လၧၦဖျိၩ့ဆၨၩဖိၪၥံၪအကျၩ ကဲၭၥလံၬခရံၬဖိၪဆၧအီၪကီၪ့ဂဲၫအီၪထၪ့အဂဲး (၃)

ထီးနီၪ ဆၧဂဲၫအီၪဘၪလၪ့ထဲၩ့အခၫ ဖၫၥၧၫ့ ထရိၫလံၫၥၫ့ခၫလဖၪ ဂဲၫထဲၩ့စဲၪ့လၪ့ထဲၩ့ဘၪဂီၩ့ ဂဲၫထဲၩ့ထဲၩ့လၧ ဒိၩ့ပၥံၫ့နီၪလီၫႉ ထရိၫလံၫဂဲၫထဲၩ့ထဲၩ့အခၫ ဒိၩ့ပၥံၫ့ဒဲ မၠီၩ့မၠၭအလး ကျ့ၭစၨၭၥုၪ့ထၪ့ထၬ ၥရိၬလဖၪ ဒၪဘၪဝ့ၫလၧ ဘၪထိးဂုထၬမ့ၪအၪ့ဂၭဂီၩ့ဂၭစၪဂီၩ့ ဂၭဂီၩ့ဂၭစၪဝ့ၫဒၪ ၥရိၬလဖၪနီၪ ၥုၪ့ထၪ့ထဲၩ့ဝ့ၫဒၪ လဆိလလးကၠၩ့ကၠီးလဖၪ နီၪလီၫႉ

၁၉၅၉နံၪ့နီၪ ဖၫၥၧၫ့ထရိၫလံၫနီၪ ဂဲၫထဲၩ့လၧဝံးတခိၩကဆိဂီၩ့ ဆၧဆီၪ့ဆၧချဲၪ့ဂဲၫဂ့ၩထၪ့ထဲၩ့အခၫ ဂဲၫထဲၩ့ထဲၩ့လၧ မၠီၩ့မၠၭနီၪလီၫႉ အထီနီၪ အဝ့ၫအၥၭအီၪဝ့ၫ (၇၅) နံၪ့ယူၭနီၪလီၫႉ အၥၭအီၪ (၈၄) နံၪ့နီၪ အဝ့ၫမံၫမၫထဲၩ့လၧ ခရံၬနီၪလီၫႉ

လၧဟ့ၩၥတၭခးရ့ၫနီၪ ရိၫမၫ့ကဲၭၥလဲၭခရံၬ ဆၧမၩလိၪလးအီၪဝ့ၫ ထီးလူၬ (၈၂) ဖျိၪ့နီၪလီၫႉ ဆၧမၩလိၪလးလဖၪယီၩ ၥီၪ့လိၪထဲး ၦဖျိၩ့လံၬလဲလါနၫ့ ၁၈၇၂နံၪ့နီၪ ခိၪလၩဘွၩပဒိၪဘၪဖ့ၪလၪ့ဆၧမၩဆၧၩ့ ဆၧအီၪကီၪ့ကၠီးလဖၪနီၪ မွဲလဆုးၥီၪ့လိၪလၧၩ့ဘၪ ဖျိၩ့လံၬနီၪလီၫႉ

ဖၫၥၧၫ့ဂၠီကၫနီၪ လၧဆၧအီၪကီၪ့ဆၧမၩလဖၪအဂး ဖၫၥၧၫ့ထရိၫလံၫအၪ့ကံၩ့ဆၧမၩဆၧၩ့အကၠီၩ့ အဝ့ၫဂဲၫထီၩ့လၧ မၠီၩ့မၠၭဂီၩ့ ဝဲထၪ့ ၦဖျိၩ့ဆၧမၩလိၪလးအခၫ ကဲၭၥလံၬဆၧအီၪကီၪ့ဖိၪ ဂဲၫအီၪထၪ့ (၃၈၀၀) နီၪလီၫႉ ဘဲၫနီၪအၥိၭ ဖၫၥၧၫ့ အၪ့ဂၠ့ၫလုနးဆ့ ကဂဲၫဖီၪ့ထၪ့ဖံၭထၪ့ ဆၧအီၪကီၪ့အဆၧမၩအဂး အဝ့ၫအၥၭအီၪ (၂၂) နံၪ့နီၪ ဂဲၫထီၩ့ဝ့ၫလၧ ဖျိၩ့ဆၨၩခးဒီၪ့နီၪလီၫႉ အဝ့ၫနီၪ ဘၪအၪ့န့ထၪ့မူၩဒၩလၧ ဝံးတခိၩ့စံၪ့ပီၩ ကၠီးခိၪဒိၪလကၭဘၪ ၥုၪ့ထၪ့ထၬဒံၭလၧကၠိၭပ့ၫကီၭနီၪ ကဲၭၥလံၬဆၧအီၪကီၪ့ၦမုၪတၩ့ထီၫ့ဆၧမၩလိၪလးနီၪလီၫႉ ဆၧမၩလိၪလးနီၪ ဖၫၥၧၫ့ လူၩဝ့ၭ ဘၪဆုးဖီၪ့ထၪ့ဖံၭထၪ့နီၪလီၫႉ ဘဲၫနီၪအၥိၭ ဖၫၥၧၫ့အလဲဇၩ့ဒၩကၫဒီၭနးဆ့ အၥၭအီၪဝ့ၫ (၂၂) နံၪ့အထီ ဂဲၫထီၩ့ဝ့ၫလၧ ခးပယၩ့ဂီၩ့ မီၫလမၠဲၫ့ စံၫ့ပၭထရံၭၥရိၬမွဲဂ့ၩႇ စံၫ့ဂၠိၩစဲၭကွၩ့ဘးတၩ့ထီၫ့ဆၧမၩလိၪလးမွဲဂ့ၩႇ တခိၩ ၦဖျိၩ့မုၪဆၧကဲၪထၪ့ဆရၫကၠီးလဖၪ အဝ့ၫလ့ၩခိၪလ့ၩနၭဝ့ၫနီၪလီၫႉ