ဖျိၩ့ဂ့ၫဘၩ

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပဆၧဆၧးဎံၫဆၧးလၩအနိၫ့ဖၧၩ့ ယမိအၪ့နၩ့လီၩ့အ့ၪဘၪနၥံၪ ပထၧၫ့ဖုဝဲဖျိၩ့ဆၨၩကဆၨၩမွဲဝ့ၫ ဖျိၩ့ဂ့ၫဘၩ ဆၨၩဖိၪလဖၪ လၩ့အဲၪဝ့ၫဒၪ အဆၧအီၪၥၭမၧၫ့ႇ အဆၧလုအၪ့လုအီၩဒဲ ဆၧအီၪက့ၪဒိၪလုၫလါထူၫရူၫအဂဲး ကဆံၭကခ့ၭဖိၪနီၪလီၫႉ

အဆိၪထုၬ ယမိလီၩအ့ၪဘၪနၥံၪ ဂ့ၫဘၩ ဆၨၩအမံၩ့ယီၩ အခီၫပယီၫလီၫႉ ဂ့ၫနီၪ အခီၫပယီၫ အီၪဝ့ၫလၧ ဂ့ၫဘၩလၨခီၫ ထံၫခးဒဲ ဘၩနီၪ အခီၫပယီၫအီၪဝ့ၫဒၪ အလွ့ဘၩ့နီၪလီၫႉ ဂ့ၫဘၩ လံၬလဲနီၪ မီၪဎီၩ့ ဖျိၩ့ၡၩ့ဆၨၩဒီၪ့နီၪလီၫႉ ဖျိၩ့ဂ့ၫဘၩလဖၪ အ့ၪချဲၩ့ဒုၪ့လိၬၥၭလၧအလၨဆၧချဲၩ့အခၫ ဖျိၩ့ဆၨၩဒီၪ့ ဂူၫဂၩလဖၪ မွဲနၪလၥ့ၪဘၪလီၫႉ အထီဘဲၫယီၩအခၫ ဖျိၩ့ဂ့ၫဘၩလဖၪ ချဲၩ့ပယၩ့အဆၧချဲၩ့ဂဲၫဘၪထၪ့ဒဲ ၦလၧချဲၩ့ပယၩ့ ဆၧချဲၩ့လဘၪဘၪ မွဲလအီၪနၭလၧၩ့ဘၪလီၫႉ

လၧအခၪ့ထံၭၥၫ့အိၩ ဖျိၩ့ဂ့ၫဘၩဆၨၩဆၬလဖၪ လၧအဝ့ၫၥံၪအမံၩ့အမ့ၬယၫနီၪ ဆၨၩအမံၩ့အီၪထၬဝဲၩ့ ဖျိၩ့ဂ့ၫဘၩအခွၫလဖၪ အမံၩ့အမ့ၬယၫနီၪ ကိၭဝ့ၫလၧ ခိၩ (လမွဲဘၪ)ကၠီ စံၭမၬချၭ ခိၪအၩဒံၪ ဒဲ အမုၪၥံၪ လဖၪ အမံၩ့အမ့ၬယၫနီၪ ကိၭဝ့ၫလၧ နၫ (လမွဲဘၪ)မိၪ စံၭမၬချၭ နၫတ့ၭလ့ၫနီၪလီၫႉ နံၪ့ ၁၉၇၂နံၪ့နီၪ ဖျိၩ့ဆၨၩထံၫခးဂဲၫအီၪထၪ့အခၫ လၧဆၨၩခးဒီၪ့ဖၧၩ့ ဆၧမၩလိၪဖိၪၥံၪလဖၪ လၧအဝ့ၫအမံၩ့ အမ့ၬယၫ ကဘၪထံၭလၩ့ဆၨၩဆၬအမံၩ့ အခွၫနီၪ စီၩ အမုၪနီၪ နီၫ အခၫ ဂ့ၫဘၩဆၨၩဒီၪ့ အီၪထၬဝဲၩ့ဆၨၩ အမံၩ့လဖၪ မိလၩ့မၬဝ့ၫဒၪနီၪလီၫႉ အဝ့ၫၥံၪ ဆၨၩအမံၩ့နီၪ ဘၪကိၭဝ့ၫမီၪ့ဎီၩ့ ဖျိၩ့ၡၩ့ၥံၪအကၠီၩ့နီၪလီၫႉ

ဖျိၩ့ဂ့ၫဘၩအမုၪၥံၪလဖၪ အဆဲၫ့ဆၬကံၪနီၪ မွဲဝ့ၫဖီၫလွ့ (ပၩ့ဆံၫယီၫ့) ဒဲ အနံၫနီၪမွဲ အလနးအကၠီၪ့ (အလၩ့လဲအစ့ၩကၠီၩ့)ပၫဝ့ၫဒၪနီၪလီၫႉ ဖျိၩ့ဂ့ၫဘၩၥံၪနီၪ အီၪက့ၪဒိၪကျိၪ မီၪ့ဎီၩ့ ထၧၫ့ဖိၪဝဲဖျိၩ့ဆၨၩၥံၪ အဂူၫဂၩနီၪလီၫႉ

ဖျိၩ့ဂ့ၫဘၩလဖၪနီၪ အီၪအၪလၧ ဖျိၩ့ဆၨၩခးဒီၪ့လံၩခံၫကကဲၩ့ခီၫ လံၬၥိၪဝံးဒဲ တီၫငူၫဝံးလံၩခံၫမုထၪ့ႇ လဲဝ့ၩဝံးဒီၪ့ ခိၪလီၩ့မုထၪ့ႇ ပၠ့ၩမနၩဝံးဒီၪ့ ခိၪလီၩ့မုထၪ့နီၪ ဂ့ၫဘၩတဝၫ့ထီးလူၬ အီၪဖိၬဘိၭ အတဝၫ့(၁၇၅) ဘျဲၪနီၪလီၫႉ တီၫငူၫ-ယၩဒိၪဖၧၩ့ၥၭလံၩခံၫနီၪနးဆ့ မွဲ ဖျိၩ့ဂ့ၫဘၩဆၨၩဆၬ အီၪအလးတဝၫ့နီၪလီၫႉ အထီဘဲၫယီၩ ဖျိၩ့ဂ့ၫဘၩအဂၩအီၪဝ့ၫ လၧဖျိၩ့ဆၨၩခးဒီၪ့နီၪ အဂၩ ယဲလၬဘျဲၪႇ ကယၩဆၨၩခးဒီၪ့နီၪ အီၪဝ့ၫ ကလၬဘျဲၪအကၠီၩ့ ထယၬၥ့ၪယၪထၬဝ့ၫဒၪနီၪလီၫႉ ဖျိၩ့ဂ့ၫဘၩၥံၪလဖၪယီၩ ၥၫ့တီၫ့ကၠံၩခိၪလီၩ့အလးလဖၪ နီၪ မွဲအီၪဆ့ဒဲ တီၫငူၫခးရ့ၫ န့ၫပၠ့ၫတီၫကီၪ့စံၫနဲၫနီၪ ကအီၪ ယဲထီၫ့ဘျဲၪအကၠီၩ့ ထယၬၥ့ၪယၪထၬ ဝ့ၫနီၪလီၫႉ

ဖျိၩ့ဂ့ၫဘၩဖိၪလဖၪ အဆၧဖံၭအၪ့မၩအၪ့နီၪ မွဲဝ့ၫ ခိၪလီၩ့အဆၧၥုၪ့ဆၧဖျၭ ကီၫဖံၫႇ ၥ့ၭၥၪႇ နၪ့ဘဲၩ့ဆဲၫ့ႇ ဒညံၩႇ ဖၫလၫႇ နနွၩ့ႇ လဲၫ့ခၠံၩၥံၪနီၪ ၥုၪ့ကၠၭဝ့ၫဒၪလၧ ခီၫၡၩအဂးနီၪလီၫႉ လၧဖျိၩ့ဖျိၩ့အိၩ ဖျိၩ့ဂ့ၫဘၩလဖၪ အကဆၫ့အီၪဝ့ၫအၪမၬလီၫစွါဘဲၫႉ

ဖျိၩ့ဂ့ၫဘၩၥံၪလဖၪနီၪ မွဲ ပဘၩဘုၭဒၭႇ န့ခၠ့ၩဎရံၬဖိၪႇ အ့ၫကလံကၫ့ႇ ကၭၥလံၬဎရံၬဖိၪဒဲ ဘၠၪ့မစိၫဆၧဘိၪ့ဆၧဘၩဖိၪၥံၪနီၪလီၫႉ အအၪထုၬနီၪမွဲ ကၭၥလံၬဆၧဘိၪ့ဆၧဘၩဖိၪၥံၪဒဲ ဎရံၬဆၧအီၪကီၪ့ အခိးအတၩအကၠီၩ့ ဖျိၩ့ဂ့ၫဘၩဖိၪၥံၪ ကဲၪ့ထၪ့ၦကိၪ့ၥ့ၪအၪမၬနီၪလီၫႉ ဘံဒံၡၭပဒိၪပၫလံၫမၫ့အမၭလဖၪ အဖၧၩ့ ဒၫမ့ၫဒံဖိၩမ့ၩဒဲ စီၩဂၠိၫဆ့ၫဒံဖိၩမ့ၩႇ ပယၩ့ၥုၭ (လံၩ) ၥုၭခိၪ ၥုၭခိၪဒိၪနံၫဂၩလဂၩအလး စီၩၡံၩၡိၫဒဲ ဖျိၩ့ဆၨၩခးဒီၪ့ အတ့ၩဝၫ့ အူၩအ့ၩစိၩမၠ့ၭ ၦကိၪ့ၥ့ၪၥံၪလဖၪယီၩ မွဲဖျိၩ့ဂ့ၫဘၩဖိၪၥံၪနီၪလီၫႉ

ဂ့ၫဘၩလံၬလဲနီၪ ဂဲၫအီၪထၪ့လၧ နံၪ့ ၁၈၆၈နံၪ့ဂီၩ့ လံၬလဲယီၩမွဲ က့ၭၥလံၬၥၫ့ခၫ အံၫတလံၫဆၨၩဖိၪပံၩမ့ၫ ဆ့ၫဘစတံၫယၫနိၪ ကၫဘီၩန့ၫဒဲ ဖၫၥၪ တၫ့ခရဲၭဒံၫ ဖိၭလိၬထၪ့ထၬနီၪလီၫႉ နံၪ့ ၁၉၇၀နီၪ ဖၫၥၧၫ့ ဂီၫဖရဲၭဒိၪကိၪတံၫ ဂ့ၫဘၩၥ့ၫပိၩ့ကၠံၩလံၬစီၩ့နီၪ ထဲၩ့ဒိၪဝ့ၫလၧ အံတလံၫထံၫခးနီၪလီၫႉ ၁၈၇၅နံၪနီၪ လၧဂ့ၫဘၩလၨခီၫ ဆၧပရၧၫ့လံၬဘျံၭစဲၪ့ထၪ့နီၪလီၫႉ ဆၧလ့ၩထၪ့ထီၪ့အီၪ ကဆၫ့ဘၪကဆၫ့ ထီးအထီဘဲၫယီၩနီၪ ဂ့ၫဘၩလံၬလဲဒဲ ဆၧဆၧးဎံၫဆၧးလၩ ကဆုးလ့ၩထၪ့ထီၫ့အဂး ဂ့ၫဘၩလံၬလဲဒဲဆၧဆၧးဎံၫဆၧးလၩ ခရၧၫ့ဖိၪလဖၪ ဆုးဖီၪ့ထၪ့ဖံၭထၪ့ဝ့ၫဒၪနီၪလီၫႉ