ဘီၪၦၡၩ (၃)

ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭနဲၪႉ လၧအဖီၩ့ခွံၬ မုနွ့ၫဒံၭဒၪအိၩ ယအဲၪဒိၭလီၩဖ့ၪနဲၪဘၪနၥံၪ ဘီၪၦၡၩၡါဖိၪနီၪ ထီၩ့လၧ နးထီၫ့လဂၩ ဘီၪၦၡၩထဲၩ့န့အဝဲမုၪတၭ ၥၭမဲၪဆၧဂဲၫထဲၩ့လီၩ အ့ၪအမိဖါဒဲ တဝၫ့ဖိၪၥံၪနီၪလီၫႉ

ဘီၪၦၡၩနီၪ ထဲၩ့ကိၭန့ နးစ့ၩ လၧလိးအိၩကအိၩ အီၪလၧခိၪလီၩ့ဖိၪကဖျိၪ့အခၪ့ထံၭနီၪ အဖၧၩ့တၭ စံၭဝ့ၫ အၪ့ဖီၪ့ထၬမ့ၩအီ ယကလ့ၩလီၩ့ဎွါ ဆၧဒိၭဆၧလၪၥံၪဒံၭႉ နးစ့ၩအၪ့ဖီၪ့မ့ၩတၭ မ့ၩလၭလၫ့ကကၠၪ လ့ၩခဲၩၥံၭလၩ့မ့ၩထံၫ လၧထံၫကၠီၫ့ဖိၪလၧအအီၪလၧ လိးအိၩဖၧၩ့နီၪ လိးပွ့ၫဖိၪကဖျိၪ့ လၧအဘၪလုဘံၭခွံၬလၧ မ့ၩထံၫနီၪ ချဲၩ့ဒုၪအနၫ့ဆါဘယီၩႉ

နစ့ၩဧ့ နဂဲၫထဲၩ့ဖိၬဆၧအခဲၫ့ယီၩ မဘီၪၦၡၩကဒုၩလီၫႉ အဝ့ၫဂဲၫထဲၩ့ခိၬနီၪ မကအၪ့ဖီၪ့အၪ့နၧၩလီၫႉ နးစ့ၩၥၭမဲၪဆၧ ဝၭထိၬလၫ့မၬလီၫႉ ဘနီၪဘိၭ ယကဘၪမၩဒၪ ပၥ့ၪလဲၪႉ မၩဆၧၩ့ဒၪယၧၩခလူၬဘီၪႉ အဝ့ၫအၪ့ကံၩ့အၪ့ယၫဘနီၪႉ

လိပွ့ၫစံၭထဲၩ့ လ့ၩထၪ့ ဘဲၫလိးအိၩယီၩအကၠီၪ့နီၪတၭ နကထီၩ့လၫ့လၧ ခိၪလီၩ့ဒၩ့ခိၪအိၩႉ ထနီၪ နကဒၪဘၪ ဘီၪမိဎွါၡါက့ၭကဒုၩႉ ၥၭမဲၪကစ့ၩႉ အဝ့ၫအမ့ၬၥၪဘျီၪႉ ထိၪၥံၪကဂဲၫယူၩလၩ့လၧ ခိၪလီၩ့ခိၪနီၪအၪလ့ၬႉ အၪ့ကံၩ့ဆၧမၩဆၧၩ့ လၧအဝ့ၫၥံၪအီၪႉ ကဘံၪ့ လမွဲဘၪကဘံၪ့ ကမၩဆၧၩ့နၧၩလီၫႉ လ့ၩ လ့ၩဖျဲၪဖျဲၪ ဘီၪၦၡၩကဂဲၫထဲၩ့လီၫႉ

နးစ့ၩဖီၪ့လၫ့အဆၧဘီၪ့ဖိၪဂီၩ့ လ့ၩဖိၭလၫ့လိးအိၩအကၠီၪ့နီၪတၭ ထီၩ့လၫ့လၧ ခိၪလီၩ့ဒၩ့ခိၪနီၪ ဒၪဘီၪမိဎွါၡါက့ၭကဒုၩ အၪ့လိၪလၩ့အၥၭလၧ ဆၧခိကျၩနီၪႉ နးစ့ၩအီၪယဲၩ့ယဲၩ့လၧ အဝ့ၫတၭ အီၪခိၭထိၪၥံၪကဂဲၫလီၫၥၨၩႉ ထိၪဂဲၫယူၩလၩ့အ ဝံခိၪထုၬနီၪ မွဲကျၭဎီးကဘံၪ့ႉ ဂဲၫယူၩလၩ့ခီၫ ဂၪ့ကိၭ အါ အါ အါ အါ ဘနီ ၪခီၫႉ

ထၧၫ့ဖုဝဲဖျိၩ့ဖိၪၥံၪဧ့ႇ မုကနွ့ၫယီၩ ပကအီၪပထုၬထၬပၡါဖိၪယီၩ အလးထယီၩဂီၩ့ ၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪဘၪနၥံၪဒဲ ပကဒၪဎီၩ့ထဲၩ့လိၬၥၭလၧ ဆၧထံၪလၩ့ဒီၪလၩ့ဖၧၩ့ယီၩနဲၪႉ