၁၉၄၂နံၪ့ ဖျိၩ့ဒဲ ပယၩ့ အဆၧတုၩ့ထၪ့တုၩ့လၩ (၂)

စၭထၪ့လၧ နံၪ့ ၁၉၄၂ နံၪ့ လၩမ့ၫ (၂) ၥၫ့ ဖျိၩ့ဒဲပယၩ့ဆၨၩဆၬအဆၧတုၩ့ထၪ့တုၩ့လၩ့ဖၭဒိၪကဲၪထၪ့နီၪလီၫႉ စၭထၪ့ကဲၪထၪ့လၧ မၠီၩ့မၠၭလးကျဲၩ့ ထီၩ့လၧ ဒနုဖၠူၫမုထၪ့ကကဲၩ့ႇ မုနုၬဖျိၩ့တဝၫ့အီၪလဖၪနီၪလီၫႉ ထီးနီၪ ၦဖျိၩ့ဆၨၩဖိၪၥံၪအီၪဝ့ၫအၪမၬ ထံၫထၪကျိၩ့ဒဲ ထီၩ့စိၩ့ထဲးလၧ ၥၫ့လွ့ၫလးကျဲၩ့အိၩနီၪလီၫႉ

နံၪ့ ၁၉၄၂နံၪ့ ၦထံၫထၪကျိၩ့လးဝၩ့ အဆၧတုၩ့ထၪ့တုၩ့လၩ့အကၠီၩ့ ဘံၫအဲၪအ့ၫဒဲ ၦဖျိၩ့ဆၨၩဖိၪၥံၪလဖၪအကျၩ ကဲၪထၪ့ဒုၪ့ဒၩအထီ ဘၪကျ့ၭစၨၭထၪ့ထဲၩ့ဝ့ၫလၧ ဖျိၩ့ဒဲပယၩ့ ကအိၭလၪ့ထဲၩ့လိၬၥၭအဂးနီၪလီၫႉ ကျ့ၭစၨၭဝ့ၫဘဲၫယီၩအထီ ၦဖျိၩ့ခိၪနါလဖၪနီၪမွဲဝ့ၫ စီၩစံၫ့ဖိၩၥ့ၩႇ စီၩဘၭအူၩကၠံၩႇ မၩ့ဝ့ၩမီၫ့ႇ မၩ့ဘၭခ့ၫဒဲ ၦဖျိၩ့ခိၪနါထီးလူၬ (၁၄) ဂၩဒဲ ပယၩ့ခိၪနါလဖၪနီၪ မွဲဝ့ၫၥုၭခိၪ အီၫ့ဆၩ့ဒဲ ခိၪနါ (၁၆) ဂၩနီၪ လ့ၩခိၪလ့ၩနါဝ့ၫလၧ ဖျိၩ့ဒဲပယၩ့ ဆၧရူၪဆၧမုၬခရၧၫ့ဖၧၩ့နီၪလီၫႉ

ဖျိၩ့ဒဲပယၩ့ဆၧတုၩ့ထၪ့တုၩ့လၩ့ နီၪ တဝၫ့ဖိၪဖျိၩ့ဒဲပယၩ့လဖၪ အၥၭဂံၪ့ဎၫ့အၪမၬ ဘၪဆၧဂၭဂီၩ့မၩပျၩခွံၬဝ့ၫဒၪနီၪလီၫႉ လါနၫ့ အထီဘဲၫယီၩ ၦၡၩမဘၪၥံၫဎွ့ပၥ့ၪလဲၪနီၪ ထံၫထံၫဆၭဆၭ ပကၥ့ၪယၫအဂး လယီၫလၧၩ့ဘၪလီၫႉ လၧဝံးမၠီၩ့မၠၭနီၪ ကဲၭၥလံၬၥၫ့ခၫ ဖၫၥၧၫ့ ပၫစကၩႇ ဖၫၥၧၫ့ ဘလုစံၫယဲၭႇ စံၫ့ဖရၫ့စ့ၭဇ့ၩဘံၩယၩ မံၬထၬမုၪ (၃) ဂၩဒဲ ဖျိၩ့ဆၨၩဖိၪအဂၩ (၁၅၀) ႇ လခဲၫ အခံၫ့ယံၬထၪ့ (၅) ၥၫ့အထီနီၪ လၧကနစိၩကိၩ့တဝၫ့နီၪ ကဲၭၥလံၬဖျိၩ့ဆၨၩဖိၪ အၥၭဘၪၥံၫခွံၬ ဖိၭဘိၭအဂၩ (၄၀၀) နီၪလီၫႉ ဒီၫ့တၫ စံၫ့စံၫဖိၩ နဲၪဖျီၪ့ထၪ့လၧ ခိၪလၩဘွၩစဎွၩလး ဆၫဒီၪမၫ့စမ့အီၪနီၪ ၦဖျိၩ့ဆၨၩဖိၪၥံၪဘၪၥံၫခွံၬအဂၩ (၁၈၄၀) အကၠီၩ့ ပၥ့ၪယၫဘၪလီၫႉ ဘံၫအဲၪ့အ့ၫလးမိထုၪ့ ဆၧကွ့ၭနဲၪအဖၧၩ့ ၦၡၩဘၪထိးၥံၫၥၭထီးလူၬ  ဖိၭဘိၭအဂၩ (၃၀၀၀ဒဲ ၄၀၀၀) အကၠီၩ့ ပၥ့ၪယၫဘၪလီၫႉ အထီနီၪ ဖျိၩ့ဒဲပယၩ့ ကဘၪလိၬအိၭလိၬထၪ့ထဲၩ့လိၬၥၭအဂး ဘၪကျ့ၭစၨၭထၪ့ထဲၩ့ဝ့ၫလၧ ဆၧကၪကၪဂဲၩ့ဂဲၩ့အဖၧၩ့နီၪလီၫႉ

ဘဲၫနီၪအၥိၭ စီၩဘၭအူၩကၠံၩနးဆ့ ဂဲၫမံၩ့ဎိၩၥၪဖျီၪထၪ့ဝ့ၫဒၪလၧ ဖျိၩ့ဒဲပယၩ့ ဆၧဖံၭၥိၭမုၬအဂး ၦလၧအကျ့ၭစၨၭထၪ့ ဆၧအဖၧၩ့ ပၫဝ့ၫလဂၩနီၪလီၫႉ