ၦဖျိၩ့ဆၨၩဖိၪၥံၪ ဘၪဂဲၫထဲၩ့အီၪၥၭမၧၫ့ ကဆၫ့ဘၪကဆၫ့

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ လၧဂၪ့ခိၪချိၪ့ယီၩ ဆၨၩအဆၧဝံဆၧနၭအီၪဝ့ၫ  ၇၀၀၀ ဘျဲၪဒဲ ၦၡၩအဆၧဝံဆၧနၭ အီၪဝ့ၫ ၆၀၀၀ ဘျဲၪလီၫႉ ဆၨၩအဆၧဝံဆၧနၭ ၆၀၀၀ ဘျဲၪအဖၧၩ့နီၪ ၦဖျိၩ့ဆၨၩယီၩ ပၫဝ့ၫဆ့လီၫႉ

 ထၧၫ့ဖုဝဲမုၪခွၫၥံၪဧ့ ၦဖျိၩ့ဆၨၩယီၩ မွဲ မိၫ့ကိၫ ဆၨၩဖၭဒိၪ အထဲၩ့ဖၪ့ကဆၨၩနီၪလီၫႉ ၦဖျိၩ့ဖိၪလဖၪယီၩ ဂဲၫထဲၩ့အီၪလၧ ခးမိၫ့ကိၫလံၩယၩဖၧၩ့နီၪ နံၪ့ဆံၫလၩယံၬဝ့ၫဒၪလီၫႉ ပဝ့ၫၦဖျိၩ့ဖိၪလဖၪယီၩ ပအီၪလၧ ပဂံၪ့ပဎၪ့ ပထံၫပခး ပခိၪပနါဒဲ ပဘိၪ့ပဎွၩလီၫႉ

လခဲၫ ခးမိၫ့ကိၫလံၩယၩဖၧၩ့နီၪ ၦဖျိၩ့ဖိၪ အဆၧဝံဆၧနၭ ဂဲၫအၪထၪ့ကနံၪ့ ဘၪကနံၪ့ႇ ခိဆၧၩ့ချံၪ့ဆၧၫ့ထီလဖၪ ဂဲၫအၪ့လဲၩ့ထၪ့ၥၭတၭ ဆၧမုဆၧ ဘီၩ့လဖၪနးဆ့ မဲွလမဲၪထၪ့လၧၩ့ ဘၪဂ့ၩဂ့ၩဒဲ ဆၧအၪ့ဆၧအီၩ့လဖၪ ဂဲၫလၩ့ၡၩဝ့ၫဒၪကနံၪ့ ဘၪကနံၪ့ ဆၨၩလၧအဂဲးဎိၩဒိၪလဖၪ ဂဲၫထဲၩ့မၩနၧၩ့မၩစၪအဝ့ၫၥံၪ ကထီ ဘၪကထီအကၠီၩ့ ၦဖျိုၩ့ဖိၪလဖၪယီၩ ဂဲၫထဲၩ့ၥုၭထဲၩ့အၥၭလၧ ထၬလခီၫလီၫႉ

ၦဖျိၩ့ဖိၪလဖၪ ဘၪဂဲၫထဲၩ့ခၪ့ဂၬ ဘံၩဖၬလဲ ပကိၭဝ့ၫလၧ ထံၫဆ့ၭမ့ၬယွၩနီၪဂီၩ ထီၩ့စိၩလၧ ခးတံ ဘဲၭႇ ခးတရူၭဖၧၩ့နီၪလီၫႉ

ထၧၫ့ဖုဝဲဖျိၩ့ဖိၪၥံၪလဖၪ လခဲၫအ့ၪဒၪခီၩ့ထဲၩ့လိၬၥၭအခၫ ဘဲၫၥိၭကၥ့ၪယၫနၪၥ့ၪထဲၩ့ အဆၨၩအဂး လချုၭၥုၭထဲၩ့ၥၭအခၫနီၪ ကၭထၬလူၪ ဘွၩလၧ အဝ့ၫၥံၪအစူၪဒံၩ့လီၩ့နီၪလီၫႉ

ဆၧမၩနီၪ လခဲၫ့ကဲၪ့ထၪ့ထဲၩ့ ၦဖျိၩ့အထူၫအရူၫကမံၩ့ မဲွဝ့ၫ ခဲးစူၪနီၪလီၫႉ ၦဖျိၩ့ဖိၪလဖၪယီၩ  အီၪလၧခးတရူၭ အခၫနီၪ ဘၪထိးမၩနၧၩ့မၩစၪအကီၠၩ့ ဆုးၥၭစိၩအၥၭလၧ လံၩထံၭလခီၫဒဲ ထီၩ့စိၩလၧခးပယၩ့ဖၧၩ့ လၧဘံၫစံၫ ၇၃၉ နီၪလီၫႉ ၩ့ ၦဖျိၩ့ဖိၪလဖၪယီၩ ဂဲၫထီၩ့လၧ ခးပယၩ့ဖၧၩ့ အီၪအနံၪ့ နံၫထီၫဘျဲၪယူၭနီၪလီၫႉ