ၦဖျိၩ့ဆၨၩလုၫလါ ထၭထၪဆၧမၩ

ၦဖျိၩ့ဆၨၩဖိၪၥံၪလဖၪယီၩ လမီၪ့ဎီၩ့ဘၪလၧ ၦဂူၫဂၩနးဂၩ ပအီၪဒၪလၧ  ပဆၧကီၩ့ဆၧၥိၭ ဆဲၪ့ဆၭကံၪနီၪလီၫႉ ဂၪ့ခိၪၦခမျၧးၥံၪလဖၪ ပဒၩ့ထၬ ခိဆၧၩ့ချံၫ့ကန့အဂး ဆၧမ့ၬမဲကဘံၪ့ၥူၪအဂး  ဆၧကီၩ့ဆၧၥိၭနီၪ ခီၫလၧ ၡၩဆၧဆၧးဎံၫဆၧးလၩ စၭထၪ့ဒိၪထၪ့ထီၪ့ထၪ့အထီနီၪ ၥိၭကီၩ့ကၠၭဝ့ၫဒၪလီၫႉ န့ဝ့ၫဒၪလၧ ဆၧဖိၪဆၧဎါအီၪ ဆၧဖံၭမွဲဂ့ၩႇ ထီးနီၪကဆၫ့ ဘွ့ၪမုနီၪန့ထၪ့ လူၪႇ ဘွ့ၪလူၫဆၧကဲၩ့ယါမွဲဂ့ၩ ကဆၫ့ဘၪကဆၫ့ အၪ့လဲၩဒိၪထၪ့ထီၪ့ထၪ့အခၫ လၧအခၪ့ထံၭအိၩနီၪ ရိၩ့ပျၩ့ဝ့ၫအၪမၬလီၫႉ

ဆၧဖံၭမွဲဂ့ၩႇ ဆၧကဲၩ့ယါမွဲဂ့ၩႇ ဒီၪဝ့ၫဒၪ နံၫဒီၪဂီၩ့ မၩဖိးဝ့ၫ အခိၬဘီၩ့အဖၧၩ့ အစူၪအဖၧၩ့ဂီၩ့ ဘၪဖျၪ့ၥိၭထၪ့ခီၫလၧ ပခိၪဎွံၪနီၪ မွဲၦခမျၧးၥံၪလဖၪ အဆၧကီၩ့ဆၧၥိၭ အခၪ့ထံၭခၪ့ဎၧၩ့နီၪလီၫႉ မွဲဆၧဘဲၫနီၪ ၦဖျိၩ့ဆၨၩဖိၪၥံၪအ ဆဲၫ့ဆၭကံၪနီၪ ဂၪ့ခိၪၦခမျၧးဖိၪၥံၪလဖၪ ၡၩအဆၧဆၧးဎံၫဆၧးလၩ စၭထၪ့ဒိၪထၪ့ထီၪ့ ၥိၭကီၩ့ထၪ့ဆၧအခၪ့ထံၭ အထိၪအဒီၩ့နီၪလီၫႉ

ၦဖျိၩ့ဆၨၩဖိၪၥံၪလဖၪ ပဆၨၩဆၬဆဲၪ့ဆၭကံၪနီၪ ပၥိၭကီၩ့ဖီၪ့ဂုးထၪ့ဂဲးဘၭဆီၪ့ထၪ့အကၠီၩ့ လုၫလါထၭထၪဆၧမၩနီၪနးဆ့ ဂဲၫကဲၪထၪ့ဒၪပဝ့ၫ ဂံၪ့ဖၧၩ့ဆၧၥ့ၪဆၧဘၪကမံၩ့အၥိၭ ၥ့ၪယၫထၪ့ဝ့ၫလၧ ဘွ့ၪမုနီၪပၥိၩ့ထၪ့န့ ဂ့ၩဂ့ၩဘၪဘၪအကၠီၩ့ ၥုၪ့ထၪ့ဒၪဝ့ၫဒၪနီၪလီၫ ႉ ထီးမုဆၫကနံၩယီၩအထီ ဖျိၩ့ဆၨၩဖိၪၥံၪအီၪလၧ ခိၪလီၩ့လးကျဲၩ့လဖၪ ကထၭထၪအဂး ဘွ့ၪမုလဖၪ ၥုၪ့ကၠၭဒၪဝ့ၫနီၪလီၫႉ

ၦဖျိၩ့လုၫလါဆၧကီၩ့ဆၧၥိၭ ကထၬထၪအဂး ဘွ့ၪမုနီၪ လိၫဝ့ၫဒၪ အရ့ၩဒိၪထုၬလီၫႉ ၀ၪနီၪ ပကိၭဝ့ၫလၧ ဖျိၩ့ၡိမုထၪ့ခီၫ ဘဲႇ လၧဖျိၩ့ၡိမုနုၬခီၫ ဘွ့ၪႇ လၧဖျိၩ့ၡၩ့ခီၫနီၪ ဘဲ နီၪလီၫႉချည်မျင်း နီၪဘိၭ ၦဖျိၩ့ၡိမုထၪ့ကိၭလၧ လူး ဒဲ ၦဖျိၩ့ၡိမုနုၬကိၭလၧ လူၫနီၪလီၫႉ