ဖူၫဒဲၩ့ ဒဲ ကျိၪစ့ၩကျိၪထီၫ့ (၄)

ထၧၫ့ဖုဝဲမုၪခွၫၥံၪဧ့  ဖူၫဒဲၩ့လဂၩ ဖီၫ ဆၧအူၭစဎွၩ ချုၭအခၫ စ့ၭဝ့ၫ နၥံၫယူၭ နဆၧအူၭၥံၪမၩအကၠီၩ့ ယဘုၪဘၪဂၭဂီၩ့လူၬယူၭႉ နၥံၫမၬဆံၭ နဆၧကဒီၪ့ ကဂဲၫဘုၪလၧၩ့အ့ၬႉ အနီၪ ထံၬထၬၦဎွၩအခိၬလၧအစူၪထွ့ၫအဆၧၫ့ဖၧၩ့တၭ အစူၪစ့ၪနီၪ ဝံၬထၬအဝ့ၫအစူၪဒံၩ့နီၪဂီၩ့ လီၩ့ဝ့ၫတၭ ၦဎွၩအၪ့ဝိၫလိၬ က့ျၭစၨၭလီၩထဲၩ့ဝ့ၫ မၩ မၩ မၩဘနီၪလဂ့ၩဘယါ ယကလိၬထဲၩ့ဘ့ၭ ဖျါ ဖျါ ဖျါလၩ့ထဲၩ့ယၧၩဘီၩႉ

နကကိၫ့လိၬပၥ့ၪလဲၪ နၥံၪအၪ့ဆၧအီၪအ့ၬ နဂဲၫလီၩ့ဎွါအၪ့လၧ ယခိၬဖၧၩ့နီၪ ဖူၫဒဲၩ့လီၩဘဲၫယီၩၥိၭအခၫ ဆၧအူၭစဎွၩ စံၭဆၧၫ့ထဲၩ့ ဖျါလၩ့ဒၪယၧၩ နးဖျၬဘယါ ယအီၪနီၪ ဆၧလၧ နၥံၪအီၪက့ၪလူဒိၪၥံၪအီၪႉ ယကဖ့ၪလၫ့နၧၩႉ မွဲယူၭ အ့ၪမွဲနၥ့ၪအၪ့လီၫ့ယၧၩနီၪ ၡိၭလၧနၥံၪအီၪယီၩ ယကဎူလၫ့ခွံၬထီးအလူၬႉ ဖူၫဒဲၩ့ဖျါလၩ့ထဲၩ့အဝ့ၫကကၠၪ အဝ့ၫလ့ၩထၪ့လၧ ၥံၪ့ခံၫလၧ အနၫ့ဆါအီၪအလးနီၪဂီၩ့တၭ အီၪကဆိဖိၪ ဂဲၫစဲၪ့လၩ့ထဲၩ့ကၠၧၫ့ကၠၧၫ့ဆၧအူၭကနၩ့ ဂဲၫဆိၬန့ မန့လဲၪ နၥံၪၥ့ၪယၫဧၪႉ ကျိၪၥံၪယါ ကျိၪၥံၪ မွဲကဖျိၪ့မွဲအ့ၬ နံၫဖျိၪ့ ကဖျိၪ့နီၪ ထီၫ့ႇ ကဖျိၪ့နီၪ စ့ၩ ဎိၩနီၪ ဎိၩဖိၭနီၪအ့ၬဘီၩႉ

          ကထုၪမၬနီ ၪ ဖူၫဒဲၩ့ မံၫ့ၥၭၡါမၪလၥၨၩႉ စံၭခိးစံၭတၩ ဆၧအူၭစဎွၩနီၪခီၫဒံၭႉ ဂီၩ့နီၪလီၩဆၧလၧ ဂဲၫအၪ့ဘုၪလၧ အခိၭဖၧၩ့န့ ဘၪဆီးလလီၩ့ၥဲၫဘၪဂီၩ့လီၫ ကဲၪထၪ့ထံၩၥိၭယူၭဘိၭနဲၪႉ ဖူၫဒဲၩ့ထဲၩ့ကကၠၪ ဆၧအူၭၥံၪယိၬလၫ့ကျိၪၥံၪနီၪတၭ လ့ၩၥိၫ့အဝ့ၫခီၫဒံၭ ဘဲၫအ့ၬဧၪႉ ကဂၩဒဲကဂၩ အီၪဘၪလိၬအိၬလိၬ လၧဆၧအဲၪဆၧကွံၩဘယီၩနီၪ မငါထဲဎွ့ပၥ့ၪလဲၪႉ

          လခဲၫ ဖူၫဒဲၩ့ မံၩ့ဎိၩၥၩဖျီၪလၫ့လၧအလး အဘူၭအယဲၩ့ၥံၪနီၪ မွဲလၧ ပပၨၩန့ထၬဘၪ ကျိၪစ့ၩ ကျိၪထီၫ့ၥံၪအကၠီၩ့နီၪလီၫႉၦၡၩထီးအလူၬ ထီးဆၧၫ့အဝ့ၫ ဘဲၫပခိၪပနါအဒိၪထုၬအၥိၭဆ့လီၫႉ