ၦထၧၫ့ဖုဝဲဖျိၩ့ဆၨၩကဆၨၩမွဲဝ့ၫ ဖျိၩ့ဘွၩအဂဲး

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ မုကနွ့ၫယီၩ ယမိအၪ့နၩ့လီၩဖ့ၪနဲၪဘၪနၥံၪ ၦထၧၫ့ဖုဝဲဖျိၩ့ဆၨၩကဆၨၩမွဲဝ့ၫ လၩ့အဲၪဝ့ၫဒၪ ဖျိၩ့ဘွၩဆၨၩဖိၪၥံၪအဂဲးနီၪလီၫႉဖျိၩ့ဘွၩယီၩ ကိၭဝ့ၫဒံၭလၧခဲၫ့ကမံၩ့နီၪမွဲ ဖျိၩ့မဲပု နီၪလီၫႉ ဖျိၩ့ဘွၩဆၨၩဖိၪၥံၪယီၩ ပအီၪလၧထံၫထၪကျိၩ့ ဖျိၩ့ဖိၪၥံၪလဖၪ မွဲလပနါဂၧၫ့ယံၫယါဘၪနၬဒဲ ၦဖျိၩ့ဆၨၩဆၬ ၁၁ ဆၨၩအဖၧၩ့နီၪ ဖျိၩ့ဘွၩမွဲ ပၫဝ့ၫဆ့နီၪလီၫႉ ဖျိၩ့ဘွၩဆၨၩဖိၪၥံၪယီၩ အီၪလၧ ပၠ့ၩမနၩမုထၪ့ကကဲၩ့ခီၫ ဘဲၫယီၩ ဆၧကိၭဝ့ၫလၧ န့ၫပၠ့ၫတီၫခးဒီၪ့နီၪ ကယဲၩ့ဝ့ၫဖိၬဘိၭ ၂၀မံလၬ ခိၪလီၩ့ခိၪလးကျဲၩ့လဖၪနီၪဂီၩ့ ဖျိၩ့ဘွၩအတဝၫ့ကအီၪဖိၬဘိၭ ၇၀-၈၀နီၪလီၫႉ ၁၉၃၄နံၪ့ ခိၪလၩဘွၩ အဆၧအၪ့ဎၬလီၩ့ဎွါ မၩနဲၪထၬဝ့ၫအဖၧၩ့ ဖျိၩ့ဘွၩဆၨၩဖိၪၥံၪနီၪ ခီၫလၧ ၁၆ယၩဒူၩအထီဒၪအိၩ အီၪထၬဝဲၩလၧ ယမဲၥ့ၩဒဲ ပၠ့ၩမနၩလးကျဲၩ့နီၪအကၠီၩ့ ပၥ့ၪယၫဘၪနီၪလီၫႉ အဝ့ၫၥံၪနီၪမွဲ ၦလၧအၥုၪ့ ၥ့ၭအထံၭဒဲ ဒံၪ့ၥံၪလဖၪအကၠီၩ့ ကွ့ၭနဲၪ့ထၬဝ့ၫဒံၭနီၪလီၫႉ

ဖျိၩ့ဘွၩအၪဒၪဆၧနီၪမွဲ ဖျိၩ့ဘုၭဒၭ ဒဲ အ့ၩဂလံၫကၫ့ဆၧဘိၪ့ဆၧဘၩဖိၪၥံၪႇ တဝၫ့လနၩ့နၩ့နီၪ မွဲ ကဲၭၥလံၬဆၧအီၪကီၪ့ဖိၪၥံၪဒဲ လနၩ့နၩ့နီၪဘိၭမွဲ န့ၭခၠ့ၩဎရံၬဖိၪၥံၪနီၪလီၫႉ အထီဘဲၫယီၩ ဖျိၩ့ဘွၩအတဝၫ့အီၪဝ့ၫ (၇၈) တဝၫ့အကၠီၩ့ ပၥ့ၪယၫဘၪနီၪလီၫႉ လၧပၠ့ၩမနၩမုထၪ့ ဖက်ပေါင်းလောင်းခိၪလီၩ့လးကျဲၩ့လဖၪနီၪ မွဲဒီၩ့ဝိၩၥံၪ ၥဲၪ့ၥံၪလအီၪဘၪဒဲ အီၪမွဲဖျိၩ့ဘွၩၥံၪလီၫအကၠီၩ့ လၩ့ဆၫ့ဝ့ၫအၪမၬလီၫႉ လၧခိၪလီၩ့ဖၭထီၪ့အဖၫ့ခိၪ ဖျိၩ့ဘွၩၥံၪဘၪအီၪၥၭမၧၫ့ဝ့ၫဒၪအဂဲးနီၪ ခိၪလီၩ့လးကျဲၩ့လဖၪနီၪ မွဲတဝၫ့ဆံၫ့ ဖျ့ၪအကၠီၩ့ နဲၩ့ကၠၭဝ့ၫဒၪနီၪလီၫႉ အ့ၪမွဲဆၧဆၧၩ့အခၫ တဝၫ့လၧအအီၪခိၪလီၩ့ခိၪလဖၪ ဆၧၥလိၪၥလံၬထီးအလူၬနီၪ မွဲထဲၩ့ပၫထဲးဎုၬ လၧ ဆၧဆၧၩ့အကၠီၩ့ အယီၩမွဲ ဖျိၩ့ဘွၩၥံၪ အဆၧဆီၪ့မီၪ့နီၪလီၫႉ

ဖျိၩ့ဘွၩဆၧချဲၩ့နီၪ ကိၭ ၦၡၩနီၪ လၧဖျိၩ့အကၠီၩ့ ဖျိၩ့ဘွၩအလူဆၧချဲၩ့နီၪ မွဲလၩ့ဂၬထဲၩ့လၧ ဖျိၩ့ၡိဆၨၩအကၠီၩ့ နဲၩ့ထၬဝ့ၫလီၫႉ ဖျိၩ့ဘွၩလၧအနဲၩ့ဘုၭဒၭလဖၪၥံၪနီၪ မၩထၪ့ဆၧအၪ့ဎဲၩ့လုၫလါ ထီးမုဆၫကနံၩယီၩဒံၭနီၪလီၫႉ အ့ၪမွဲဘိၪ့ထၪ့ဘၩထၪ့ ကလိၬအခၫ ဘဲၫထၧၫ့ဖုဝဲဖျိၩ့ဆၨၩအဂူၫဂၩၥံၪအၥိၭ မၩဝ့ၫလၧ ဆၫ့ ႇ ထိၭ ဒဲ ခီၫရ့ၫၥံၪနီၪလီၫႉ ၥၧၫ့နံၪ့ လံနံၪ့ကကၠၪ အၪ့ဎဲၩ့နီၪလီၫႉ ဖျိၩ့ဘွၩၥံၪ အ့ၪမွဲအၪ့ဎဲၩ့အခၫ  ၦဂူၫဂၩၥံၪဂဲၫဘၪလၧ တဝၫ့ဖၧၩ့အ့ၬနီၪလီၫႉ ဖျိၩ့ဘွၩၥံၪလဖၪ ၦခွၫၥံၪလဖၪအမ့ၬယၫနီၪ ထံၭလၩ့ကိၭယံၫယါဝ့ၫလၧ လ ဒဲ ၦမုၪၥံၪလဖၪအမံၩ့အမ့ၬယၫနီၪ ကိၭယံၫယါဝ့ၫလၧ အ နီၪလီၫႉ

အထီဘဲၫယီၩ ဖျိၩ့ဘွၩဆၨၩဆၬ ဖိၪလံၩၥံၪအၪဒၪဆၧနီၪ ဘၪအီၪအၪနၬလၧပယၩ့လဖၪအကျၩတၭ ချဲၩ့ထၪ့အဝ့ၫၥံၪ အဆၧချဲၩ့နီၪ ဂဲၫလၩ့ၡၩထၪ့ကဆံၭဆံၭနီၪလီၫႉ အဝ့ၫၥံၪအဆၨၩအမံၩ့လဖၪမွဲဝ့ၫ ပခွၫၥံၪအဂး စီၩ ဒဲ ၦမုၪၥံၪအဂးနီၫ နီၪ ကဘၪကိၭဎုၬ ဝ့ၫလုၫလါယီၩ လၩ့မါထၪ့ယူၭနီၪလီၫႉ ဆၧကဲၪထၪ့ဝ့ၫဘဲၫယီၩၥိၭနီၪ မွဲဖျိၩ့ဘွၩကဆၨၩလီၫ လကၭဘၪဒဲ ဖျိၩ့ဆၨၩ အဂူၫဂၩၥံၪနးဆ့ အၪဒၪဆၧမွဲၥိၩ့ထၪ့ဒၪလၧ ဒိၩ့ဝိၩအဆၧချဲၩ့လီၫအကၠီၩ့ ထံၫယဲၩ့ခးယဲၩ့ကိၪ့ၥ့ၪလဖၪ ၥ့ၪယၫကၠၭဝ့ၫနီၪလီၫႉ မွဲယူၭ ဖျိၩ့ဘွၩဆၨၩဖိၪၥံၪယီၩ မွဲဖျိၩ့ဆၨၩလၧအအီၪခိၪလီၩ့ခိၪအကၠီၩ့ ဆုးအီၪဂုးခၧၫ့ဝ့ၫဘဲၫဒံၭနီၪလီၫႉ