အခံၫ့နီၪ ကချဲၩ့ထၪ့ဝ့ၫလီၫ

လၧဖျိၩ့ဖျိၩ့အိၩ ထံၫပျၧၩ့ကပျၧၩ့နီၪ ဒ့ၪမိဎွါအီၪဝ့ၫကဘံၪ့လီၫႉ ဆၧဂဲၫဆၧၩ့လၩ့ၥၫ့အခၫ ဒ့ၪမိဎွါနီၪ ဒံၪလၩ့လၧ ထံၫပျၧၩ့ခိၪဖဲၩ့နီၪလီၫႉ

ကနံၩနီၪတၭ ဒ့ၪအဒံၪလဖၪနီၪ ဖးလၪ့ ဒ့ၪဖိၪလဖၪ ကွ့ၭၥဲၪထံၫလၧ ပျၧၩ့ဖၧၩ့နီၪလီၫႉ ဒ့ၪဖိၪလဖၪၥံၪယီၩ အခံးအဂၩ့နီၪလၩ့ဂၩဒၪ ယၪဖိၪလီၫတၭ ယၪမိဎွါကဘံၪ့နီၪဒၪဘိၭ စံၭဝ့ၫလၧအဖိၪ ထဲၩ့ကိၭန့ဝ့ၫလီၫႉ

အထီနီၪ ဒ့ၪမိဎွါဒၪတၭ အဝ့ၫစံၭဝ့ၫမွဲအဖိၪဆ့လီၫႉ အနီၭဘိၭ ဒ့ၪမိဎွါဒဲ ယၪမိဎွါၥံၪယီၩ တ့ၭလိၬၥၭလၧ ပဖိၪ ယဖိၪနီၪလီၫႉ ဆၧဖိၪဆၧဎါအဂူၫဂၩၥံၪဂဲၫယိစဲၪ  အ၀့ၫၥံၪတ့ၭလိၬၥၭနီၪ မၩအ့ၪအဝ့ၫၥံၪၥ့ၪနးမံၩ့အ့ၬတၭ ဒ့ၪမိဒဲယၪမိယီၩ ခွံၬလၩ့အၥၭလၧ ကခိၭနၪ ၦကိၪ့ၥ့ၪဒ့ၪကခွံၬလၩ့အလူနီၪလီၫႉ

မွဲဆၧဘဲၫနီၪ အလိၬၥၭနံၫဘံၪ့ယီၩ လ့ၩထီၩ့လၧ ပကိၪ့ၥ့ၪဒ့ၪအီၪလီၫႉ ၦကိၪ့ၥ့ၪဒ့ၪယီၩ ခိၭနၪအဝ့ၫၥံၪအဂဲးအဖးဂီၩ စံၭဝ့ၫ စီၪခိဆၧနၩ့မံၩ့ကစ့ၩ အခံၫ့နီၪ ကချဲၩ့ထၪ့ဝ့ၫဒၪလီၫႉ ဒ့ၪမိဒဲယၪမိနီၪ မွဲနၪ ၦကိၪ့ၥ့ၪဒ့ၪအဆၧချဲၩ့နီၪ လၥ့ၪဘၪလီၫႉ လါနၫ့ အၥိၭနံၫ့ဘံၪ့ယီၩ မွဲမၩဝ့ၫၥ့ၪနးမံၩ့လၧၩ့ဘိၭ ဘၪထိဆၧၫ့ဝ့ၫလီၫႉ လါနၫ့ အခံၫ့ယံၬထၪ့ကဆံၭအခၫ ဒ့ၪဖိၪနီၪ အစူၪအခၪ့စဲၪ့လၪ့ဂီၩ ကဲၪထၪ့ ဒ့ၪကကူၭ ယၪကကူၭနီၪလီၫႉ လခဲၫထုၬ ကဲၪထၪ့ခွံၬ ဒ့ၪထီးလူၬဂီၩ့ လ့ၩထၪ့ဖုၪလၧ ခီၫၥွံၪခိၪနီၪလီၫႉ အနီၭမၬ ဒ့ၪမိဎွါနီၪ နၪၥ့ၪလၪ့ထဲၩ့ ၦကိၪ့ၥ့ၪဒ့ၪအဆၧချဲၩ့ အခံၫ့နီၪ ကချဲၩ့ထၪ့ဝ့ၫလီၫ နီၪလီၫႉ

ထၧၫ့ဖုဝဲမုၪခွၫၥံၪဧ့ ယအဲၪဒိၭလီၩ့အ့ၪဘၪနၥံၪ ၡါဖိၪယီၩ အမံၩ့နီၪမွဲ အခံၫ့နီၪ ကချဲၩ့ထၪ့ဝ့ၫဒၪလီၫ ၡါဖိၪနီၪလီၫႉ  ၡါဖိၪယီၩ ဖ့ၪလၪ့ပၧၩ ဆၧၥ့ၪယၫနၪၥ့ၪ  တခၩဒၪပကမၩထၪ့ဆၧနးမံၩ့နီၪ ပကဘၪဒၪခီၩ့ဆၧၫ့ယၫ ဆၧကၪဆၧဂဲၩလဖၪ ကိၭမံၩ့ဒ့ၭလီၫႉ လါနၫ့ ဆၧကၪဆၧဂဲၩလဖၪယီၩ ထီးပထိးစၪပၥၭလဂ့ၩဂီၩ့ ပကကျ့ၭစၨၭ ခိးဂဲးခိးဘၭထၪ့လၧ အမ့ၬယၫခီၫစွါဘဲၫ ပကဒိၭန့ဘၪ ဆၧနၧၩ့လၧ ပဆၧၥၭမၧၫ့ဖၧၩ့ အဆိၩအကၠၪနီၪလီၫႉ