၁၉၄၂နံၪ့ ဖျိၩ့ဒဲ ပယၩ့ အဆၧတုၩ့ထၪ့တုၩ့လၩ့ (၁)

ထီး ဂၠပၫ့လဂဲၫပၧၩ့ဒံၭဘၪဆၧအထီနီၪ ၦထံၫထၪကျိၩ့လးဝၩ့ဖၧၩ့ ပယၩ့ဒဲ ဖျိၩ့အကျၩ မွဲဆၧကၪဆၧဂဲၩ့လအီၪဘၪနးမံၩ့ဒဲ ကဂၩဒဲကဂၩ အီၪဘဲၫၥိၭထၧၫ့ဖုဝဲဂီၩ့ အီၪဎိၭလၩ့ကၠၭကၠၧၫ့ကၠၧၫ့နီၪလီၫႉ လါနၫ့ ကိၭစီၪ့ ကိၭထီဒ့ၭနီၪ မွဲဆၧဘၪလိၬအိၬ လိၬၥၭကအီၪအ့ၬႉ

နံၪ့ ၁၉၄၂နံၪ့နီၪ (ရဲဘီၫၥိၩ့ချံၭ) ပယၩ့ဆၧပဒၩ့ဆၧၥုၭ (ဘံၫအဲၪအ့ၪ) ဒဲ ဂၠပၫ့ၥုၭလဖၪ ဂဲၫနုၬလၩ့လၧ ခပယၩ့ဖၧၩ့ယီၩအခၫ အီၪဂဲၫလၧပၫ့လဲၪဖၧၩ့ ၥုၭဖျီၩ့ကဖျီၩ့နီၪ ဂဲၫနုၬလၩ့လၧ ထံၫထၪကျိၩ့မုနုၬကကဲၩ့ခီၫနီၪလီၫႉ ခိၪလၩဘွၩၥုၭလထဲၩ့စဲၪ့လၫ့ဒံၭ ဘၪအထီ ခပယၩ့ဖၧၩ့ယီၩ ၦဖျိၩ့ၥုၭဖိၪအီၪဝ့ၫ အဂၩ နံၫလၬဘျဲၪနီၪလီၫႉ ဂၠပၫ့ဒဲ ဘံၫအဲၪအ့ၪၥုၭလဖၪ ကအီၪအဂၩ (၅၀၀)  ဂီၩ့ ဂဲၫထီၩ့လၧ မအူၪပ့ၫ ဂီၩ့ကဆၫ့ ထီၩ့ထဲၩ့လၧ ဝံးမၠီၩ့မၠၭနီၪလီၫႉ အခံၫ့အထီနီၪ အဝ့ၫၥံၪ ဘံၫအဲၪအ့ၫၥုၭဖိၪလဖၪနီၪ ကိၭလၩ့အၥၭလၧ ကဆါ လၧပယၩ့ခီၫနီၪဘိၭ ၥခ့ၫ လၥၨၩႉ

ဖျိၩ့ဒဲပယၩ့ အဆၧတုၩ့ထၪ့တုၩ့လၩ့ဘၪဂဲၫကဲၪထၪ့ဝ့ၫဒၪ အဂဲးနီၪ မၠီၩ့မၠၭခးရ့ၫ အံၪ့မဲဝံးဒီၪ့  လၧစပၩရိၩ ဖျိၩ့တဝၫ့နီၪ ဘၪထွ့ၫဒၪလၧ လးကျဲၩ့ ၥုၭခိၪဒိၪကခရၧၫ့နီၪ လ့ၩလီၩ့လၩ့ချဲၩ့လၩ့ ဖျိၩ့ဒဲပယၩ့ဆၧဖံၭၥိၭမုၬဂီၩ့အခၫ ဘဲၫၦခမျၧးၥံၪလဖၪ မၩဂဲၩအၥၭလဘၧၫ့ဘၪအဂး ဘၪထွ့ၫဒၪလၧလးကျဲၩ့ ပၧၩဘၪပၧၩ့ဆၧ ဘံၫအဲၪအ့ၪၥုၭလဖၪနီၪ တခၩဒၪၦၡၩ အစူၪဝဲၩအီၪလဖၪနီၪ ကဘၪဂဲၫဖ့ၪလၪ့အ့ၪအဝ့ၫၥံၪထီးအလူၬ အခံၫ့ (၃) ၥၧၫ့အဖၧၩ့လီၫႉ အ့ၪမွဲ ပၧၩလၧလဂဲၫ ဖ့ၪလၪ့ဘၪလဖၪနီၪ ကဘၪထိးဆၧမၪလံၩ့လဲၪဎိၩဒိၪလီၫႉ ဆၧအီၪကီၪ့ဂီၩ့ ဂဲၫထဲၩ့ ခိၪလၩဘွၩၥုၭဖိၪအလံၩ ၦဖျိၩ့ဆၨၩဖိၪလဂၩ လၧစပၩရိၩတဝၫ့အခံၫနီၪ ခၬၥံၫဘၪ ဘံၫအဲၪအ့ၫၥုၭဖိၪလဂၩနီၪလီၫႉ ဂီၩ့နီၪ ဘံၫအဲၪအ့ၫၥုၭလဖၪ လ့ၩလၧ စပၩရိၩတဝၫ့နီၪဂီၩ့ ဎုလၪ့ခွံၬဝ့ၫလၧမ့ၪထီးတဝၫ့ယၫလီၫႉ ထီးနီၪလၧ ဝံးမၠီၩ့မၠၭ ဖျိၩ့ဒဲပယၩ့လဖၪ အၥၭဘၪၥံၫခွံၬအၪမၬလီၫႉ အၪဒၪဆၧ ကဲၭၥလံၬဎံရံၬ ဖျိၩ့ဖိၪၥံၪလဖၪဒဲ ၦဖျိၩ့ခၩ့ဒိၪစီၩဖ့ၫၥၪအဂံၪ့ဒီၪ့နးဆ့ ဘၪထိးမၩၥံၫအၥၭ ထီးအလူၬနီၪလီၫႉ