လိၫလၩ့ထၬထဲၩ့ဝ့ၫဒၪနီၪလီၫႉ

          ထီၩ့လၧ မုဂၪလၩ့အခၫ ဖိၪလံၩၥံၪလၧအလ့ၩလီၩ့ဎွါ ဆၧဒိၭဆၧလၪၥံၪႇ ၥၧၫ့ၥံၪလဖၪ ဂဲၫထဲၩ့ထီၩ့ထဲၩ့လၧဂံၪ့ နီၪလီၫႉ ဘၪမၩဝ့ၫလိၫဝ့ၫဒၪ ဆၧဖံၭဆၧမၩလဖၪ မၩကၠၭဝ့ၫမုၬမုၬလၩလၩနီၪလီၫႉ ကနၩနီၪ အၪ့ထံၩ့အၪ့ဖီၫ့ထၬအဂီၩ့ဂီၩ့ ဆၧလၧခံၭဒံၭဘၪနီၪ လီၩ့ကိၭဖံၭၥိၭအဘူၭအထံၭၥံၪလဖၪ ဘဲၫကဂဲၫအၪ့လၩ့ဎိၭအဝ့ၫၥံၪ အဖၫ့ဘုၪအၪ့ဆိၫနီၪလီၫႉ

          လၧခဲၫ့ကနံၩ ဆၧဂဲၫဖၩ့ထၪ့ လဂီၩ့နၭခုၬနီၪ ဂံၪ့ဆါၥံၪလဖၪ ဂၭထၧၫ့လၫ့ကၠၭဂီၩဂီၩဂီၩ့ ဎိၭဒီၪ ဘၩ့လၩ့ ဆၧအၪ့ဆၧအီၩ့လဖၪလၧ ဖၫခွၭဒူၭနီၪလီၫႉ ဖံၫဖူၫဒဲ အဘူၭအထံၭလဖၪ ဂဲၫထီၩ့အခၫ လၧဖၫ့ဘုၪအၪ့ဆိၫ လစၭထၪ့ဒံၭဘၪအထီနီၪ ကၥီၪ့ၥၫ့ဖိၪလံၩၥံၪအဂး လ့ၩကိၭ ၦလၧအၥုၪ့ၥၭဎိၩ ဖူၫဖၭဒိၪနီၪလီၫႉ

          ဖူၫဖၭဒိၪဂဲၫထီၩ့အခၫ လၧဖၫခွၭဒူၭနီၪ ကအၪ့ဖၫ့ဘုၪအၪ့ဆိၫအဂး အဘူၭအထံၭလဖၪထီးအလူၬ အၪ့န့ကၠၭ အလးဆုးဆုးနီၪလီၫႉ ဆၧအၪ့ဆၧအီၩလဖၪယီၩ လအၪ့ဒံၭဘၪဝ့ၫအထီ ဖူၫဖၭဒိၪယီၩ ၥီၪ့ၥၫ့ဖိၪလံၩၥံၪလၧ ထၭခိၪ ဆၧၥၭအွံၪၥံၪဂီၩ့ အၪ့ကၠၭ ဘိၪ့အၪ့ဆိၫယီၩ မုၬမုၬလၩလၩနီၪလီၫႉ