လၧၦဖျိၩ့ဆၨၩဖိၪၥံၪအကျၩ ကဲၭၥလံၬခရံၬဖိၪဆၧအီၪကီၪ့ဂဲၫအီၪထၪ့အဂဲး (၂)

နံၪ့ ၁၉၃၃ နံၪ့နီၪ ဖၫၥၧၫ့ ဘၫထရၫ့အဆၧကျ့ၭစၨၭခိးဂဲးခိးဘၭအကၠီၩ့ ဝၩခဲၫမၭဝံးဒီၪ့ ကနစိၩကိၩ့တဝၫ့နီၪ မၩကဲၪ့ထၪ့ကဲၭၥလံၬခရံၬဖိၪ ဆၧအီၪကီၪ့န့ထၪ့ ဂ့ၩဂ့ၩဘၪဘၪလီၫႉ လၧကနစိၩကိၩ့နီၪ ၥုၪ့ထၬဝ့ၫ ၦခွၫကၠီးဒဲ ၦမုၪကၠီးနံၫကၠီးဒဲ ၥရိၬနီၪလီၫႉ ၦလၧအနဲၩ့ထၪ့ခရံၬကဲၭၥလံၬဂဲၫအီၪထၪ့အဂၩ (၁၀၀) ဘျဲၪဂီၩ့ ၦဖျိၩ့ဆၨၩကဲၭၥလံၬၥၫ့ခၫ ဂဲၫအီၪထၪ့ (၃၈) ဂၩနီၪလီၫႉ လၧထံၫထၪကျိၩ့ၦဖျိၩ့တဝၫ့လဖၪနီၪ ကဲၭၥလံၬၥရိၬထီးလူၬ အီၪဝ့ၫ (၂၀) နီၪ ၥံၪ့ဎွံၪဒူၭႇ ၦခွၫလဖၪ ဆၧၥီၪ့လိၪလံၬလးႇ ၦမုၪလဖၪ ဆၧၥီၪ့လိၪလံၬလးလဖၪႇ ၦမွံၩအီၪအလးလဖၪ ဂဲၫအီၪထၪ့ဝ့ၫဒၪလီၫႉ အဆိၪထုၬ ၦဖျိၩ့ဆၨၩဖိၪၥံၪ လဖၪလၧဂဲၫထဲၩ့အၪ့လဲၩ့ထၪ့ထဲၩ့အၥၭလၧ ကဲၭၥလံၬခရံၬဖၧၩ့လဖၪနီၪ ကအၪ့ကံၩ့ဘၩဆိၪဖၪ ဆၧအဂး ၥရိၬနီၪ ၥၧၫ့ထၪ့ဝ့ၫဒၪလၧ ၥံၪ့ ဝၪၥံၪနီၪလီၫႉ

ထီးနီၪ နံၪ့ ၁၉၃၁နံၪ့နီၪ ခးပယၩ့ထၧၫ့ဘံၪ့ယၫ ကဲၭၥလံၬဆၧအီၪကီၪ့ဖိၪ ထီးလူၬ အီၪဝ့ၫအဂၩ (၈၉၆၇၈) ဂၩအဖၧၩ့ ၦဖျိၩ့ဆၨၩပၫဝ့ၫဒၪအဂၩ (၄၁၂၉၄) ဂၩနီၪလီၫႉ ဆၧအီၪကီၪ့ဖိၪၥံၪလဖၪယီၩ ၦလၧမၩဆၧအီၪကီၪ့ဆၧဖံၭဆၧမၩခိၪနါ ပၠံၫၥ့ၭဆၨၩဖိၪ (၁၃) ဂၩဒဲ ၦဆၨၩဆၬဖိၪ (၃၃) ဂၩ ဘၪလ့ၩခိၪလ့ၩနါဝ့ၫနီၪလီၫႉ လၧကဲၭၥလံၬ ဆၧၥီၪ့လိၪလံၬလးလဖၪ ဆၧမၩလိၪဖိၪအီၪဝ့ၫ (၈၅၀၀) အဖၧၩ့ ကဲၭၥလံၬခရံၬဖိၪ ပၫဝ့ၫဒၪ အဂၩ (၃၆၈၂) ဂၩနီၪလီၫႉ အီၪထး (၁၀၅၂) ဂၩနီၪ မွဲဝ့ၫ ၦဖိၪဎွ့ၪဖိၪၥံၪလဖၪတၭ ၥီၪ့အ့ၪဝ့ၫလံၬအပျီၩ့နီၪလီၫႉ ကဲၭၥလံၬဆၧမၩလိၪလံၬလးလဖၪ ဂဲၫအီၪထၪ့အကၠီၩ့ ၦထံၫထၪကျိၩ့ဖျိၩ့ဆၨၩလဖၪ ၥ့ၪလံၬ ဆၧကိၪ့ဘၪကိၪ့ၥ့ၪ ဂဲၫထၪ့ထီၫ့နီၪလီၫႉ

လါနၫ့ (၁၉၅၂) နံၪ့နီၪ ခိၪလၩဘွၩ-ပယၩ့ ဆၧဒူၭၥူၭကဲၪထၪ့ နံၫဘျၩ့လဘျၩ့အခၫ ဆၧလီၩ့ဖီၪ့ အုရီၩပၭဆၨၩဖိၪလဖၪအကၠီၩ့ ဖၫၥၧၫ့ ထရိၫလံၫဒဲ ကဲၭၥလံၬၥၫ့ခၫလဖၪ ဘၪထိးဖီၪ့အၥၭဂီၩ့ ဆၧထဲၩ့န့လၧ အမရၭပူၫရၭနီၪလီၫႉ