လၧဆၧလီၩဆိၩလၬဆိၩဖၧၩ့ ၦဖျိၩ့ကျိၪ

ထၧၫ့ဖုဝဲမုၪခွၫၥံၪဧ့ႇ လၧဖျိၩ့ဖျိၩ့အိၩ ဖူၫအမံၩ့မွဲဝ့ၫ ဖူၫမီၫတီၩ အီၪဝ့ၫကဂၩတၭ မၩအၪ့ဖံၭအၪ့ကၠၧၫ့ကၠၧၫ့လၧ အဖိၪမုၪ ဖိၪခွၫၥံၪလီၫႉ  လယဲၩ့နၬဘၪလၧ အဝ့ၫၥံၪအဎုၬလးနီၪ ဖူၫအမံၩ့မွဲဝ့ၫ ဖူၫထီနၫဒဲ အဖိၪၥံၪအီၪဝ့ၫလီၫႉ ဖူၫထီနၫဒဲ အဖိၪၥံၪလဖၪနီၪ ဖိၬလိၬကျိၪၥ့ၪဝ့ၫနၭဒ့ၭလီၫႉ လၩ့ဆၫ့ဝ့ၫဒၪကမံၩ့နီၪ အဝ့ၫၥံၪနီၪ အမ့ၬခဲၫပၪဘဲၫၥိၭ ဆၧအူၭလီၫႉ

ထၧၫ့ဖုဝဲမုၪခွၫၥံၪဧ့ႇ ဖူၫထီနၫအဖိၪၥံၪလဖၪယီၩ ဂဲၫအၪ့ဂူၫအၪ့ယုၩယါ ဖူၫမီၫတီၩအဘုၪလီၫႉ ဖူၫမီၫတီၩဝ့ၫ ဘၪထိးအၪ့ဂူၫအဘုၪဘိၭ အၪ့ဎၬထၪ့ဝ့ၫ ကဘၪဖီၪ့ဆၧအၪ့ဂူၫဘဲၫၥ့ၪလဲၪနီၪလီၫႉ  လခဲၫ ဖူၫမီၫတီၫနီၪ လ့ၩအၪ့န့ ဆၧဎါဖိၪလၧ ဖျိၪ့ဒိၪ့နီၪဂီၩ့ ထံၭလၩ့ထၬဝ့ၫလၧ အနၪဖူၫခိၪထိၭတၭ ကျဲၩ့မၩအၥၭဘဲၫ ပၧၩအၥံၫစွၪလၧဂီၩ့ မံၫလၧ အဘုၪပိၩ့အနဲၩ့ထံၭလီၫႉ မုမ့ၬဂဲၫထီၩ့လၪ့အခၫ ဖူၫထီနၫ အဖိၪ ဆၧအူၭလဖၪ ကအၪ့ဂူၫဘုၪအဂး ဂဲၫထီၩ့ဝ့ၫလီၫႉ

ဂဲၫထီၩ့လၧ ဘုၪပိၩ့နဲၩ့ထံၭအခၫ ဒၪဖူၫမီၫတီၩ မံၫတၭ အီၪခိၬဝ့ၫယံၬလါနၫ့ မွဲဒၪဝ့ၫ ဂၬထုၪ့လၫ့နးကၠၪဘိၭ လ့ၩယိဝ့ၫလၧ အနဲၩ့ထံၭကကၠၪ ဒၪဆၧဎါဖိၪအီၪလၧ ဖူၫမီၫတီၩအနၫဖၧၩ့တၭ စီၪဝ့ၫ ၥံၫယူၭလီၫႉ

အနီၭဘိၭ ဆၧအူၭလဖၪ အခိးတၩဎိၩဒိၪအီၪဝ့ၫဖူၫမီၫတီၩၥံၫတၭ အၥၭမုၬအ့ၬ ဂၪ့ကၠၭဒဲထဲၩ့ယိန့ဝ့ၫလၧ အဂံၪ့လီၫႉ ထဲၩ့န့ဝ့ၫထီၩ့လၧအဂံၪ့အခၫ ကမၩအ့ၪဝ့ၫဆၧၥံၫ ဆၧထံၫလၩ့ဒီၪလၩ့အဂး ထဲၩ့ထုၬထၪ့အကျိၪဖၭဒိၪလီၫႉ အဎိၩအဆံၭန့ၫဎီၩ့ဝ့ၫဒၪ ကျိၪ (၃) ဖျိၪ့နီၪ ကၠၧၩ့ကၠီထၬဝ့ၫလၧ ဖီၫၥံၪလဖၪဂီၩ့ ဖူၫမီၫတီၩအၥံၫစွၪနီၪ အီၪက့ၪထၬဝ့ၫလၧ ကျိၪအဖၩ့ခိၪနီၪလီၫ

ႉ ဆၧထံၫလၩ့ဒီၪလၩ့ယီၩအဖၧၩ့ စၭထၪ့ဝ့ၫလၧ ထၩလီၫႉ ဆၧအူၭလဒုၪနီၪ ဂၪ့ ကိၭၡါထၪ့အလူ ပအၪ့ဂူၪအၪ့ ဘၪ ဖူၫမီၫတီၩအဘုၪ ဘဲၫယီၩ ခွံၬၡိၬထးပၧၩယူၭ   အခၫ ဖူၫမီၫတီၩလဂၩ ဆၧမိနံအၥၭ အီၪမွဲန့လၧၩ့ဘိၭ နံဝဲၪထၪ့ဂီၩ့ အၪ့စၪ့ဝ့ၫ နၥံၪမၩမန့လဲၪ ကျဲၩ့အၪ့စၪ့ဝ့ၫဘဲၫယီၩၥိၭအခၫ ၦၡၩအၥံၫဂၬထုၪ့လၪ့ဘိၭ ဆၧအူၭလဖၪ စဲၪ့ဖျိၬထီးလူၬ

ႉ ဖူၫထီနၫလဂၩ အၪ့ကံၩ့အၪ့ယၪထၪ့ ဖူၫမီၪတီၩနီၪလီၫႉ ဘဲၫၦဖျိၩ့လုၫလါထူၫရူၫအီၪဝဲၩအၥိၭ လၧလၥံၫစွၪအနဲၩ့ထံၭ ဆၧပိၭဆၧလၪ့လဖၪ ဘၪထွ့ၫဒၪလၧ ၦၥံၫစွၪလီၫႉ အနီၭဘိၭ ကျိၪ (၄) ဖျိၪ့ဒဲ ဆၧပိၭဆၧလၪ့လဖၪယီၩ ဘၪဆဲၪ့ဒၪ နၧၩလီၫအကၠီၩ့ ဂဲၫၥိၪ့ဖူၫမီၪတီၩ ထီးအထီၩ့အဂံၪ့နီၪလီၫႉ စၭထၪ့လၧ ကနံၩနီၪ ဖူၫထီနၫနးဆ့ အဖိၪၥံၪအၪ့အီၪလဘၪဘၪနီၪ မ့ၬမဲအကၠီၩ့ လ့ၩအီၪထဲၩ့အလးလခဲၫကစီၪ့နီၪလီၫႉ

ထၧၫ့ဖုဝဲဖျိၩ့ဖိၪၥံၪဧ့ႇ စၭထၪ့လၧ မုကနံၩနီၪ ကျိၪဂဲၫထီၩ့လၧ ၦဖျိၩ့ဆၨၩဖိၪၥံၪအီၪ ဘဲၫယီၩၥိၭအကၠီၩ့ ၡါယီၩ လီၩ့ၥ့ၪယၪထၬပၧၩနီၪလီၫႉ