ဘီၪၦၡၩ (၆)

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭနဲၪႉ လၧအဖီၩ့ခွံၬ မုနွ့ၫဒံၭဒၪအိၩ ယအဲၪဒိၭလီၩဖ့ၪနဲၪဘၪနၥံၪ ဘီၪၦၡၩၡါဖိၪနီၪထီၩ့လၧ နးစ့ၩအမိမိ ဂါၥၧၫ့ဘံၩ ထွံၪမၩ့ဆၧနီၪ မနီၫလဲၪ-

ဂါၥၧၫ့ဘံၩ လ့ၩယိဆၧ လၧဆၫ့ၡါအီၪအလးနီၪ လၧဆၫ့ၡါဖၫ့ခိၪ ၥံၪ့ထဲၩ့ဖၭဒိၪကထဲၩ့လီၩ့နီၪ ၥမံၪ့အံၩ့ၥံၪဧ့ ဘီၪဖၭဒိၪကဒုၩ ခိၭလၩ့အီၪတၭ အမ့ၬၥၪအီၪဝဲၫဆရဲၫၥံၪနီၪ ဖၩ့ယဲလၫ့ လၧဆၧခံၭကျၩနီၪႉ အမ့ခဲၫ့ဖၭထီၫနီၪဘိၭ လၩ့ဆဲၩအီၪ လၧဆၫ့ၡါအခိၪလီၩ့နီၪတၭ ဒိၪထိၬလၩ့ဆၧ ကထံၫကထံၫႉ

မၩ့တိၫ့လိၩ့ကၠီၫအၪ့စၪ့စိၩဆၧ ဆၫ့ၥံၪဘၪမနီၫလဲၪ ဘနီၫတၭ အမၫၥၭဘီၩ့စံၭဆၧၫ့ထဲၩ့ ဆၫ့ကတံၩ ဆၫ့ကတီၭ ဘီၪဆဲၩလၩ့အမ့ ယီၫယီၫ ယီၫယီၫ မိကဂၩယီၩ ၥၭမဲၪဘီၪနီၪအ့ၬႉ လ့ၩၥုၭလၫ့အမ့ၬယၫတၭ ချဲၩ့ဒုၪ့ဘီၪ နဂဲၫမၩမနီၫလဲၪ ဘနီၪႉ ဘီၪဖုၪလၩ့လၧ ဖံၭခိၪဂီၩ့ ခွံၬဘျံၭဒၪအၥၭ လၧအလးခဲၫ့ ကဝၪ့တၭ ကဲၪလၫ့ထဲၩ့ၦၡၩလ့ၬႉ အဝ့ၫနီၪ စံၭဆၧဘယီၩႉ ယဂဲၫကိၭယမၫနးစ့ၩ အဝ့ၫကဘၪထဲၩ့ဖိၬယခဲၫ့ႉ နးစ့ၩအမိမိစံၭထဲၩ့ နဂဲၫကိၭဘယီၩန့အ့ၬ ကိၭမုဆဲၫ့နံၩမၬ ဘဲၫပလုၫပလါအီၪအၥိၭ ဂဲၫထၪ့ လၧပမွံၩပၡါၥံၪ ဆၧအုၪဆၧဒံၩ့ၥံၪ ဘဲၫယီနီၪဘိၭ ထဲၩ့ဒၪခလူၬႉ ဘီၪၦၡၩထဲၩ့ဝ့ၫ မံၫ့ၥုၪ့မံၫ့ၥၭႉ

နးစ့ၩၥံၪအမိနီၪ ကိၭစူၭကီၪ့လၫ့တဝၫ့ဖိၪၥံၪကထံၪဎးတၭ ထံၫလၩ့ဒီၪလၩ့ဆၧႉ အဝ့ၫၥံၪကတဲၩ့ဝဲၩထၬ ဆၧအၪ့ဎိၭလၩ့မ့ၩအွံၪၥၧၫ့ဆၧၫ့ ပၫထဲးဎုၬလၧ ၥံၭထံၫဂၬထံၫအဆီၪ့ၥံၪႉ ခိၬနီၪ ကစူၭကီၪ့တဲၩ့ဝဲၩထၬ နိၪခုၪအဆီၪ့အနီၩ့ၥံၪဆ့ဒံၭႉ ကိၭမုဆဲၫ့ ဘီၪၦၡၩၥံၪဂဲၫတၭ ကဒုၭအၪ့ဒုၭအီၩဝ့ၫ အၪအၪဂီဂီလ့ၬလီၫႉ အဝ့ၫၥံၪ မၧၩ့ဂၬထံၫလၩ့ချုၭလၩ့ဒၪကကၠၪနီၪ ဆၧကကဲၪလၫ့လၧယၫပၥ့ၪလဲၪနီၪ ထၧၫ့ဖုဝဲဖျိၩ့ဖိၪၥံၪၥ့ၪယၫ မွဲအ့ၬဧၪႉ အီၪကစုၩ လီၩၦၡၩနးဂၩလဂ့ၩ ဘီၪၦၡၩၥံၪကနါဂၧၫ့ဒီၭႉ

ထၧၫ့ဖုဝဲဖျိၩ့ဖိၪၥံၪဧ့ႇ မုကနွ့ၫယီၩ ပကအီၪပထုၬထၬပၡါဖိၪယီၩ အလးထယီၩဂီၩ့ ၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪဘၪနၥံၪဒဲ ပကဒၪဎီၩ့ထဲၩ့လိၬၥၭလၧ ဆၧထံၪလၩ့ဒီၪလၩ့ဖၧၩ့ယီၩနဲၪႉ