ၦဖျိၩ့ဆၨၩဒဲ ဖးဖီၩ့လၧအခၫ့ထံၭၥၫ့ (၂)

ထၧၫ့ဖုဝဲဖျိၩ့ဖိၪၥံၪဧ့ မိထံၭ ဖါထံၭ အခၪ့ထံၭၥၫ့ၦဖျိၩ့ဆၨၩဖိၪၥံၪလဖၪ အီၪပျံၩပျၩဎံၩ့လၩ့လၧ ခးအ့ၩၡၩ လါနၫ့ဂ့ၩ အီၪဂဲၫစဲၪ့လၫ့လၧ ထံၫဆ့ၭမ့ၬယွၩအလးဒၪအိၩ ဂဲၫစဲၪ့လၫ့ထီးလူၬကၠၧၫ့ကၠၧၫ့လမွဲဘၪဒဲ ထၪ့ဖျီၪ့ဝ့ၫဒၪလၧ ဂဲၫစဲၪ့ထၪ့ ခရၧၫ့နံၫခရၧၫ့နီၪလီၫႉ ခရၧၫ့နံၫခရၧၫ့ယီၩအဖၧၩ့ ၦလၧဂဲၫစဲၪ့လၫ့ဂုအမ့ၬယၫနီၪ ဖါလဖၪ လမွဲဘၪ ၦၥၭၡါအခွၫလဖၪ လ့ၩခိၪလ့ၩနါဂီၩ့ အဝ့ၫၥံၪအ့ၪမွဲဒၪအလးအၥၫ့အဂ့ၩအဘၪဘိၭ ကထဲၩ့ကိၭထဲၩ့အဂံၪ့ဒီၪ့ဖိၪၥံၪ ထိၪတွၭအၪ့ဎၬထၬဝ့ၫဘဲၫယီၩၥိၭဂီၩ့ ၦလၧအဂဲၫစဲၪ့လၫ့လဖၪနီၪ လခဲၫ့ ဖၭထံၭ ဖျိၩ့ၡၩ့ ကိၭဝ့ၫလၧ ဖျိၩ့ဆၨၩဖိၪၥံၪ လၧအဂဲၫလၩ့ဖိၬဖါအဆၨၩအခဲၫနီၪလီၫႉ ဂံၪ့ဒီၪ့ဖိၪၥံၪလၧအအီၪထးလဖၪနီၪ ဆၧဒၪခီၩ့ဆၧၫ့ယၫ လၧၫ့ဎွ့ၩဝ့ၫဒၪ မိလဖၪ လမွဲဘၪ ၦမုၪလဖၪအဆၧထံၫလၩ့ဒီၪလၩ့အဖၧၩ့ ဂဲၫစဲၪ့လၫ့ကၠၭဂီၩ့ ကနံၩကထဲၩ့ကိၭထဲၩ့ ၦလၧအအီၪထး လဖၪ လၧဆၧထိစိၩအဖၧၩ့ ဂဲၫထဲၩ့အီၪထၬဝဲၩလၧထံၫဆ့ၭမ့ၬယွၩအလးနီၪ နံၪ့ယၩအၪထၪ့အခၫ နဲၩ့ဎီၩ့ဆၧလၩ့အၪ့ယိၫ လဖၪဒဲ လခဲၫ ဆၨၩဂူၫဂၩၥံၪဂဲၫထဲၩ့ၥုၭအီၪထဲၩ့အၥၭတၭ ဘၪၥၭမဲၪၥၭဖျဲၩဝ့ၫအကၠီၩ့ ၦလၧအဂဲၫစဲၪ့လၫ့ထၬအမ့ၬယၫ ဖါလဖၪ ဂဲၫဖိၬထွ့ၫလီၩ့ဎွါဝ့ၫတၭ လၧထံၫဆ့ၭမ့ၬယွၩနီၪ ဂဲၫကဲၪထၪ့ မိထံၭ (လမွဲဘၪ)  ဖျိၩ့ဆၨၩဖိၪၥံၪလၧအဂဲၫလၩ့ ဖိၬမိအဆၨၩအကၠီၩ့ ဖးဖီၩ့ၦကိၪ့ၥ့ၪအၪဒၪဆၧ ထိးဆၧၫ့နဲၩ့ထၬဝ့ၫဒၪနီၪလီၫႉ

ၦကိၭဝ့ၫလၧ ဖါထံၭ ဖျိၩ့ၡၩ့အၪဒၪဆၧနီၪ ၥိၩ့ထၪ့ဝ့ၫ မဲခီၫထံၫကၠီၪ့ ၥၫ့လွ့ၫထံၫကၠီၪ့လဖၪ ၥုၭအီၪထဲၩ့အၥၭလၧလံၩထံၭတၭ ထီးမုဆၫကနံၩယီၩ ပကဒၪဘၪလၧ ၥဲၫ့ထံၫခးႇခးပယၩ့ႇ ကၫ့ဘီၩဒံၫယၩဒဲ ဘံၫယၭနၫ့လံၩခံၫကကဲၩ့ခီၫ ထီၩ့စိၩလၧ ခးမလ့ၩၡၩအလးအကျဲၩ့ ခိၪလီၩ့ ဆံၬဖၧၩ့ဎံၩ့လးနီၪလီၫႉ ၦကိၭဝ့ၫလၧ မိထံၭ ဖျိၩ့ၡိလဖၪနီၪ အီၪဂဲၫလၧ အ့ၫယၫဝတံၫထံၫအကၠီၩ့တၭ ခပယၩ့ ထံၫထၪကျိၩ့လးကျဲၩ့လဖၪဒဲ ၦဖျိၩ့ဆၨၩခးဒီၪ့လးကျဲၩ့လဖၪမွဲဂ့ၩ ၥဲၫ့ခးမုနုၬလးကျဲၩ့လဖၪမွဲဂ့ၩ ပကဒၪဘၪ အီၪဎံၩ့လၩ့ဝ့ၫဒၪနီၪလီၫႉ