ဖူၫထိၭထီၩ့ဒဲ ဆၫ့ဖိၪပံၭ (၁)

လၧကကၠၪအိၩ ခိၪလီၩ့ဘီၩ့ခိၪအလးကစီၪ့နီၪ ဆၫ့ထၧၫ့ဖိၪမိအီၪနံၫ့ဘံၪ့ အမိမိဒဲ အဖိၪမုၪဆၫ့ဖိၪပံၭ့ဘီၪႉ လၧဂီၩနးခုၬ ဆၫ့မိမိလ့ၩစဲၪ့ထၪ့လီၩ့ဎွါအၪ့အဆၫတၭ ဆၫ့ဖိၪပံၭဝ့ၫ ဘၪအီၪခိၭထးဂံၪ့ဘီၪႉ မုဂၪလၩ့မၬ အမိမိဂဲၫထဲၩ့ထီၩ့လၧဂံၪ့ လၧဆၧအၪ့ဆၧအီၩၥံၪႉ

ၡိၬလၧအဝ့ၫၥံၪအီၪအဖၧၩ့နီၪ ဖူၫထိၭထီၩ့ၥံၪအဂံၪ့ဒီၪ့ မအီၪဆ့ႉ အနၫ့ဆါနီၪ အဖိၪအီၪအၪလ့ၬတၭ ဘၪလီၩ့ဎွါဆၧအၪ့ အၪန့ဆၫ့အမိမိနီၪလၥၨၩႉ

အကနံၩနီၪတၭ ဖူၫထိၭထီၩ့လ့ၩစဲၪ့ထၪ့လီၩ့ဎွါအၪ့အဆၫတၭ လ့ၩထီၩ့လၧ ဆၫဖိၪပံၭအဂံၪ့နဲၩ့နီၪ အဝ့ၫဒၪဆၫ့ဖိၪပံၭ အီၪလၧအဂံၪ့ဖၧၩ့နီၪ ကဘံၪ့လီၫတၭ ချဲၩ့ဒုၪ့စိၩဝ့ၫ

ဧ့ လံၩနးဆၫ့ဖိၪပံၭ ဂံၪ့ထၧၫ့ဖျိၪ့ယၫယီၩ နအီၪဒၪ နၧၩကဂၩလီၫဧၪနဲၪ

မွဲအ့ၬ ဖူၫဧၨၪ ယီအီၪလၧယမိမိနံၫဂၩခီၫႉ ဘဲၫယီၩနီၪ အဝ့ၫလ့ၩလီၩ့ဎွါအ့ၪယၧၩ ဆၧအၪ့ဆၧအီၩဒံၭႉ

အီၩ အီၩ ဘၪမုနၩနၩ နၥံၪမံၫခလဲၪနဲၪ-ပမံၫလၧၡါခိၪလၥၨၩ ဖူၫ

နၥံၪအမ့ၬခဲၫ့ လၩ့ဆဲၩဖၭထီၫဧၪႉ လံၩမုၪနၩ့ဆၫ့ဖိၪပံၭႉ

ပမ့ၬခဲၫဘုၭလၩ့ဒၪဖံၭလီၫႉ ဖူၫဧ့ - အၨၩ အၨၩ ကိၭမုနၩခိၬ ယကဂဲၫအီၪကွ့ၩနၥံၪအီၭႉ ဂဲၫ ဖူၫဧ့ ဂဲၫဂဲၫ

မုဂၪလၩ့ ဆၫ့မိဎွါဂဲၫထဲၩ့ထီၩ့တၭ ဆၫ့ဖိၪပံၭဒၪဘၪဆၧအၪ့ဆၧအီၩအၪမံၩ့လ့ၬအကၠီၩ့ အၥၭဎွံၪဝ့ၫနါလၨၪတၭ ၥၭနၪ့ခွံၬဖူၫထိၭထီၩ့အဂဲးနီၪ အၪ့အဆၫဘျဲၩ့အၪ့ဂီၩ့ လ့ၩစဲၪ့ကွ့ၩအခၫနီၪဆ့ နၪ့ထၪ့ဆၧအဂဲးနီၪအ့ၬႉ ထီးအမိမိအီၪကိၭဆၧလၧ ၡါခိၪကကၠၪမၬ နၪ့ထၪ့ထဲၩ့ဖူၫထိၭထီၩ့နီၪ အမိမိနါဂၧၫ့ဘၪ ဆၫ့ဖိၪပံၭလီၩထဲၩ့ဆၧနီၪၥံၪကကၠၪဎး ၡူၭဆုၭလ့ၬလၥၨၩႉ

မိမိ - ဝ့ၩ ဖိၪမုၪဧၪနါ အနီၪ မကဂဲၫအဲၪ့ၥံၫအၪ့ပၧၩလီၫႉ နလ့ၩကိၭအီၪကွ့ၩထိၭထီၩ့နီၪ ပၥ့ၪလဲၪႉ

ပံၭ - မွဲ ပၥ့ၪယၫဘိၭမိမိ ယၥၭမဲၪထဲနီၪ ယၥၭမဲၪထဲနီၪ ပကစဲၪ့ဘီၪမိမိႉ

မိမိ - ဘဲၫယီၩနီၪ ဆၧဂဲၫခံၭလၩ့ခီၫယူၭႉ ပစဲၪ့ချုၭလၧၩ့အ့ၬႉ ပကဘၪအီၪက့ၪၥူၫမၬပၥၭလီၫႉ