ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫဆၧးဎံၫဆၧးလၩ လံၬဂဲးထု (၃)

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ နံၩလၧအမုၬနဲၪႉ မုကနွံၫယီၩ ပဆၧဆၧးဎံၫဆၧးလၩအနိၪ့ဖၧၩ့ ၦဖျိၩ့ဆၨၩလဖၪ ဘၪထွ့ၫလၧ လုၫလါထူၫရူၫ ဆၧးဎံၫဆၧးလၩ လံၬဂဲးထုနီၪအဖၧၩ့ ယမိဆုးအဲၪဒိၭအၪ့နၩ့လီၩဖ့ၪနဲၪဘၪ ထၧၫ့ဖုဝဲ ဖျိၩ့ဖိၪၥံၪ ပကြၨၭဖီၪ့ဂုးထၬ ပလုၫလါထူၫရူၫလဖၪ ၥၧၫ့မံၩ့ကမံၩ့နီၪမွဲဝ့ၫ ဆၧအၪ့ဎဲၩ့ (နတ်စားခြင်း) လုၫလါထူၫရူၫ နီၪလီၫႉ

          ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ဘၪထွ့ၫလၧ ဆၧအၪ့ဎဲၩ့လုၫလါထူၫရူၫယီၩ ဆုးအီၪကီၪ့ဝ့ၫအခၫ ထၧၫ့ဖုထၧၫ့ဝဲဘူၭထံၭ အၥၭၡါလဖၪ လ့ၩခိၪလ့ၩနါဂီၩ့ ဘူၭထံၭထီးလူၬ ဘၪအၪ့အီၩ့ဎိၭလၩ့ဝ့ၫဒၪ ကၠၧၫ့ကၠၧၫ့နီၪလီၫႉ အလးအကျဲၩ့ကစီၪ့လီၫ ခီၫလၧအဎိၩထုၬ ထီးအဆံၭထုၬ ဂ့ၩဂ့ၩဘၪဘၪ မွဲဝ့ၫဘၪစူၭကီၪ့အၪ့ဎိၭလၩ့ဆၧ လုၫလါ ထူၫရူၫအကၠီၩ့ မွဲဂံၪ့ဒီၪ့အဆၧအဲၪဆၧကွံၩလၧၫ့ဎွ့ၩထၪ့ဝ့ၫတၭ လုၫလါထူၫရူၫယီၩ ကြၨၭပဆုးဖီၪ့ဂုး ခၧၫ့ထၬနီၪလီၫႉ

          လၧပယၩ့ခီၫကိၭဝ့ၫ (နတ်စားခြင်း) နီၪ လၧဖျီၩ့ခီၫ ဆၧကိၭဝ့ၫ အၪ့ဎဲၩ့ ယီၩ မွဲလဘၪလၩ့ဎိၭဘၪတၭ အၪ့ဎဲၩ့အလးနီၪ ကြၨၭအၪ့လဲၩ့ကိၭထၪ့ထဲၩ့လၧ ဆၧကလိၬထၪ့မိဖါအဘိၪ့နီၪလီၫႉ အၪ့ဎဲၩ့နီၪ မွဲဝ့ၫ ဘၪဎဲၩ့ နီၪလီၫႉ ဘဲၫပကဖီၩ့ဖျ့ၭလၧ ဆၧဒဲၭဘၭအကၠီၩ့ ပဒၪဖျီၪစိၩ မိဖါဖံၫဖူၫၥံၪလဖၪဂီၩ့ ပကလိၬထၪ့ အခီၫပယီၫအီၪဝ့ၫဒၪ ဘဲၫယီၩၥိၭနီၪလီၫႉ