ဖူၫထိၭထီၩ့ဒဲ ဆၫ့ဖိၪပံၭ (၂)

အဝ့ၫၥံၪအဂံၪ့ဖၧၩ့နီၪ ထံၫလုၩကၠၭဖၭဒိၪအီၪကဖျိၪ့ဘိၭ ထၧၫ့ဖိၪမိနံၫဂၩလ့ၩနုၬလၩ့အီၪဂူၪအၥၭ လၧဆၧဖၧၩ့ဖၧၩ့နီၪႉ ယံၬအ့ၬ ဆၧခံၭလၩ့ပံၭတၭ နါဂၧၫ့ဆၧကိၭဆၧ လၧဂံၪ့ခိၪလၬအိၩႉ

မပၩလဲၪ နၥံၪၥ့ၪယၫမွဲအ့ၬဧၪ အၨၩ မွဲယါ  ဖူၫထိၭထီၩ့နီၪလီၫႉ

ဧ့ လံၩနး ဆၫ့ဖိၪပံၭ ဧ့ လံၩနးဆၫ့ဖိၪပံၭ ၦၡၩဝဲၩ့ဒုၪ့နးဂၩအ့ၬႉ

ဘနီၭဘိၭ ဂဲၫထၪ့လၧ ဂံၪ့ဖၧၩ့တၭ ကိၭဆၧဒီၭႉ

ဧ့ လံၩနးဆၫ့ဖိၪပံၭ ဧ့ လံၩနး ဆၫ့ဖိၪပံၭ ၦၡၩဝဲၩ့ဒုၪ့ နးဂၩအ့ၬႉ

ဆၫ့ဖိၪပံၭယီၩ အၪ့လီၫယၧၩယူၭႉ စံၭထၬယၧၩခီၪနီၪ ဂဲၫအီၪကွ့ၩဘနီၪနဲၪႉ

ထိၭထီၩ့လီၩလၫ့ဆၧလနီၪ အလူၥီၪၥီၪႉ လီၩလၧကချဲၩ့ဒုၪ့ထဲၩ့အဝ့ၫနီၪလဂ့ၩ ထၧၫ့ဖိၪမိၥံၪလၧထံၫလုၩကၠၭဖၧၩ့နီၪ ၥၭမဲၪဆၧနၭလၨၪ ၥၪဒုၩဒုၩဘုၪ့ဝါ ထၧၫ့ယၫအ့ၬႉ

ဖူၫထိၭထီၩ့လီၩ့ယိဆၧလံၫလံၫတၭ ဒၪဝ့ၫလၥၨၩႉ ထံၫလုၩကၠၭနီၪ ထဲၩ့ပျီၩကနၧၩ့ဧၪနဲၪႉ လန့ဘၪ ကယဲအန့လၥၨၩႉ ဖူၫထိၭထီၩ့ စီၪအၥၭဘနီၪတၭ အၪ့ထုၪ့ယိၬလၫ့ဆၧနီၪတၭ ထဲၩ့ဝ့ၫ ထံၫလုၩကၠၭယီၩ မပၧၫ့မၬလဲၪ စီၪဘၪအၥၭဘနီၪဒံၭႉ

ဖူၫထိၭထီၩ့ ခၫလၫ့ဘၪအၪအၪဒံၭအ့ၬႉ ဆၫ့ဖိၪပံၭ လၧဖၧၩ့ဖၧၩ့နီၪ မိနၧၫ့အ့ၪလၫ့ႉ ဘနီၪတၭလီၩအမိ စီၩစီၩဖိၪ

ပံၭ - မိမိဧၨၪ ယမိနၧၫ့အ့ၪႉ

မိမိ - န့ၫဒံၪ့နီၪဆ့ နၧၫ့အ့ၪကဒ့ၩ ဖူၫထိၭထီၩ့ကနါဂၧၫ့ပၧၩႉ လခဲၫ ဆၫ့ဖိၪပံၭယီၩ အီၪန့လအ့ၬတၭ အမိမိချဲၩ့ထုၬဒံၭအ့ၬ ဆၫ့ဖိၪပံၭနၧၫ့အ့ၪစဲၪ့လၫ့ၡူၭ ထူၩႉႉႉထံၫလုၩကၠၭဖၧၩ့ဘယါ အလူအိၩဘိၭ ၥီၪ့လၫ့ဖိၭဘိၭလၫ့ဎွံၩ့လ့ၬယါႉ

ဆၧအလူနီၪ ၥီၪဘုၭထဲးဒၪ ဖူၫထိၭထီၩ့အနါ ထိၭနီၪလ့ၬဘိၭ အဝ့ၫၡူၭၥဲၩမၬနီၪဘိၭ အလၩမိဂၬခွံၬမၬလီၫႉ ထံၫလုၩကၠၭနီၪဆ့ ဘံၩဖျိၬလၩ့ထ့ၭလၧဖံၭခိၪ ဘၨး ကလၭႉ အဝ့ၫနီၪဆ့ စဲၪ့ၡိၭအၥၭတခၩကဘၪလၥၨၩႉ မစီၪအၥၭ လၧပဒုၭဆၧကဂၩဂၩ ခၬအနၫ့ဆါလၧကျီၩ့ဧၪၥ့ၪယၫအ့ၬနဲၪႉ

စဲၪ့ဘၪယဲၩ့ယဲၩ့အ့ၬဧီၪ လ့ၩဘၪစုၭထဲးလၧ ၥံၪ့ကဖုၫတၭ လၩ့ထံၩဖါဘျံၭဒၪအၥၭလ့ၬယါႉ အမ့ၬၥဒၧၩ့ဖိၬဝ့ၫယူၭႉ