ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫဆၧးဎံၫဆၧးလၩ လံၬဂဲးထု (၅)

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ နံၩလၧအမုၬ ကိၭဂၩဒ့ၭနဲၪႉ မုကနွံၫယီၩ ပဆၧဆၧးဎံၫဆၧးလၩအနိၪ့ဖၧၩ့ ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫ ဆၧးဎံၫဆၧးလၩ လံၬဂဲးထုနီၪအဖၧၩ့ ယမိဆုးအဲၪဒိၭအၪ့နၩ့လီၩဖ့ၪ နဲၪဘၪ ထၧၫ့ဖုဝဲဖျိၩ့ဖိၪၥံၪ ပကြၨၭဖီၪ့ဂုးထၬ ပလုၫလါထူၫရူၫလဖၪ လံမံၩ့ကမံၩ့နီၪမွဲဝ့ၫ ၦဖျိၩ့နံၪ့ထၪ့ၥၫ့ (ကရင်နှစ်သစ်ကူခြင်း) လုၫလါထူၫရူၫ နီၪလီၫႉ

          ၦဖျိၩ့နံၪ့ထၪ့ၥၫ့အလၩနီၪမွဲဝ့ၫ ၦဖျိၩ့အလၩ မွဲလၩလၧအဆိၪထုၬလဘံၪ့ လၩထဲၫ့ခူၭဖိၪနီၪလီၫႉ လါနၫ့ဂ့ၩ ၦဖျိၩ့ဆၨၩ အလၩအဆိၪထုၬၥၫ့ မွဲဝ့ၫ လၩထဲၫ့ခူၭဖိၪယီၩ ၦလၧနၩ့နၩ့ လီၩဝ့ၫ လၩ့ဘၪလၧ ပယၩ့အလၩ ပြာသို လနၩ့နၩ့ လီၩဝ့ၫ လၩ့ဘၪလၧ ပယၩ့အလၩ တပို့တွဲ တၭ လီၩဖျီၪ့ထၪ့ကၠၭဝ့ၫအခၫ ၦဖျိၩ့ဆၨၩလဖၪအနံၪ့ထၪ့ၥၫ့နီၪ ကြၨၭမွဲဝ့ၫ လၩထဲၫ့ခူၭဖိၪ လမွဲဘၪ ထဲၫ့ခူၭဒိၪအကၠီၩ့တၭ အၪ့ဎၬအီၪကီၪ့ဎိၭလၩ့ထဲၩ့ဝ့ၫအခၫ ၦဖျိၩ့နံၪ့ထၪ့ၥၫ့မုနံၩယီၩ လၧဆၧယံၩဆၧၡီၩ့အဖၧၩ့ ကြၨၭအီၪဝ့ၫကနံၩလီၫတၭ ခီၫလၧ ဖျိၩ့ဖျိၩ့အိၩ ဖံၫဖူၫၥံၪ ဂဲၫထဲၩ့မၩလၩမၩဖၩ့ၡီၩ့ထၬ ၦဖျိၩ့နံၪ့ထၪ့ၥၫ့မုနံၩနီၪ မွဲဝ့ၫ လၩထဲၫ့ခူၭဖိၪယိၬထၪ့ ၁ၥၫ့အကၠီၩ့တၭ မုနံၩယီၩ မွဲကဆုးအီၪက့ၪထၬလၧ ၦဖျိၩ့နံၪ့ထၪ့ၥၫ့မုနံၩဒိၪနီၪလီၫႉ

          ၦဖျိၩ့နံၪ့ထၪ့ၥၫ့မုနံၩဒိၪယီၩ မွဲၦဖျိၩ့ဆၨၩဖိၪၥံၪလဖၪအဂး လအီၪလမငါဘၪ မုနံၩဒိၪကနံၩနီၪလီၫႉ မွဲဆၧ ဘဲၫနီၪ ၦဖျိၩ့နံၪ့ထၪ့ၥၫ့မုနံၩလုၫလါယီၩ ဘဲၫကဂုးခၧၫ့ထီၫ့ထၪ့အဂး ပကဘၪဆုးဖီၪ့ဂုးခၧၫ့ထၬနီၪလီၫႉ

ပကြၨၭဖီၪ့ဂုးထၬ ပလုၫလါထူၫရူၫလဖၪလၧခဲၫ့ထုၬကမံၩ့နီၪ မွဲ ဆၧစူၭကီၪ့မၩဎိၭလၩ့ဆၧ (စုပေါင်းနေ ထိုင်လုပ်ကိုင်လေ့ရှိခြင်း) လုၫလါနီၪလီၫႉ  ၦဖျိၩ့ဆၨၩဖိၪၥံၪလဖၪနီၪ ခီၫလၧဖျိၩ့ဖျိၩ့အိၩ အဲၪကွံၩအလးအကျဲၩ့ဒဲ စူၭကီၪ့အီၪဎိၩလၩ့လုၫလါအီၪထၬဝဲၩနီၪလီၫႉ အ့ၪပကလ့ၩအၪ့ဎၬထၪ့ ၦဖျိၩ့အတဝၫ့ ကတဝၫ့စွါဘဲၫ တဝၫ့နီၪ ပကဒၪဘၪ အၪဒၪဆၧမွဲအဘူၭအထံၭၥံၪနီၪလီၫႉ မွဲဆၧဘဲၫနီၪ ၦဖျိၩ့ဆၨၩဖိၪၥံၪ လၩ့အဲၪဝ့ၫဒၪ ပလုၫလါထူၫရူၫယီၩ ကြၨၭပဆုးဖီၪ့ဂုးခၧၫ့ထၬနီၪလီၫႉ