၇၃ ဘျၩ့လဘျၩ့ ၦဖျိၩ့မၫတုရၫမုနံၩ

“ပဒူၭထၪ့ဆၧဂီၩ့ ပၥံၫနီၪ ဂ့ၩဒိၪနၭန့ဒံၭ ပအီၪၥၭမၧၫ့ဂီၩ့ ပဘၪကဲၪၦၡၩအဎီးဒံၭ” ဘဲၫလီၩဝ့ၫအၥိၭ မၩဝ့ၫ ၦဖျိၩ့မၫတုရၫ စီၩဘၭအူၩကၠံၩႉႉႉႉႉႉႉႉ

                 ၂၀၂၃နံၪ့ လၩ August 12 ၥၫ့ယီၩ မွဲကထီၩ့စိၩထဲၩ့ဝ့ၫဒၪလၧ ၇၃ ဘျၩ့လဘျၩ့ ၦဖျိၩ့မၫတုရၫ မုနံၩအကၠီၩ့ အဆိၪထုၬ ယမိအဲၪဒိၭအၪ့နၩ့လီၩဖ့ၪနဲၪဘၪနၥံၪ ပအဲၪကွံၩယူၭယၪ့ဘၪၦဖျိၩ့မၫတုရၫလဂၩမွဲဝ့ၫ စီၩဘၭအူၩကၠံၩအဂဲး ကဆံၭကခ့ၭဖိၪနီၪလီၫႉ စီၩဘၭအူၩကၠံၩယီၩ အီၪဖျဲၪဝ့ၫဒၪလၧ ၁၉၀၅နံၪ့ လၩ အီၭတိၫဘၫ ၇ၥၫ့ ထံၫထၪကျိၩ့ခးဒီၪ့ ဘူၭလၧဒိၩ့ပၥံၫ့ ဘဲကယဲၭတဝၫ့ ပၥထ့ၫအဂံၪ့ဒီၪ့ ၦလၧအခိၬလးဆံၬလးအီၪအၪဒဲ ဖျိၩ့ၡၩ့ၦဎရံၬဖိၪလီၫႉ အဖါဖါၥၭဘီၩ့နီၪ အမံၩ့ စီၩၥၫမၠၭကၠံၩ မွဲဝ့ၫ တဝၫ့ခိၪနါလဂၩဒဲ အမိမိၥၭဘီၩ့နီၪ မွဲဝ့ၫ နီၫအ့ၩနုနီၪလီၫႉ ထၧၫ့ဖုဝဲဖျိၩ့ဖိၪၥံၪဧ့ စီၩဘၭအူၩကၠံၩယီၩ မွဲၦလၧအန့ဘၪ ခီၫရး (ရှေ့နေ) ဆၧနဲၪလၩဖၩ့လၧ ခးအ့ၫဂလၫ့နီၪလီၫႉ နံၪ့ ၁၉၃၇နံၪ့နီၪ ဂဲၫထဲၩ့ထဲၩ့လၧ ခးပယၩ့ဖၧၩ့ဂီၩ့ ဘၪအၪ့န့ထၪ့မူၩဒၩလၧ ဘၭမီၫပဒိၪခရၧၫ့ ပအၪ့ကံၩ့ဆၧအခီၫ့ခၩ့ဒိၪ အလးႇ ၁၉၄၇နံၪ့နီၪ ဘၪအၪ့န့ထၪ့  ဆၧဒုၭၥ့ၪယၫထဲၩ့ဆၧ ခၩ့ဒိၪအလး(ပြန်ကြားရေးဝန်ကြီးဌာန) ႇ ၁၉၄၇ နံၪ့နီၪ ဘၪအၪ့န့ထဲၩ့မူၩဒၩလၧ ဆၧၥိၫ့ထုၬၥိၫ့လၩ့ဒဲ ဖၧၩ့ၥၭဆဲၩ့ဘုၭခၩ့ဒိၪအလး (vrf;yef;qufoG,f a&;0efjuD;)  ဒဲ လၧပဒိၪၥံၪကၠၧၫ့ကၠၧၫ့ ဖီၪ့ထၪ့ဖံၭထၪ့ဆၧမၩအၪမၬနီၪလီၫႉလခဲၫ အဝ့ၫစဲၪ့ထၪ့လၧပဒိၪအခရၧၫ့ ဖၧၩ့ဂီၩ့  ထီး ၁၉၄၃နံၪ့ လၩ ဖ့ၫဖူၫဝၫရံၫနီၪ ၦဖျိၩ့ဆၨၩဖိၪၥံၪ ဆၧဖီၩ့ဖျ့ၭကန့အဂး ဖိၬလိၬမၩကဲၪထၪ့ ၦဖျိၩ့ဆၨၩခရၧၫ့ (KNU) လၧဝံးတခိၩ့ဂီၩ့ ထီးအဝ့ၫ ဘၪထိးၥံၫအၥၭအထီ ဘၪအၪ့န့ထၪ့မူၩဒၩလၧ အဆိၪထုၬခိၪနါဒိၪ (ဉက္ကဌ)အလးနီၪလီၫႉ

                 လကၭဒံၭဘၪ ၦဖျိၩ့မၫတုရၫစီၩဘၭအူၩကၠံၩ အီၪက့ၪလၩ့ထးအလူ ဆၧချဲၩ့ (၄) မီၪ့နီၪ မွဲဝ့ၫဒၪ (၁) ပကခွံၬလၩ့စူၪဝဲၩဆၧချဲၩ့ ချဲၩ့နးဆံၭလဂ့ၩ (၂) ၦဖျိၩ့အဆၧဘိၪ့နီၪ ၦဖျိၩ့ကဘၪဖိၬလိၬထၪ့လီၫႉ (၃)   ၦဖျိၩ့အစူၪဝဲၩနီၪ ကဘၪအီၪဒၪလၧ ၦဖျိၩ့အစူၪဖၧၩ့လီၫႉ (၄)  ၦဖျိၩ့ဆၨၩခးဒီၪ့ ကဘၪလၧၫ့ဎွ့ၩဝ့ၫဒၪလီၫႉ

ပလီၩ့လၧ ၦဖျိၩ့မၫတုရၫအခၫ ပကဲၪထၧၫ့ဖုဝဲဖျိၩ့ဖိၪၥံၪလဖၪ ၦဖျိၩ့မၫတုရၫမအီၪဝ့ၫဒၪဎွ့ဂၩလဲၪ ဆၧအၪ့စၪ့အီၪယံၩယါတၭ ပဒိၪစီၩတီၩနံၩလီၩဆၧၫ့ထဲၩ့ ၦဖျိၩ့ဆၨၩအဂး ၦလၧဘၪဖ့ၪလၫ့လၩ့ခွံၬအၥၭလဖၪအစွၪနီၪ အ့ၪပဆုးထၪ့ကဂၩဘၪကဂၩစွါဘဲၫ ခီၫလၧစီၩဘၭအူၩကၠံၩအီၪဖျဲၪအလး ဘဲကယဲၭတဝၫ့နီၪ ထီၩ့စိၩလၧ ခ့ၫအၫ့ယူၫ ၦဖျိၩ့ဆၨၩခရၧၫ့ လးမိထုၪ့အလးလကၭဘၪအကၠီၩ့ လီၩ့ထၬဝ့ၫဒၪနီၪလီၫႉ

 ဘၪန့လဲၪၦဖျိၩ့ဆၨၩဖိၪၥံၪလဖၪ လၩ Aug 12 ၥၫ့ယီၩ ဘၪရွံထၪ့ဝ့ၫလၧ မၫတုရၫမုနံၩလဲၪစွါဘဲၫ မုနံၩယီၩ မွဲဝ့ၫ လၧအဖီၩ့ခွံၬနံၪ့ ၁၉၅၀ဒၪအိၩ လယဲၩ့နၬဘၪလၧ မၠၭဝတံၫ ကီၭကရံၭဝံးဒီၪ့အဖၧၩ့ ကိၫကိၩ့တဝၫ့နီၪ စီၩဘၭအူၩကၠံၩလဂၩ အၥၭအီၪဝ့ၫ ၄၅နံၪ့အထီ ၦဖျိၩ့ခးဒီၪ့ ဘဲၫၥိၭပပၧၩ့ဒၪပၧၩကန့အဂး အဝ့ၫခိးဂဲးခိးဘၭ လူၬဂဲးလါနၫ့ဂ့ၩ လၧဆၧလတီၩလီၩ့ဘၪအဖၧၩ့ ပယၩ့အၥုၭၥံၪမၩၥံၫ အဝ့ၫဘၪဖ့ၪလၫ့လၩ့ခွံၬ အၥၭထၧၫ့ဖျိၫ့ယၫလၧ ဆၨၩအဂးနီၪလီၫႉ မွဲဆၧဘဲၫနီၪ မုနံၩယီၩ ဂဲၫကဲၪထၪ့ ၦဖျိၩ့မၫတုရၫမုနံၩနီၪလီၫႉ

ထၧၫ့ဖုဝဲဖျိၩ့ဖိၪၥံၪဧ့ႇ ၂၀၂၃နံၪ့ လၩ Aug 12ၥၫ့ယီၩ မွဲထီၩ့ဝ့ၫဒၪလၧ ၇၃ ဘျၩ့လဘျၩ့ ၦဖျိၩ့မၫတုရၫမုနံၩယူၭအကၠီၩ့ ၦဖျိၩ့ထၧၫ့ဆၨၩယၫအဂး ၦလၧဖ့ၪလၫ့လၩ့ထၬအၥၭ ၦဖျိၩ့မၫတုရၫလဖၪထီးလူၬ လၧဆၧယူၭယၪ့ပၭကၩဎိၩဒိၪအဖၧၩ့ မွဲပကအီၪနၪ့ထၪ့လၧ ပဆၧဘၩဆိၪဖၪအဖၧၩ့ဒဲ လၩ Aug 12ၥၫ့ယီၩ မွဲထီၩ့ထဲၩ့လၧ ၦဖျိၩ့မၫတုရၫမုနံၩယူၭအကၠီၩ့ ယအဲၪဒိၭလီၩ့နၪ့ထၪ့ထဲၩ့ဘၪထၧၫ့ဖုဝဲဖျိၩ့ဆၨၩၥံၪလဖၪလၧ ဆၧအဲၪကွံၩဎိၩဒိၪအဖၧၩ့နီၪလီၫႉ ဆၧခိးဆၧတၩႉ