ဖူၫဒဲၩ့ ဒဲ ကျိၪစ့ၩကျိၪထီၫ့ (၂)

ထၧၫ့ဖုဝဲမုၪခွၫၥံၪဧ့ ပဒၪဎီၩ့ထဲၩ့လိၬၥၭလၧ ၡါအဆၧထံၫလၩ့ဒီၪလၩ့ဖၧၩ့ဒီၭနဲၪႉ လၧအဖီၩ့ခွံၬမုနွ့ၫဒံၭဒၪအိၩ ယလီၩ့ထဲးထၬအ့ၪနၥံၪ ဖူၫဒဲၩ့ဒဲ ကျိၪစ့ၩ ကျိၪထီၫ့ ၡါဖိၪနီၪ ထီၩ့လၧ ဖူၫဒဲၩ့လဂၩ မကကိၪ့မၩခွံၬ ဆၧအူၭအဒဲၩ့ၥံၪယီၩ ပၥ့ၪလဲၪအလးနီၪယူၭနဲၪႉ

          တၭ ကနံၩနီၪ  ဖူၫဒဲၩ့လဂၩ လီၩ့ခၭဆၧအူၭၥံၪ လၧ ပျၩ့ဖၧၩ့နီၪ လၧၩ့အ့ၬႉ ဒၪစိၩဆၧအူၭၥံၪနီၪ လၧ ခိၭဖၧၩ့အခၫ အဝ့ၫလဲၩ့လၩ့ယၪအူၪလၧ မ့ၩထံၫဖၧၩ့နီၪ ဂီၩ့တၭ ဂုၪလၩ့အလီၩ့ထၧၫ့ဂၩယၫ ဂီၩ့ မံၫနၩ့စီၪ့လၩ့အၥၭလၧ အဂံၪ့မ့ၬယၫ ခၬလီၩ့နီၪႉ ဆၧအူၭၥံၪလဖၪ ဒၪဖူၫဒဲၩ့ဂဲၫစဲၪ့လၪ့ ခိၭကိၭကၠၪကၠၪအိၩအ့ၬတၭ စီၪဆၧဘၪအ့ၬႉ လီၩလိၬၥၭ ကနံၩယီၩ ဖူၫဒဲၩ့လဂၩ ဂဲၫဖိးလၫ့အ့ၬနဲၪ မအီၪလမုၬဘၪဧၪႉ ပကလ့ၩဆီၩ့ယိဆူၭနးထုၪႉ

          အဝ့ၫၥံၪဒၪဖူၫဒဲၩ့လၧ ခၬလီၩ့နီၪ လ့ၩဆီၩ့လၩ့ဘူၭအၥၭကကၠၪ နၧၫ့ဘၪဆၧနၧၩ့အုၪလၥၨၩႉ အနီၪကကၠၪ ဆၧအူၭၥံၪလဖၪနီၪ ၡုးဖျး ထဲၩ့စဲၪ့လီၩ့အ့ၪအၦဎွၩဆၧအူၭဖၭဒိၪနီၪႉ ဆၧအူၭၥံၪနါဂၧၫ့ဆၧနီၪတၭ လ့ၩဖိၬလၫ့အစဎွၩအခဲၫ့ ထၧၫ့ဎိၫ့ယၫ ထီၩလၧအိၩကကၠၪ ဆၧအူၭၦဎွၩလီၩဆၧ အဝ့ၫယီၩ မွဲ ၦခိးတၩဆါအကၠီၩ့ ပအီၪက့ၪထးဘယီၩၥ့ၪအ့ၬႉ ပကထဲၩ့ဆိၬန့လၧ ပအီၪဂီၩ့ ပကဘၪမၩဂ့ၩမၩဘၪႉ ဆိၬလၫ့ ဝၩ့ဆိၬလၫ့ႉ

          အနီၭတၭ ဆၧအူၭကအီၪဖိၭဘိၭ ကဆံၫလံဒုၩ ယဲဒုၩ ဝၩ့ဆိၬလၫ့ဖူၫဒဲၩ့ဂီၩ့ ထဲၩ့ဆိၬန့ဝ့ၫလၧ ခိၪလီၩ့ခိၪ အီၪက့ၪထၬဝ့ၫလၧ ၥံၪ့ခၪ့ထံၭၦဎွၩအီၪနီၪလီၫႉ

ထၧၫ့ဖုဝဲမုၪခွၫၥံၪဧ့ ၦၡါဖိၪယီၩ ပကအီၪပထုၬထၬအလးထယီၩဂီၩ ဆၧအူၭလဖၪၥံၪယီၩ ထဲၩ့န့ဖူၫပဒဲၩ့ဂီၩ့ မကမၩဂ့ၩမၩဘၪဝ့ၫဘဲၫၥ့ၪလဲၪနီၪ လခဲၫမုနွ့ၫမၬ ယကဆုးလီၩ့ဖ့ၪနဲၪထဲၩ့နၥံၪနဲၪႉ