ၦဖျိၩ့ဆၨၩလုၫလါ ဘိၪ့အၪ့ဆိၫအဂဲး (၁)

လၧဖျိၩ့ဖျိၩ့အိၩ ၦဖျိၩ့ၡၩ့အီၪလၧ ခိၪလီၩ့ခိၪလနၩ့နီၪ မၩလၩမၩဖၩ့ယံၫယါ ဘိၪ့အၪ့ဆိၫလၧ လၩနၫ့လူၬ မုနံၩနီၪလီၫႉ ကဘၪကုၬဝ့ၫအခံၫ့ဘၪယူၭ ဆံၭလးလဖၪနီၪ ကုၬဆိၫဝ့ၫ ဘုၪ အဲၩ့ ကဆံၭကဆံၭဖိၪဂီၩ့ ကိၭဖံၭၥိၭ ၦခမျၧး တဝၫ့ဖိၪလဖၪ အၪ့ဖီၫ့ဒုၭအၪ့ယံၫယါဝ့ၫနီၪလီၫႉ  ဂီၩ့နီၪ ဆုးကုၬအဘုၪၥံၪအဲၩ့ၥံၪနီၪလီၫႉ ဖံၫဖူၫၥံၪ လၧဖျိၩ့ဖျိၩ့ အိၩ ဘၪမၩထၪ့ဝ့ၫ ဘဲၫယီၩၥိၭနီၪ အဝ့ၫၥံၪနဲၩ့ထၬ ပဘျုၪ့အၪ့ဘျုၪ့အီၩၦၡၩ ၦဘုၪအၥၪဆိၫၥံၪလဖၪနီၪ ဘုၪၥံၪ အဲၩ့ၥံၪလၧအအီၪထး ကဘၪဆုးကုၬဝ့ၫလဖၪ အၥၪန့အၪနၭထၪ့အကၠီၩ့နီၪလီၫႉ

          ထၧၫ့ဖုဝဲဖျိၩ့ဖိၪၥံၪဧ့ႇ လၩခတူၭဂီဒဲ လၩနၫ့နီၪ မွဲၦမၩဆံၬဖိၪၥံၪ ဘၪကုၬဘုၪအခံၫ့နီၪလီၫႉ လၧဖျိၩ့ဖျိၩ့အိၩ ကိၭနံၪ့ကိၭနံၪ့ဒ့ၭ ဘၪကုၬဘုၪအခံၫ့နီၪ မွဲအဘူၭအထံၭလဖၪ ဂဲၫထဲၩ့ဒၪဎီၩ့ထဲၩ့လိၬၥၭအခံၫ့မွဲမွဲဆ့နီၪလီၫႉ ဘဲၫနီၪ အၥိၭ ဘူၭထံၭလဖၪ ဂဲၫထဲၩ့စူၭကီၪ့ဒၪဘၪလိၬၥၭ ကနံၪ့ကကၠၪယီၩ ဖံၫဖူၫၥံၪလဖၪ ၥီၪ့ၥၫ့ ဆိၪန့ဘိၪ့ဖိၪလံၩၥံၪလၧ ဆၧချဲၩ့လဖၪ လုၫလါထုၫရူၪႇ ထၩႇ ဆၧချဲၩ့ဒီၩ့ ဒဲ ဆၧချဲၩ့ဘံၪ့ၥူၪၥံၪလဖၪနီၪလီၫႉ

          ထီၩ့ လၩနၫ့ဒဲ လၩလံၩ့အခံၫ့နီၪ ၦမၩဆံၬဖိၪၥံၪ ကုၬဘုၪဂီၩ့ ဘုၪလၧၫ့လဖၪနီၪ ယိၬစူၭကီၪ့ထၬဝ့ၫဒၪလၧ ခလဲးဖၧၩ့နီၪလီၫႉ ထီးနီၪ ဘုၪၥံၪလဖၪယီၩ မၩလၩ့ဎွံၪဝ့ၫ ၡိၪဝ့ၫဂီၩ့ ကဲၪထၪ့အၥၪနီၪ စူၭကီၪ့ထၬဝ့ၫလၧ ခလဲးဖၧၩ့တၭ လထံၭလၩ့ဒံၭဘၪဝ့ၫလၧ ဖၫ့ဖၧၩ့နီၪ ကလိၬထၪ့စိၩ ဖံၫဘံၪယီၩ ၦၡၩကိၭလခဲၫ့ကမံၩ့နီၪ ဖံၫဖံၫဘုၪကလိၬမုၪ နီၪလီၫႉ ကလိၬထၪ့ဝ့ၫ ဘဲၫယီၩၥိၭ အဆၧထိစိၩနီၪ ဘုၪအလၩ ဘဲၫကဂဲၫထဲၩ့ထဲၩ့လၧ ဘုၪပိၩ့ ႇ ကဂဲၫဖ့ၪလၫ့ဘုၪ ဆၧဆိၪဂ့ၩဆိၪဘွၩႇ ဘဲၫဘုၪကန့အၪ့ထၪ့ဒဲ ဘဲၫဘုၪယီၩ ကထိးအၪ့ယံၬယံၬအဂးနီၪလီၫႉ အၪ့ကံၩ့ဘၩဆိၪဖၪထၪ့ လၧ ဖံၫဘံၪယီၩအီၪဂီၩ့မၬ ဘုၪၥံၪလဖၪနီၪ ထံၭလၩ့ဝ့ၫလၧ ဖၫ့ဖၧၩ့နီၪလီၫႉ