ၦဖျိၩ့ဆၨၩဒဲ ဖးဖီၩ့လၧအခၫ့ထံၭၥၫ့ (၁)

ၦဖျိၩ့ဆၨၩဖိၪၥံၪကိၭဂၩ ၦဖးဖီၩ့နီၪ ဘဲၫကထီၩ့စိၩလၧ ဖိၪလံၩၥံၪလဖၪအဆိၩဆိၩအစူၪဖၧၩ့အဂး ပက ဘၪကျ့ၭစၨၭဖီၪ့ဂုးအၪ့နၩ့ထၬနီၪလီၫႉ မွဲဆၧ ဘဲၫနီၪ ဆၧလၧဖးဖီၩ့နီၪ မွဲဆၧကမံၩ့လၧ ကျ့ၭမၩလၩ့မၬခွံၬအဂးမွဲအ့ၬႉ ၦဖျိၩ့ဆၨၩၥံၪလဖၪယီၩ ပဂဲၫအီၪခီၫလၧ ပုဂံရၫဇဝ့ၫအမ့ၬယၫအိၩ အ့ၪပလီၩ ဘဲၫယီၩၥိၭနီၪ ၦလီၩ့ဎွါအၪ့ဎါ ဆၧကိၪ့ၥ့ၪလဖၪအ့ၪ မွဲဆၧချဲၩ့အၪလိၬၥၭနးဆ့ မွဲဆၧလၩ့ဆၫ့လၩ့မဲၩ့ကအီၪနးမံၩ့အ့ၬႉ

ၦဖျိၩ့ဆၨၩဖိၪလဖၪယီၩ ခီၫလၧဖျိၩ့ဖျိၩ့အိၩ ဖံၫဖူၫၥံၪ ၥီၪ့ၥၫ့လီၩချဲၩ့ပၧၩနီၪ ပထီးန့ထၬလၧ ဆၧယူၭယၫ့အဖၧၩ့ဂီၩ့ ဂဲၫထဲၩ့လီၩဖ့ၪနဲၪထဲၩ့ ဘၪဖိၪလံၩကဆၫ့ဘၪကဆၫ့အကၠီၩ့ ပဖးဖီၩ့ယီၩ ပဂဲၫထဲၩ့ဖီၪ့ဂုးထၬန့ဂ့ၩဂ့ၩဘၪဘၪနီၪလီၫႉ လၧဖးဖီၩ့ယီၩအဖၧၩ့ ပကိၭဝ့ၫလၧ ထံၫဆ့ၭမ့ၬယွၩအလး လၧဖျိၩ့ဖျိၩ့အိၩ မွဲဝ့ၫဖံၫဖူၫၥံၪဂဲၫထဲၩ့အီၪၥၭမၧၫ့လးကျဲၩ့ အကၠီၩ့နီၪ အၪဒၪဆၧ ၦနါဂၧၫ့ယံၫယၩလါနၫ့ဂ့ၩ ထံၫဆ့ၭမ့ၬယွၩနီၪ မအီၪအလးခလဲၪ မွဲၦၡၩၥ့ၪယၫဂ့ၩဂ့ၩဘၪဘၪ နးဂၩအ့ၬလီၫႉ ဆၧအလးမွဲဝ့ၫ ထံၫဆ့ၭမ့ၬယွၩယီၩ မအီၪအလးခလဲၪနီၪ ၦကိၪ့ၥ့ၪၥံၪလဖၪ အၪ့ဎၬထၪ့ထံၫထံၫ ဆၭဆၭအခၫ လၧခးတရူၭ လံၩထံၭကကဲၩ့ခီၫ အလးကစီၪ့နီၪ လၧအဖီၩ့ခွံၬနံၪ့ ၃၅၀၀အိၩ အီၪဝ့ၫဒၪ အိၫအ့ၫစ့ၭ ဆၧးဎံၫဆၧးလၩအဂၩ့ဂီၩ့ ထံၫကၠီၪ့ကဘီၩ့ယၫ အီၪၥၭမၧၫ့ ၥုၪ့လၩ့ အၪ့ဘျုၪ့ဆၧ ကဆံၭကခ့ၭဂီၩ့ ဂံၪ့လဖၪနီၪ စူၭကီၪ့အီၪလၩ့ဎိၭလၧအဂံၪ့ဒီၪ့ဖိၪၥံၪလဖၪကၠၧၫ့ကၠၧၫ့ နီၪလီၫႉ

ဆၧအလးနီၪ ဖံၫဖူၫၥံၪလၧဖျိၩ့ဖျိၩ့အိၩ ဂဲၫထဲၩ့အီၪထၬ ဖိၬဘိၭ ယၩနံၪ့ဖိၬဖၫ့ဂီၩ့ လခဲၫ့ ထံၫကၠီၪ့လဖၪ ဂဲၫထၪ့ခီၫလၫ့ဒဲ လၧဆၧဆၧၩ့ခၫခီၫ ထံၫဎိၩလၩ့အကၠီၩ့ ၥုၪ့ဖျါထၬဆၧလဖၪ ဂံၪ့ဎၫ့လဖၪ ဂၬဂီၩ့ဂၭစၪထၪ့ဂီၩ့ ၦခမျၧးၥံၪဂဲၫအၪထၪ့ မွဲအၪ့အီၩ့ဆၧ ဆၧလၧၫ့ဆၧဎွ့ၩ လအီၪလၧၩ့ဘၪအကၠီၩ့တၭ လီၩ့ဎွါထဲၩ့လးကျဲၩ့အၥၫ့ အၪ့နၩ့လၫ့ခရၧၫ့ ဂဲၫထဲၩ့ၥုၭအီၪထဲၩ့အၥၭ မုဆၫကနံၩယီၩ ပကဒၪဘၪ ၦဖျိၩ့ဆၨၩဖိၪၥံၪလဖၪ အီၪပျံၩပျၩဎံၩ့လးလၧ ခးအ့ၩၡၩအလးကိၭစီၪ့ဒ့ၭနီၪလီၫႉ