ဘီၪၦၡၩ (၄)

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭနဲၪႉ လၧအဖီၩ့ခွံၬ မုနွ့ၫဒံၭဒၪအိၩ ယအဲၪဒိၭလီၩဖ့ၪနဲၪဘၪနၥံၪ ဘီၪၦၡၩၡါဖိၪနီၪ ထီၩ့လၧ နးစ့ၩၥၭမဲၪဘီၪၦၡၩကအဲၪ့ၥံၫတၭ ကထဲၩ့အဂံၪ့အဂး အၪ့ကံၩ့ကျၭဎီး ဆၧမၩဆၧၩ့နီၪလီၫႉ
နးစ့ၩစံၭ ၦအဒိၪ ကျၭဎီးဧ့ မၩဆၧၩ့ယၧၩ ယမိထဲၩ့ယဂံၪ့ ဘီၪၦၡၩကအဲၪ့ၥံၫအၪ့ယၧၩလီၫႉ ဘနီၪတၭ အၪ့ကံၩ့ဆၧမၩဆၧၩ့လၧ ကျၭဎီးအီၪလီၫၥၨၩႉ ကထုၪ့ဎး ကျၭဎီးစံၭဆၧၫ့ထဲၩ့ ဝ့ၩ ယါႉႉႉယဂၪ့ကိၭအလူနီၪ ၥီၫနၭလ့ၬဘိၭ ယယူၩန့နၧၩ န့အ့ၬနဲၪ ဘနီၪဂီၩ့ ထဲၩ့ယူၩလၫ့ႉ
အဝ့ၫထဲၩ့ယူၩလၫ့ကထုၪ့ဎး ထိၪလွံကဘံၪ့ ဎွံၩ့ဝ့ၫ တကူၫကူၩႉႉႉကူၫ ဘနီၪတၭ ဂဲၫယူၩလၩ့ဒီၭႉ အဝ့ၫဆ့ စံၭ နးစ့ၩ မၩဆၧၩ့ဝ့ၫန့အ့ၬႉ ယဎွံၩ့ ယလူထီၫထီၫလ့ၬတၭ ယယူၩန့နၧၩန့အ့ၬ ဘိၩအ့ၬဧၪႉ အနီၪယူၩလၫ့ထဲၩ့ဂီၩ့ လံၬၥံၪ့ကဘံၪ့ ဂဲၫယူၩလၩ့ဒီၭႉ ဂၪ့ကိၭအလူနီၪ ကြံၩ ကြံၩ ကြံၩ ကြံၩ ဘနီၪႉ
နးစ့ၩအၪ့ကံၩ့အၪ့ယၫအဝ့ၫတၭ အဝ့ၫစံၭ န့ဘ့ၭ ယၧၩဝ့ၫယလူဎိၩ ဖိၭနီၪအ့ၬႉ အယွ့ခီၫဖၨၪဆ့ဘိၭ ယယူၩန့နၧၩန့ႉ ဖိၪထၧၫ့ကီၩ့လၫ့နံၫ နးထၧၫ့ဒီၭတၭ ကီၩ့ဖျါလၩ့ထၭထီၫထီၫ ထီးအဘံၭနခၪ့ခံၫနီၪ နခိၪနီၪဆ့ ဆီၪ့ဘီၪ့ထၪ့ထဲၩ့ခၧၫ့ခၧၫ့အီႉ လံၬၥံၪ့ဆီးလၩ့အီၪခိၭဆၧ လၧလိးဖၭဒိၪကဖျိၪ့အလီၩအခၫ နးစ့ၩမၩဘဲၫအဝ့ၫလီၩအၥိၭ ဂီၩ့တၭ လံၬၥံၪ့စိၭလၩ့ အခိၪဘီၪနီၪတၭ ယူၩလၫ့ဝ့ၫႉ
အခၫနီၪ ဘီၪၦၡၩဂဲၫစဲၪ့ ဘဲၫဘီၪဖၭဒိၪၡါမၬကဒုၩတၭ ဖုၫလၫ့အဲၪ့နးထီၪ့လါနၫ့ ဘၪထွ့ၫဒၪ အနံၫထိၭနၫဖိၪနီၪလီၫႉ ဘီၪနီၪ မျဲၩနးစ့ၩအနံၫနီၪတၭ မၩၥီၫအနိၭဘယီၩ အၫလါလါ အဖံၭအ့ၪအွံၪဎွ့ၫဘယီၩနီၪ အ့ၪမွဲအယၫနီၪ ကအွံၪကၠၩမီးႉ
ထၧၫ့ဖုဝဲဖျိၩ့ဖိၪၥံၪဧ့ႇ မုကနွ့ၫယီၩ ပကအီၪပထုၬထၬပၡါဖိၪယီၩ အလးထယီၩဂီၩ့ ၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪဘၪနၥံၪဒဲ ပကဒၪဎီၩ့ထဲၩ့လိၬၥၭလၧ ဆၧထံၪလၩ့ဒီၪလၩ့ဖၧၩ့ယီၩနဲၪႉ