ၦဖျိၩ့ဆၨၩဒဲ ဖးဖီၩ့လၧအခၫ့ထံၭၥၫ့ (၃)

မွဲဆၧဘဲၫနီၪအကၠီၩ့ မုဆၫကနံၩယီၩ ပဒၪဎီၩ့ထဲၩ့လိၬၥၭ ဖါအဆၨၩ ဖျိၩ့ၡၩ့ဒဲ မိအဆၨၩ ဖျိၩ့ၡိယီၩနီၪ လၧကထုၪ့ဒၪအိၩ ဂဲၫထဲၩ့အီၪထၬလၧထံၫဆ့ၬမ့ၬယွၩ ကတဝၫ့ဎးလီၫ လမွဲဘၪ ကဂံၪ့ဒီၪ့ဎး မွဲပၥွံၪ့မီၪ့ဎီၩ့ ပထၧၫ့ဖုဝဲအထံၭလဖၪအကၠီၩ့ ဖံၫဖူၫၥံၪလၧဖျိၩ့ဖျိၩ့အိၩ ၥီၪ့ၥၫ့ပၧၩ ၡါလဖၪႇ ဆၧၥီၫ့ဆၧၥၫ့လဖၪႇ ဆၧချဲၩ့ဒီၩ့ဎံၫလၩ လဖၪနီၪ မွဲအတီၩအဘၪဝ့ၫဒဲ မွဲပမီၪ့ဘံၭခွံၬလန့ဘၪအကၠီၩ့ ၦဖျိၩ့ဆၨၩဖိၪၥံၪလဖၪ ပဖးဖီၩ့ယီၩ ပအၪ့ဎၬထၪ့ထဲၩ့ န့ဂ့ၩဂ့ၩဘၪဘၪလီၫႉ

ၦဖျိၩ့ဆၨၩဖိၪၥံၪလဖၪနီၪ ၦကိၪ့ၥ့ၪလဖၪ ကွ့ၭနဲၪထၪ့ဝ့ၫလၧ ၥဲၫ့ တရူၭ အဆၨၩဖိၪနီၪလီၫႉ လၧၦကိၪ့ၥ့ၪလဖၪ အဆၧလီၩ့ထၪ့ဖျီၪ့အဖၧၩ့ ၦၡၩၥံၪလဖၪအခိၪဎွံၪအပိၫ့အပၩ့ ဒဲ အနၫ့ဖူၫအပိၫ့အပၩ့မွဲဂ့ၩ ဆၧချဲၩ့ဖျိၪ့ လူဆၧချဲၩ့ကိၪ့ၥ့ၪအနိၫ့မွဲဂ့ၩ ကွ့ၭနဲၪ့ကိၭထၪ့ဖျီၪ့ဝ့ၫလါနၫ့ဂ့ၩ ၦဖျိၩ့ဆၨၩလဖၪနီၪ မီၪ့ဎီၩ့ ၥဲၫ့ တရူၭဆၨၩၥံၪအၥိၭ ပမွဲ မိၫ့ဂိၫဆၨၩဖိၪလဖၪနီၪလီၫႉ 

 ၦကိၪ့ၥ့ၪအလီၩ့ဎွါအၪ့ဎါဆၧလနၩ့နၩ့ လီၩထၬဝ့ၫဒၪ  တီၫငူၫၦဎွၩလၩ့ဆၨၩနီၪ မွဲၦဖျိၩ့ၥံၪစၭထၪ့မၩကဲၪထၪ ့အကၠီၩ့ လီၩ့ထၬဝ့ၫဒၪအီၪလီၫႉ လါနၫ့ဂ့ၩ လၧဖးဖီၩ့အဖၧၩ့ ၦဖျိၩ့ဆၨၩဖိၪၥံၪလဖၪ ဘၪန့လဲၪ ဆၧကွ့ၭနဲၪလထၪ့ဖျီၪဘၪနီၪ   ၦဖျိၩ့ဆၨၩဖိၪၥံၪလဖၪ ကမိအီၪကၠၭချံၫ့ချံၫ့ဒဲ ဆၧယံၩဆၧၡီၩ့အဂဲး ၡၩဝ့ၫဒၪအကၠီၩ့ ပဘၪအီၪလၧဆၨၩဂူၫဂၩအဖၫ့လၬနံၪ့ဆံၫလၩယံၬဂီၩ့ ပဆၧဆၧးဎံၫဆၧးလၩ လနၩ့နၩ့လၩ့မါနီၪ လၩ့လီၫ့ကီၩ့ဝ့ၫဒၪ အၪမၬလီၫႉ မွဲဆၧဘဲၫနီၪ ၦဖျိၩ့ဆၨၩဖိၪၥံၪလဖၪ ကမိအီၪလၧၦၡၩယဲၩ့ယဲၩ့ ကမိအီၪၡူၪၡူဘၩဘၩအကၠီၩ့  အလးကလးဒဲကလး ပဘၪဆုးကျိၭလိၬၥၭကၪဝ့ၫဒၪအလးအကျဲၩ့လဖၪ အီၪပျံၩပျၩဎံၩ့လးဒ့ၭနီၪလီၫႉ